গুজৰাটৰ বিৰুদ্ধে মেচত ৰোহিতৰ অভিলেখ

আহমেদাবাদ, ৩০ মিাৰ্চঃ শনিবাৰে আই পি  এলৰ খেলত  গুজৰাট টাইটানছৰ বিৰুদ্ধে পৰাস্ত হয় মুম্বাই ইণ্ডিয়ানছ৷ মেচখনত ব্যৰ্থ হয় ৰোহিত  শৰ্মা৷ তেওঁ চাৰিটা  বলত  মাত্ৰ আঠ ৰান সংগ্ৰহ  কৰে৷ কিন্তু ইয়াৰ মাজতে ৰোহিত  এক অভিলেখৰ অধিকাৰী  হয়৷ প্ৰথম ভাৰতীয়  ক্ৰিকেটাৰ হিচাপে ৪৫০খন টি-টুৱেণ্টী খেলাৰ অভিলেখ গঢ়ে ৰোহিতে৷ ২০০৭ চনত মুম্বাইৰ হৈ বৰোদাৰ বিপক্ষে  প্ৰথম টি-টুৱেণ্টী খেলিছিল ৰোহিতে৷

সেই  বছৰ কুৰি  অভাৰৰ ক্ৰিকেটত ভাৰতৰ  বিশ্বজয়ী দলৰ সদস্য আছিল ৰোহিত৷ যোৱা টি-টুৱেণ্টী বিশ্বকাপত তেওঁৰ নেতৃত্বতেই চেম্পিয়ন  হয়  ভাৰত৷  তাৰ পাছতে আন্তঃৰাষ্ট্ৰীয় টি-টুৱেণ্টী ক্ৰিকেটৰ পৰা খেলুৱৈজনে অৱসৰ ঘোষণা কৰে৷ কিন্তু তেওঁ আই পি  এলত খেলিছে৷ শনিবাৰে গুজৰাট  টাইটানছৰ বিৰুদ্ধে খেলত নিজৰ ৪৫০ সংখ্যক টি-টুৱেণ্টীৰ মাইলৰ খুঁটিত  উপনীত হয় এই তাৰকা৷ ভাৰতৰ হৈ সৰ্বাধিক টি-টুৱেণ্টীত  অংশ লোৱা সকলৰ তালিকাত দ্বিতীয় স্থানত আছে দীনেশ কাৰ্তিক৷ কলকাতা  নাইট ৰাইডাৰ্ছৰ প্ৰাক্তন  অধিনায়কে ৪১২ খন টি-টুৱেণ্টী খেলিছে৷  তৃতীয় স্থানত থকা বিৰাট  কোহলিয়ে অংশ লোৱা টি-টুৱেণ্টীৰ  সংখ্যা ৪০১ খন৷