শোচনীয়! ২৪ ঘণ্টাত ২.৭৩ লাখ আক্ৰান্ত
ভাৰতৰ প্ৰতিখন ৰাজ্যতে ভয়ংকৰ ৰূপ লোৱাৰ দিশে কৰ’না, ২৪ ঘণ্টাত অভিলেখ ১,৬১৯জনৰ মৃত্যু
আমাৰ অসম, ২০ এপ্ৰিলঃ কৰ’নাৰ দ্বিতীয় ঢৌৱে দেশত ভয়ংকৰ পৰিস্থিতি অব্যাহত ৰাখিছে৷ ইখনৰ পিছত সিখন ৰাজ্যত কঠোৰ ক’ভিড-১৯ নিয়ম বলৱৎ কৰা হৈছে৷ ৰাজস্থানত ১৫ দিনীয়া লকডাউন ঘোষণা হোৱাৰ পিছত দিল্লীতো কঠোৰ সান্ধ্য আইন বলৱৎ কৰা হৈছে৷ মহাৰাষ্ট্ৰত কঠোৰ নীতি-নিয়ম বলৱৎ কৰা হৈছে৷ উত্তৰ প্ৰদেশ, তামিলনাডু, মধ্য প্ৰদেশ আদিতো কৰ’না ৰোধৰ বাবে অতি কঠোৰ ব্যৱস্থা গ্ৰহণ কৰা হৈছে৷ কিন্তু সকলো প্ৰচেষ্টা ব্যৰ্থ হৈছে৷ প্ৰতিদিনে অভিলেখ হাৰত বাঢ়িছে কৰ’নাত আক্ৰান্ত হোৱা লোকৰ সংখ্যা৷ থমকি ৰোৱাৰ নামেই লোৱা নাই ত্ৰাস সৃষ্টিকাৰী কৰ’নাই৷ যোৱা ২৪ ঘণ্টাত ভাৰতত কৰ’নাত আক্ৰান্ত হোৱা লোকৰ সংখ্যাই আন এটা অভিলেখ ৰচে৷ সোমবাৰে পুৱা কেন্দ্ৰীয় স্বাস্থ্য আৰু পৰিয়াল কল্যাণ বিভাগে প্ৰকাশ কৰা অনুসৰি যোৱা ২৪ ঘণ্টাত ভাৰতত অভিলেখ ২.৭৩ লাখৰো অধিক লোক কৰ’নাত আক্ৰান্ত হয়৷ প্ৰথমবাৰৰ বাবে ভাৰতত এদিনতে ইমান লোক আক্ৰান্ত হয়৷ ফলত অহা দুই-এদিনৰ ভিতৰতে দেশত দৈনিক আক্ৰান্ত হোৱা লোকৰ সংখ্যাই তিনি লাখৰ ঘৰো অতিক্ৰম কৰিব৷ ইয়াৰ ফলত ভাৰতত কৰ’না পৰিস্থিতি অধিক ভয়ংকৰ হৈ পৰিব৷ চিকিৎসালয়ত ৰোগী থ’বলৈ ঠাই নোহোৱা হ’ব৷ যোৱা ২৪ ঘণ্টাত দেশত অভিলেখ ১,৬১৯জন লোকৰ মৃত্যু হয়৷ প্ৰতিদিনে দৈনিক মৃত্যুৰ সংখ্যাও দ্ৰুতগতিত বৃদ্ধি পোৱাটো অতি বেয়া লক্ষণ৷ অহা দিনকেইটাত কি পৰিস্থিতিৰ সৃষ্টি হয়, তাক লৈ সকলোৱে শংকাৰ মাজেৰে দিন পাৰ কৰিছে৷ দেশত একেৰাহে পাঁচদিনলৈ দৈনিক কৰ’নাত আক্ৰান্তৰ সংখ্যা দুই লাখৰো অধিক হয়৷ যোৱা ২৪ ঘণ্টাত দেশত ১৪ লাখৰো অধিক লোকৰ কৰ’না পৰীক্ষা কৰা হয়৷ ইয়াৰ ভিতৰত মহাৰাষ্ট্ৰত সৰ্বাধিক ৬৮ হাজাৰ লোক আক্ৰান্ত হয় আৰু ৫০৩জন লোকৰ মৃত্যু হয়৷ এতিয়ালৈকে ভাৰতত ১২.৩৮ কোটি লোকক কৰ’না ভেক্চিন প্ৰদান কৰা হৈছে৷