অসমৰ শিল্পীৰ প্ৰতিক্ৰিয়া হিচাপে প্ৰথমে এই ছবিখনক লৈ মন্তব্য কৰিছিল বলীউডৰ প্ৰতিষ্ঠিত অভিনেতা আদিল হুছেইনে৷ ছবিখন সন্দৰ্ভত আদিল হুছেইনে এটা টুইটত লিখিছিল–‘সত্য প্ৰকাশ কৰাটো নিঃসন্দেহে আৱশ্যকীয়৷ কিন্তু সেয়া নম্ৰভাৱে কোৱা প্ৰয়োজন৷ নহ’লে সত্য প্ৰকাশ কৰাৰ উদ্দেশ্য আৰু তাৰ সৌন্দৰ্য নষ্ট হয়৷ ফলত তাৰ প্ৰভাব প্ৰতিক্ৰিয়াশীল হয়, সমাজ প্ৰভাবিত নহয়৷ আমি নিশ্চিতভাৱে প্ৰতিক্ৰিয়াশীল সমাজৰ অৰ্থে ইন্ধন যোগাব নোৱাৰো৷ শিল্প কেতিয়াও প্ৰতিক্ৰিয়াশীল হোৱা উচিত নহয়৷’ আদিল হুছেইনক সেই টুইটৰ  প্ৰত্যুত্তৰত সমগ্ৰ দেশৰ অলেখ সমৰ্থকে কটু সমালোচনা কৰি তেওঁক মুছলমান বাবেই সন্ত্ৰাসবাদী বুলি অভিহিত কৰিবলৈ কুণ্ঠাবোধ কৰা নাছিল৷ আদিল হুছেইনে ছবিখনৰ বিষয়বস্তু বা ছবিখনৰ কলাক লৈ অথবা নিৰ্মাণৰ ধৰণক লৈ কোনো মন্তব্য কৰা নাছিল৷ কিন্তু অসমৰ সংগীত শিল্পী নীলোৎপল বৰাই এই ছবিখন চোৱাৰ পাছত এটা ভিডিঅ’ ছ’চিয়েল মিডিয়াত আপলোড কৰি সমালোচনা কৰাৰ লগে লগে তেওঁক ছবিৰ সমৰ্থকে কুকুৰে কাইট নোখোৱাকৈ গালি পাৰিছে৷ আচলতে আক্ষৰিক অৰ্থতে নীলোৎপল বৰাৰ ওপৰত জপিয়াই পৰিছে অলেখ দেশভক্ত আৰু ছবিভক্ত৷ নীলোৎপল বৰাই তেওঁৰ ভিডিঅ’টোত কৈছিল– ছবিখনৰ নিৰ্মাণ অতি ‘ডাৰ্ক’ আৰু সীমাহীন হিংসাত্মক ঘটনাৰে ভৰা৷ ভাৰতত এনে বহু ‘ডাৰ্ক চেপ্টাৰ’ আছে৷ নেলীকাণ্ডই হওক বা গুজৰাটৰ সাম্প্ৰদায়িক সংঘৰ্ষ, তেনেবোৰ ঘটনাই দেশত কোনো এটা সময়ত অন্ধকাৰ যুগৰ সৃষ্টি কৰিছিল যদিও সেয়া কোনেও ছবি হিচাপে এনেদৰে তুলি ধৰা নাই৷ নীলোৎপল বৰাই কয়, তেওঁ এই ছবিখন চোৱাৰ পাছৰ পৰাই কেইবাদিনো ধৰি শুব পৰা নাই৷ মূলতঃ যিদৰে এই ছবিখনত ভায়’লেন্স প্ৰদৰ্শন কৰা হৈছে সেয়া তেওঁৰ মতে সমৰ্থনযোগ্য নহয়৷ এই ছবিখনে তেওঁৰ মনত নেতিবাচক চাপ পেলাইছে৷ এনেদৰে নেতিবাচক চাপ পেলাব পৰাকৈ ছবি এখন নিৰ্মাণ কৰা উচিত জানো বুলি তেওঁ প্ৰশ্ন কৰিছে৷ তেওঁ কৈছে যে এসময়ত পৰিয়ালৰ জ্যেষ্ঠজনে কাৰোবাৰ সৈতে কাজিয়া পেচাল কৰিলেও পৰৱৰ্তী প্ৰজন্মৰ মাজত কিন্তু সমিল-মিল আছে৷ এতিয়াৰ প্ৰজন্মৰ মানসিকতা ইতিবাচক৷ পুৰণি ঘাঁ তেওঁলোকে খুচৰি নাথাকে৷ সকলো ঘটনা পাহৰি  আজিৰ প্ৰজন্মই সমিল-মিলেৰে ইতিবাচকভাৱে আগবাঢ়ে৷ যিদৰে নেলী বা গুজৰাটৰ হত্যাকাণ্ডৰ বিষয়ে ভায়’লেন্সসৰ্বস্ব ছবি নিৰ্মাণ হোৱা নাই সেইদৰে এই ঘটনাক লৈও এনেদৰে অতিমাত্ৰা ভায়’লেন্স দেখুৱাই ছবি নিৰ্মাণ কৰা যুগুত নহয় বুলি তেওঁ মন্তব্য কৰে৷ 

ছ’চিয়েল মিডিয়াত সেই ভিডিঅ’টো আপলোড কৰাৰ পাছত নীলোৎপল বৰাক অগণন নেটিজেনে অশ্ৰাব্য ভাষাৰে গালি-গালাজ কৰিছে৷ নীলোৎপলক গালি-গালাজ কৰা সকলৰ মাজত আছে গোৱালপাৰাৰ মৃণালকান্তি মেধি নামৰ শিল্পীজনো৷ তেওঁ নীলোৎপলক কৈছে– তই বদৰৰ হ’বলগীয়া নতুন চিনেমাত সংগীতৰ কাম পোৱাটো খাটাং৷ হিৰ’ইন শিখা আৰু হিৰো অজিত৷ উল্লেখ্য এই গোৱালপাৰাৰ শিল্পীজনে নিজে ছবিখনৰ সপক্ষে এটা ফেচবুক প’ষ্ট দি ছবিখনৰ জৰিয়তে কোন কোন কংগ্ৰেছী, বাওঁপন্থী, আৰৱী আৰু ৰাষ্ট˜ বিৰোধী হিচাপে চিহ্নিত কৰা সহজ বুলি মন্তব্য কৰিছে৷ তেওঁ আনকি আদিল হুছেইনৰ দৰে বিখ্যাত অভিনেতাক গোৱালপাৰাৰ শিল্পী বুলিহে মন্তব্য কৰিছে৷ ইপিনে নীলোৎপল বৰাৰ ফেচবুক প’ষ্টত অনেকেই তেওঁক বীভৎস ভাষাৰে গালি-গালাজ কৰি তেওঁৰ ফোন নম্বৰো আপলোড কৰি দিছে যাতে কোনো দেশভক্তই নীলোৎপলক পোনপটীয়াকৈ ভাবুকি দিব পাৰে৷ ইপিনে জ্যোতি চিত্ৰবনৰ অধ্যক্ষ সীমান্ত শেখৰে ‘দ্য কাশ্মীৰ ফাইলছ’ ছবিখনক লৈ ছ’চিয়েল মিডিয়াত একাধিক প’ষ্ট দিছে৷ স্বাভাৱিকতে তেওঁ ‘আদত চে মজবুৰ’– সেয়ে তেওঁ ছবিখনৰ সপক্ষেই মন্তব্য কৰিছে৷  পিছে নেটিজেনসকলে সীমান্ত শেখৰকো এৰি দিয়া নাই৷ বহুতেই সুধিছে– তুমি যে বলীউডৰ ছবি এখনক লৈ এনেদৰে বিজ্ঞাপন দিবলৈ আৰম্ভ কৰিছা, অসমৰ ছবিক লৈ কিডাল কৰিছা? তোমাৰ কাম হৈছে অসমৰ ছবিৰ উন্নয়ন সাধন কৰা৷ পাৰিলে সেই কামত লাগা৷ কাশ্মীৰি পণ্ডিতৰ দুখ-দুৰ্দশাক লৈ ঘঁৰিয়ালৰ চকুপানী টুকি লাভ নাই৷