৩০, ৩১, ৩৩... ৰিপুণৰ ভোট হিচাপ কৰিছে বিজেপিয়ে

আমাৰ অসম, ২৭ মাৰ্চঃ ৰাজ্যসভাৰ নিৰ্বাচনত বিৰোধী পক্ষৰ উমৈহতীয়া প্ৰাৰ্থী ৰিপুন বৰাই কিমান ভোট লাভ কৰিব সেই হিচাপ কৰাত ব্যস্ত বিজেপি৷ একাংশৰ মতে ৰিপুন বৰাই লাভ কৰিব ৩০টা ভোট, আন একাংশৰ মতে তেওঁ পাব ৩১ বা ৩৩টা ভোট৷ বিজেপিৰ মতে ৰিপুন বৰা ৰাজ্যসভাৰ নিৰ্বাচনত হৰাটো নিশ্চিত৷ কিন্তু কিমান ভোটত হাৰিব তাৰ অংক কৰাত ব্যস্ত বিজেপি৷ আজিৰ তাৰিখত কংগ্ৰেছৰ হাতত আছে ২৭ খন আসন৷ এ আই ইউ ডি এফৰ হাতত আছে ১৫ খন আসন৷ কংগ্ৰেছৰ নিলম্বিত বিধায়ক শশীকান্ত দাসে ইতিমধ্যে বিজেপিৰ পক্ষত ভোট দিব বুলি প্ৰকান্তৰে প্ৰকাশ কৰিছে৷ সেই হিচাপত ২৬টা ভোট এতিয়াও অক্ষত হৈ আছে কংগ্ৰেছৰ৷ নিৰ্দলীয় বিধায়ক অখিল গগৈ আৰু চি পি আই এমৰ বিধায়ক মনোৰঞ্জন তালুকদাৰে ইতিমধ্যে বিৰোধীৰ উমৈহতীয়া প্ৰাৰ্থী ৰিপুন বৰাক ভোট দিব বুলি প্ৰকাশ কৰিছে৷ ৰিপুন বৰাৰ পক্ষত ভোট পৰিব লাগে ৪৩টা৷ ৪৩ জন বিধায়কে ৰিপুন বৰাৰ মনোনয়নতো সংগ দিছে৷ তাৰ পাছতো বিজেপিয়ে দাবী কৰিছে যে ৩০-৩৩ টাতকৈ বেছি ভোট নাপায় ৰিপুন বৰাই৷ ৰিপুন বৰাই শনিবাৰেও বিধায়কৰ মাজত মিঠাই বিতৰণ কৰি আছে৷ শাসক পক্ষই ৰিপুন বৰাক মিঠাই বিতৰণ কৰা বাবে উপলুঙা কৰিছে৷ তাৰ পাছতো মিঠাই বিতৰণ কৰি ৰিপুন বৰাই কয়–ৰাজ্যসভাত আমি জয়লাভ কৰাটো নিশ্চিত৷ ৰাজ্যসভাত নিৰ্বাচনত জয়লাভ কৰাটো নিশ্চিত বাবেই মিঠাই বিতৰণ কৰিছোঁ৷ ইফালে প্ৰদেশ কংগ্ৰেছৰ সভাপতি ভূপেন বৰাইয়ো ৰিপুন বৰা জয়লাভ কৰাটো নিশ্চিত বুলি দাবী কৰিছে৷ তেওঁ কয়–ৰিপুন বৰা ইতিমধ্যে সাংসদ হৈছে৷ কাৰণ বিৰোধীৰ ৪৩ বিধায়কৰ সমৰ্থন তেওঁ লাভ কৰিছে৷ সেই বাবে দলৰ ফালৰ পৰা তেওঁক মিঠাই বিতৰণ কৰিবলৈ কৈছোঁ৷ ইফালে, নিলম্বিত কংগ্ৰেছৰ বিধায়ক শশীকান্ত দাসে বিজেপিক ভোট দিম বুলি ৰাজহুৱাভাৱে মন্তব্য কৰাৰ পাছত আন এজন কংগ্ৰেছ বিধায়ক আফতাব উদ্দিন মোল্লা মুখ্যমন্ত্ৰী হিমন্ত বিশ্ব শৰ্মাৰ প্ৰশংসাত পঞ্চমুখ হৈ পৰিছে৷ অৱশ্যে তেওঁ ৰাজ্যসভাৰ কোন প্ৰাৰ্থীক ভোট দিব সেই সন্দৰ্ভত একো কোৱা নাই৷ উল্লেখ্য, কংগ্ৰেছৰ ৪/৫ বিধায়কে ওলোটা মাৰিব বুলি ৰাজহুৱাভাৱে মন্তব্য কৰিছে এ আই আই ইউ ডি এফৰ সভাপতি সাংসদ বদৰুদ্দিন আজমলে৷‘‘ৰাজ্যসভাত বৈতৰণী পাৰ হ’বলৈ ৰিপুন বৰাই যিমানেই মিঠাই বিতৰণ কৰিলেও সফল নহয়৷ ৰিপুন বৰাই হাৰাটো নিশ্চিত৷ ৰিপুন বৰাই মিত্ৰজোঁটৰ প্ৰাৰ্থীতকৈ দহটা ভোট কম পাব৷ ৰিপুন বৰাই পৰাজিত হোৱাৰ পিছত বিতৰণ কৰা মিঠাইবোৰ এনেই যাব৷ মিঠাইবোৰ ঘূৰায়ো নাপাব৷ ৰিপুন বৰাই বিতৰণ কৰা মিঠাইবোৰ তিতা মিঠাই হৈ যাব৷”–এইদৰে মন্তব্য কৰে সংবাদ মাধ্যমৰ আগত ভৱানীপুৰ বিধানসভা সমষ্টিৰ বিধায়ক ফনীধৰ তালুকদাৰে আজি ভৱানীপুৰত আগন্তুক ৰাজ্যসভাৰ নিৰ্বাচনত বিৰোধী প্ৰাৰ্থী ৰিপুন বৰাক কটাক্ষ কৰি৷ বিধায়ক ফনীধৰ তালুকদাৰে লগতে কয় যে–‘‘বিৰোধীয়ে যিমানেই বিধায়ক সকলক হোটেলত থোৱা ৰাজনীতি কৰক বা আমেৰিকাত থৈ ফ্লাইটেৰে ভোট দিবলৈ আনিলেও সফল নহ’ব৷ যিয়ে য’ত ভোটদান কৰিব কৰিবই৷ আগতেই খাটাং হৈ গৈছে৷ কাৰণ মানুহৰ মন, মগজু, শৰীৰ কিনিব নোৱাৰে বিৰোধীয়ে৷ কোন কোন বিৰোধীয়ে মিত্ৰজোঁটক ভোট দিব আমাৰ জনা আছে৷