ডিজিটেল সংবাদ, নাজিৰাঃ ড্ৰাগছৰ ঘাটিত পৰিণত হৈছে নাজিৰা মহকুমা। বিগত এটা সপ্তাহৰ ভিতৰতে ইজনৰ পিছত সিজন ড্ৰাগছ সৰবৰাহকাৰী জালত পৰিছে নাজিৰা আৰক্ষীৰ। শেহতীয়াকৈ নাজিৰা মহকুমা আৰক্ষী বিষয়া শুভলক্ষ্মী দত্তৰ নেতৃত্বত নাজিৰা, শিমলুগুৰি, লাকুৱা আৰক্ষী থানা সৰব হৈ পৰা দেখা গৈছে ড্ৰাগছৰ বিৰূদ্ধে। তিনিদিন পূৰ্বে চাৰিজনকৈ যুৱকক কৰায়ত্ত কৰাৰ পাছত বৃহস্পতিবাৰে আৰু দুজন ড্ৰাগছ সৰবৰাহকাৰীক আটক কৰিবলৈ সক্ষম হোৱা নাজিৰা আৰক্ষী৷ আৰক্ষীৰ অভিযানত এইবাৰ পুনৰ আৰু চাৰিজন ড্ৰাগছ সৰবৰাহকাৰী জালত পৰিছে। কালি নিশাৰ ভাগত নাজিৰা মহকুমা আৰক্ষী বিষয়া শুভলক্ষ্মী দত্তৰ নেতৃত্বত বিহুবৰ, লাকুৱা আৰু শিমলুগুৰি আৰক্ষীয়ে অভিযান চলাই শিমলুগুৰি আৰক্ষী থানাৰ অন্তৰ্গত লোণপুৰীয়া গাঁৱৰ পৰা মইনা কলিতা, ধিতাইপুখুৰীৰ পৰা মাধুৰ্য দত্ত আৰু নাজিৰা ৰজাপুলৰ পৰা ৰোহিত বড়ো নামৰ তিনিজনৰ লগতে এগৰাকী মহিলাকো গ্ৰেপ্তাৰ কৰিবলৈ সক্ষম হয়। তেওঁ লোকৰ পৰা ১ঃ৮৩ গ্ৰাম সন্দেহজনক ব্ৰাউন ছুগাৰ জব্দ কৰে আৰক্ষীয়ে।