ডিজিটেল সংবাদ, ঢেকীয়াজুলিঃ ঢেকীয়াজুলি শংকৰদেৱ শিশু নিকেতনৰ ছাত্ৰ হৃদম ঠাকুৰীয়াই হাইস্কুল শিক্ষান্ত পৰীক্ষাৰ ফলাফলত ৰাজ্যৰ ভিতৰত প্ৰথম স্থান দখল কৰি শ্বহীদ নগৰী ঢেকীয়াজুলিলৈ সুনাম কঢ়িয়াই আনিলে ৷ অসম মাধ্যমিক শিক্ষা পৰিষদে সোমবাৰে পুৱা ১০ বজাত হাইস্কুল শিক্ষান্ত পৰীক্ষাৰ ফলাফল ঘোষণা কৰাৰ পিছতেই নিকেতনখনত উৎসৱমুখৰ পৰিৱেশ দেখিবলৈ পোৱা যায় ৷ হৃদম ঠাকুৰীয়াৰ এই সাফল্যত নিকেতনখনৰ ছাত্ৰ-ছাত্ৰী আৰু আচাৰ্যসকল আনন্দিত হৈ পৰে ৷ আচাৰ্য-আচাৰ্যাসকলে ছাত্ৰ-ছাত্ৰী আৰু অভিভাৱকসকলৰ মাজত মিঠাই বিতৰণ কৰা দেখা যায় ৷ 

নিকেতনৰ প্ৰাংগনত পুৱাৰে পৰা উৎসৱমুখৰ পৰিৱেশ বিৰাজ কৰিছে ৷ প্ৰকাশিত ফলাফল অনুসৰি ঢেকীয়াজুলি শংকৰদেৱ শিশু নিকেতনৰ ছাত্ৰ হৃদম ঠাকুৰীয়াই ৬০০ নম্বৰৰ ভিতৰত ৫৯৬ নম্বৰ লাভ কৰে ৷ মেধাৱী ছাত্ৰজনে অসমীয়াত ৯৮, ইংৰাজীত ১০০, সাধাৰণ গণিতত ১০০, ঐচ্ছিক গণিতত ১০০, সমাজ বিজ্ঞানত ১০০ আৰু বিজ্ঞানত ৯৮ নম্বৰ লাভ কৰে ৷ ছাত্ৰ হৃদম ঠাকুৰীয়াৰ এই সাফল্যৰ পিছত ঢেকীয়াজুলি শংকৰদেৱ শিশু নিকেতনৰ প্ৰধান আচাৰ্য গিৰীন্দ্ৰ চন্দ্ৰ শৰ্মা আৰু উপ-প্ৰধান আচাৰ্য ৰাজীৱ দাসে সাংবাদিকৰ আগত কয় যে শিক্ষা পদ্ধতি ভাল হ’লে ফলাফলো ভাল হ’ব ৷  আজি হৃদম ঠাকুৰীয়াৰ ফলাফলে নিকেতনখনৰ সুনাম বৃদ্ধি কৰিলে ৷ তেওঁলোকে জানিবলৈ দিয়া মতে, হৃদম ঠাকুৰীয়াই নিকেতনখনত অংকুৰ শ্ৰেণীৰ পৰা অধ্যয়ন কৰিছিল ৷ অংকুৰ শ্ৰেণীত পাঠদান কৰা শ্ৰেণী আচাৰ্যা ববিতা শইকীয়াই কয় যে হৃদম ঠাকুৰীয়া সদায় নিকেতনলৈ আহিছিল ৷ ছাত্ৰজন কোনো দিনে শ্ৰেণীত অনুপস্থিত নাছিল ৷ ছাত্ৰজন আত্ম বিশ্বাসী আছিল ৷ সংগীতৰ লগতে কুইজ,তৰ্ক, আকস্মিক বক্তৃতা, কবিতা আবৃত্তি আদিত ছাত্ৰজন বৰ আগ্ৰহী ৷ নিকেতনত অনুষ্ঠিত তৰ্ক, কুইজ,আকস্মিক বক্তৃতা আদি প্ৰতিযোগিতাত অংশ গ্ৰহণ কৰি হৃদম ঠাকুৰীয়াই প্ৰথম স্থান দখল কৰিছিল বুলি আচাৰ্যাগৰাকীয়ে জানিবলৈ দিয়ে। ঢেকীয়াজুলি অঞ্চলৰ বিভিন্ন অনুষ্ঠান-প্ৰতিষ্ঠানে আয়োজন কৰা শৈক্ষিক প্ৰতিযোগিতাত হৃদম ঠাকুৰীয়াই ভাগ লৈছিল আৰু শ্ৰেষ্ঠ বিবেচিত হৈছিল বুলি আচাৰ্যাগৰাকীয়ে জানিবলৈ দিয়ে ৷