![image](https://aamarasom.com/uploads/posts/hbs.jpg1688975960.jpg)
কৃষকৰূপী ৰাহুলক কটাক্ষ হিমন্তবিশ্বৰ
‘আমাৰ অসম’ৰ বিশেষ প্ৰতিবেদন, ১০ জুলাইঃ সামান্য সুযোগ পালেই ৰাহুল গান্ধীক কটাক্ষ কৰিবলৈ নেৰা অসমৰ মুখ্যমন্ত্ৰী হিমন্ত বিশ্ব শৰ্মাই এইবাৰ কৃষকৰূপী ৰাহুল গান্ধীক তীব্ৰ ব্যংগ কৰিছে৷ তেওঁ আনকি দেশৰ অন্নদাতা অৰ্থাৎ কৃষকসকলক ভেঙুচালি নকৰিবলৈ ৰাহুল গান্ধীক আহ্বান জনাইছে৷ উল্লেখ্য, হাৰিয়ানাৰ ছোনিপটত কংগ্ৰেছৰ নেতা ৰাহুল গান্ধীয়ে শনিবাৰে মাদিনা নামৰ এখন গাঁৱৰ পথাৰত বোকাত নামি কৃষকৰ সৈতে একেলগে ভূঁই ৰুই থকাৰ ফটো দেশৰ সংবাদ মাধ্যমত ভাইৰেল হৈ পৰিছিল৷ আনকি ছ’চিয়েল মিডিয়াটো এই ফটোখন শনিবাৰে বিয়পি পৰিছিল৷ দেওবাৰে অসমৰ মুখ্যমন্ত্ৰী হিমন্ত বিশ্ব শৰ্মাই টুইটাৰত এটা ভিডিঅ’ আপলোড কৰি ৰাহুল গান্ধীয়ে পথাৰৰ বোকাত নমাৰ সময়ৰ সম্পূৰ্ণ পৰিৱেশটো তুলি ধৰে৷ ৰাহুল গান্ধীয়ে কেৱল ফটো তুলি প’জ দিয়াৰ বাবে হাৰিয়ানাৰ পথাৰৰ বোকাত নমা বুলি হিমন্ত বিশ্ব শৰ্মাই প্ৰতিপন্ন কৰাৰ চেষ্টা কৰে৷ সেই ভিডিঅ’টোত দেখা গৈছে, ৰাহুল গান্ধীয়ে হাৰিয়ানাৰ মাদিনা নামৰ গাঁওখনত খেতিয়কৰ সৈতে একেলগে পথাৰত ভুঁই ৰোৱাৰ সময়ত তেওঁৰ ফটো ল’বলৈ চাৰিওফালে বহুকেইটা কেমেৰা আছিল৷ হিমন্ত বিশ্ব শৰ্মাৰ মতে ৰাহুল গান্ধীয়ে দেশবাসীক তেওঁ কৃষকৰ সৈতে থকা বুলি প্ৰতীয়মান কৰিবলৈ লগত এদল কেমেৰামেনো লৈ গৈছিল৷ টুইটাৰত হিমন্ত বিশ্ব শৰ্মাই কংগ্ৰেছ নেতা ৰাহুল গান্ধীক কটাক্ষ কৰি লিখে – ‘ৰাজকুমাৰৰ হঠাতে পথাৰত নামিবলৈ মন গ’ল৷ পিছে ইয়াৰ আঁৰৰ কাহিনী জানিলেহে হাঁহি উঠা৷ তোমাৰ ফটো আৰু ভিডিঅ’ টীম লৈ ফটো উঠাৰ উৎসাহ থাকিলেও ভগৱানৰ শপত, আমাৰ অন্নদাতাৰ মৰ্যাদা হ্ৰাস নকৰিবা৷ নিজৰ অভীস্পা সিদ্ধিৰ বাবে কৃষক সাজি আন কৃষকক এনেদৰে টানি আজুৰি নিয়াতো নিন্দনীয় কথা৷’ ইপিনে, একে ভিডিঅ’ বিজেপিৰ চৰকাৰী টুইটাৰ হেণ্ডলতো আপলোড কৰা হৈছে৷ তাত ৰাহুল গান্ধীক ‘ফটোজীৱি’ বুলি ব্যংগ কৰা হৈছে৷ বিজেপিৰ টুইটাৰত লিখা হৈছে কেমেৰাজীৱি কৃষক ৰাহুল গান্ধী বুলি৷ কেৱল দেশবাসীক দেখুৱাবৰ বাবেই ৰাহুল গান্ধীয়ে এনেদৰে ফটোগ্ৰাফাৰ আৰু ভিডিঅ’গ্ৰাফাৰ লৈ নাটক কৰা বুলি কোৱা হৈছে৷ উল্লেখ্য, শনিবাৰে হাৰিয়ানাৰ ছোনিপটৰ মাদিনা নামৰ গাঁওখনলৈ যোৱা ৰাহুল গান্ধীয়ে গাঁওবাসীৰ সৈতে আঢ়ৈ ঘণ্টা সময় কটায়৷ তেওঁ কৃষকসকলৰ সৈতে সেইখন গাঁৱতে দুপৰীয়াৰ আহাৰো গ্ৰহণ কৰে আৰু পথাৰত দক্ষ কৃষকৰ দৰে ট্ৰেক্টৰেৰে হাল বায়৷ স্বাভাৱিকতে সেই সময়ত ৰাহুল গান্ধীৰ এই অভিযান ‘কাভাৰ’ কৰিবলৈ যোৱা সাংবাদিকেৰে গাঁওখন ভৰি পৰিছিল৷ তেওঁলোকে ৰাহুল গান্ধীৰ গাঁৱত কৰা পদক্ষেপ পোনপটীয়াকৈ সম্প্ৰচাৰ কৰিছিল৷ সেই সময়তে টিভিৰ সাংবাদিক তথা ফটোগ্ৰাফাৰৰ সৈতে একেলগে কোনোৱে ভিডিঅ’ সংগ্ৰহ কৰিছিল৷ সেই ভিডিঅ’ টুইটাৰত আপলোড কৰি বিজেপিৰ নেতাই ৰাহুল গান্ধীক কটাক্ষ কৰিছে৷