‘আমাৰ অসম’ৰ বিশেষ প্ৰতিবেদন, ১২ জুলাইঃ আমাৰ শক্তিৰ মূল উৎস সূৰ্যত সম্প্ৰতি ঘটি থকা উপৰ্যুপৰি বিস্ফোৰণৰ ফলত প্ৰশান্ত মহাসাগৰ আৰু আমেৰিকাত ‘ৰেডিঅ’ ব্লেকআউট’ৰ সৃষ্টি হৈছে৷ দেওবাৰে হোৱা শেহতীয়া বিস্ফোৰণটোৰ পৰা নিৰ্গত শক্তি সূৰ্যৰ পৰা বহু লক্ষ কিলোমিটাৰ গতিত সৌৰজগতৰ গ্ৰহৰ দিশে ধাবিত হয় আৰু এতিয়ালৈকে জানিব পৰা মতে ই পৃথিৱীৰ ভয়ংকৰ ক্ষতিসাধন কৰিছে৷ কিয়নো, মাৰ্কিন তথ্য অনুসৰি এই বিস্ফোৰণৰ পৰা নিৰ্গত শক্তিয়ে আমেৰিকাৰ ৰেডিঅ’ যোগাযোগ, বৈদ্যুতিক পাৱাৰ গ্ৰীড আৰু নেভিগেচন সংকেতক ক্ষতিগ্ৰস্ত কৰিছে৷ ই মহাকাশযান আৰু মহাকাশচাৰীৰ ভয়ংকৰ ক্ষতি কৰিব পাৰে বুলি আশংকাৰ সৃষ্টি হৈছে৷ এই বিস্ফোৰণৰ ফলত সূৰ্যত যি ‘ছানস্পট’ সৃষ্টি হৈছে, তাৰ আকাৰ পৃথিৱীৰ সাতগুণ৷ নাছা আৰু মাৰ্কিন অ’চেন এণ্ড এটমস্ফিয়েৰিক এডমিনিষ্ট্ৰেছনৰ পৰ্যবেক্ষণত এই ঘটনা ধৰা পৰিছে৷ তেওঁলোকে জনোৱা মতে বিগত মাহত সূৰ্যত এনে বিস্ফোৰণৰ ফলত ১৬০ টা ভিন ভিন ‘ছানস্পট’ সৃষ্টি হৈছে৷ যেতিয়াৰ পৰা বিজ্ঞানীয়ে এনে বিস্ফোৰণৰ তথ্য সংগ্ৰহ কৰিবলৈ সক্ষম হৈছে, তাৰ ভিতৰত এই সংখ্যা সৰ্বাধিক৷ এই ‘ছানস্পট’ হৈছে সূৰ্যত সৃষ্টি  হোৱা কৃষ্ণগহ্বৰ, বিজ্ঞানীয়ে ইয়াক সূৰ্যৰ  কলংক বুলিও অভিহিত কৰিছে৷ এই কৃষ্ণগহ্বৰত তাপমাত্ৰা একেবাৰে হ্ৰাস হৈ যায় আৰু চুম্বকীয় ক্ষেত্ৰ সলনি হৈ যায়৷ বিস্ফোৰণৰ ফলত সূৰ্যৰ পৰা ‘ছ’লাৰ ফ্লেয়াৰ’ বা জ্বলন্ত অংশ সৌৰমণ্ডলত বিচ্ছুৰিত হয়৷ এই ‘ছ’লাৰ ফ্লেয়াৰ’ৰ প্ৰভাব আহি পৰে পৃথিৱীত৷ তাৰ ফলতে মাৰ্কিন আৰু প্ৰশান্ত মহাসাগৰত ‘ৰেডিঅ’ ব্লেক আউট’ৰ সৃষ্টি হৈছে, যি ৰেডিঅ’ যোগাযোগ বৈদ্যুতিক পাৱাৰগ্ৰীড আৰু নেভিগেচন সংকেতৰ ক্ষতিসাধন কৰিছে৷