‘আমাৰ অসম’ৰ গুৱাহাটীৰ প্ৰতিবেদক, ২৪ আগষ্টঃ সমগ্ৰ বিশ্বতে চমক সৃষ্টি কৰি অৱশেষত চন্দ্ৰপৃষ্ঠত অৱতৰণ কৰিলে ভাৰতীয় মহাকাশ বিজ্ঞান সংস্থা চমুকৈ ইছৰ’ৱে প্ৰেৰণ কৰা চন্দ্ৰযান-৩৷ যুগান্তকাৰী ইতিহাস ৰচি চন্দ্ৰৰ দক্ষিণ মেৰুত চন্দ্ৰযান-৩ৰ অৱতৰণৰ লগে লগে চন্দ্ৰৰ ভূ-পৃষ্ঠক লৈ পুনৰ চৰ্চা লাভ কৰা দেখা গৈছে৷    ইণ্টাৰনেটতো চন্দ্ৰত মাটি ক্ৰয়ৰ অনুসন্ধানে এতিয়া ট্ৰেণ্ডিঙত উঠিছে৷ কিন্তু সঁচাকৈ জানো চন্দ্ৰত মাটি ক্ৰয় কৰিব পাৰি৷ শুনিলে আচৰিত যেন লাগিলেও মাত্ৰ ৪২ ইউএছ ডলাৰতে চন্দ্ৰৰ বিক্ৰী হৈ আছে মাটি৷ এটা মাৰ্কিন সংস্থাই অনলাইনত চন্দ্ৰৰ মাটি বিক্ৰী কৰি আহিছে৷ বিভিন্নজেন নিজৰ লগতে বিবাহ বাৰ্ষিকী, সন্তানৰ জন্মদিন আদিত চন্দ্ৰত মাটি ক্ৰয় কৰি পঞ্জীয়ন প্ৰমাণ-পত্ৰ আপোনজনক উপহাৰ দি আহিছে৷ এনে খবৰে সংবাদ শিৰোনামো দখল কৰিছে৷ আমেৰিকাৰ তিনি প্ৰাক্তন ৰাষ্ট্ৰপতিৰ লগতে বলীউডৰ কিং খান শ্বাহৰুখ খান আৰু প্ৰয়াত অভিনেতা সুশান্ত সিং ৰাজপুতৰ নামতো আছে চন্দ্ৰত মাটি৷ অৱশ্যে চন্দ্ৰৰ মাটিৰ অঞ্চল বিশেষে দাম বেলেগ বেলেগ৷ বে অৱ ৰেইনব’, ছী অৱ ৰেইনছ, লেক অৱ ড্ৰিমছ, ছী অৱ চেৰিনিটী আদি বিভিন্ন নামযুক্ত স্থানৰ পৰা পচন্দ অনুসৰি মাটি ক্ৰয় কৰিব পাৰি৷ অৱশ্যে অনলাইনত সংস্থাটোৱে ভাৰ্ছুৱেলী চন্দ্ৰৰ মাটি বিক্ৰী কৰিলেও বাস্তৱত সেই মাটিৰ গৰাকী আপুনি হ’ব নোৱাৰে৷ ১৯৬৭ চনৰ ‘আউটাৰ স্পেচ ট্ৰিটি’ অনুসৰি কোনো ৰাষ্ট্ৰ বা ব্যক্তিয়ে চন্দ্ৰ অথবা আন গ্ৰহত নিজৰ অধিকাৰ সাব্যস্ত কৰিব নোৱাৰে৷ বিশ্বৰ কল্যাণৰ বাবে চন্দ্ৰত অধ্যয়ন চলাব পাৰে যদিও চন্দ্ৰত  মালিকীস্বত্ব সাব্যস্ত কৰিব নোৱাৰে৷ ছোভিয়েট ইউনিয়ন, আমেৰিকা¸ যুক্তৰাষ্ট্ৰই স্বাক্ষৰ কৰা বাহ্যিক মহাকাশ সন্ধি নামেৰে জনাজাত এই সন্ধিত ভাৰতৰ লগতে ১০৯খন দেশেও স্বাক্ষৰ কৰিছে৷ ১৯৬৯ চনতো ৰাষ্ট্ৰসংঘই ‘মুন এগ্ৰিমেণ্ট’ নামেৰে এখন চুক্তি স্বাক্ষৰ হৈছিল৷ এই চুক্তিতো চন্দ্ৰত কেৱল মানৱজাতিৰ কল্যাণৰ বাবে পৰীক্ষা-নিৰীক্ষাৰ সন্মতি দিয়া হৈছিল৷ অৱশ্যে এই চুক্তিত ভাৰত, ফ্ৰান্সসহ মাত্ৰ ১১খন ৰাষ্ট্ৰইহে স্বাক্ষৰ কৰে৷ ৰাষ্ট্ৰসংঘৰ এই চুক্তিৰ পাছতেই আমেৰিকাৰ ‘লুনাৰ এম্বেচি’ নামৰ সংস্থাটোৰ স্বত্বাধিকাৰী ডেনিছ হোপে ১৯৮০ চনত চন্দ্ৰৰ ভূমি আৰু খনিজ সম্পদৰ মালিকীস্বত্ব বিচাৰি ৰাষ্ট্ৰসংঘলৈ পত্ৰ প্ৰেৰণ কৰিছিল৷ কিন্তু ৰাষ্ট˜সংঘৰ পৰা এই পত্ৰৰ কোনো উত্তৰ লাভ নকৰাত ইয়াকে ৰাষ্ট্ৰসংঘৰ সন্মতি হিচাপে ধৰি লৈ নিজকে গেলেক্টিক চৰকাৰৰ অধ্যক্ষ ঘোষণা কৰি ডেনিছ হোপে চন্দ্ৰৰ মাটি বিক্ৰী কৰি আহিছে৷ সেই অনুসৰি দি লুনাৰ ৰেজিষ্ট্ৰী নামৰ ৱেবছাইটৰ জৰিয়তে বিশ্বৰ যিকোনো ব্যক্তিয়ে আবেদন কৰি চন্দ্ৰৰ মাটি ক্ৰয় কৰিব পাৰে৷ ৱেবছাইটত প্ৰয়োজনীয় নথি-পত্ৰ দি নিৰ্দিষ্ট ভূমি পচন্দ কৰাৰ পাছতেই মাটি ক্ৰয় কৰিব পাৰিব৷ প্ৰতিষ্ঠানটোৱে মাটি ক্ৰয় কৰাৰ প্ৰমাণ-পত্ৰও প্ৰদান কৰে আবেদনকাৰীক৷ চন্দ্ৰৰ মাটিৰ প্ৰতি একৰত দাম হৈছে ন্যূনতম ৩৭.৫০ মাৰ্কিন ডলাৰ৷ অৰ্থাৎ ভাৰতীয় মূল্য হিচাপত চন্দ্ৰৰ এক একৰ মাটিৰ দাম হৈছে ৩,০৯৪ টকা৷ ৫০০ একৰতকৈ অধিক মাটি ক্ৰয় কৰিলে ইএমআইৰ জৰিয়তেও ধন পৰিশোধ কৰিব পাৰিব৷ ‘লুনাৰ এম্বেচি’ নামৰ সংস্থাটোৰে বৰ্তমানলৈ চন্দ্ৰৰ ৬১ কোটি ১০ লাখ একৰ মাটি বিক্ৰী কৰি ধন অৰ্জন কৰিছে৷ বলীউডৰ কিং খান শ্বাহৰুখ খানকো ইতিপূৰ্বে জন্মদিনৰ উপহাৰ হিচাপে অষ্ট্ৰেলিয়াৰ এগৰাকী মহিলা অনুৰাগীয়ে চন্দ্ৰৰ মাটি উপহাৰ দিছে৷ প্ৰয়াত অভিনেতা সুশান্ত সিং ৰাজপুতে ২০১৮ চনৰ ২৫ জুনত চন্দ্ৰৰ ভূমি ‘মাংস্কোডি সাগৰ’ৰ পৰা এক একৰ মাটি ক্ৰয় কৰিছিল৷ অভিনেতাজনে সেই সময়ত ৪২.৫ মাৰ্কিন ডলাৰ অৰ্থাৎ ভাৰতীয় মূল্যত ৩,৪৩০ টকা পৰিশোধ কৰি এই ভূমি ক্ৰয় কৰিছিল৷ আমেৰিকাৰ প্ৰাক্তন ৰাষ্ট্ৰপতি জৰ্জ ডব্লিই বুশ্ব, জিম্মী কাৰ্টাৰ আৰু ৰণাল্ডো ৰেগানে চন্দ্ৰৰ ভূমি ক্ৰয় কৰিছিল৷