‘আমাৰ অসম’ৰ ষ্টাফ ৰিপ’ৰ্টাৰ, ২৮ ফেব্ৰুৱাৰীঃ ‘অসমত তৰুণ গগৈ এণ্ড হিজ চনছ প্ৰাইভেট লিমিটেড আৰু দিল্লীত গান্ধী নেহৰু ফেমিলী কোম্পানীৰাজ  চলাই থকাটোৱেই কংগ্ৰেছৰ উদ্দেশ্য৷ অসমত গৌৰব গগৈ, দিল্লীত ৰাহুল গান্ধীৰ সংস্থাপনেই দলটোৰ লক্ষ্য৷’ –এই মন্তব্য মন্ত্ৰী জয়ন্তমল্ল বৰুৱাৰ৷ মঙলবাৰে সাংবাদিকৰ আগত এনেদৰে মন্তব্য কৰি বৰুৱাই কয়–‘কংগ্ৰেছত ধুমুহা আহিয়েই আছে৷ এই ধুমুহাই কংগ্ৰেছক ভাঙি-চিঙি চুৰমাৰ কৰিব৷’ ইফালে যোৰহাট লোকসভা সমষ্টিৰ ক্ষেত্ৰত আজিয়েই দলীয় বিষয়ববীয়াৰে আলোচনা কৰি নিশালৈ প্ৰতিবেদন দাখিল কৰা হ’ব বুলিও বৰুৱাই সাংবাদিকক জানিবলৈ দিয়ে৷ মুখ্যমন্ত্ৰীৰ সুৰতেই সুৰ মিলাই বৰুৱাই কয়–এতিয়ালৈকে আমি চাৰে এঘাৰখন আসন পোৱাটো চূড়ান্ত হৈছে৷ আমাৰ লক্ষ্য ১৪৷ কিন্তু আঢ়ৈখন আসন লাভ কৰাটো বৰ কষ্টকৰ হ’ব৷ যত খিলঞ্জীয়া ভূমিপুত্ৰই জয়লাভ কৰা অসুবিধা আছে, সেইকেইখনেই আঢ়ৈখন আসন৷’ মুছলমান বিবাহ আৰু বিবাহ বিচ্ছেদ আইন সন্দৰ্ভত কৰা মন্তব্যৰ প্ৰতিক্ৰিয়া প্ৰকাশ কৰিব বৰুৱাই কয়–‘আজমল-ওৱেচি সকলোৱে মুছলমান সকল পিছপৰি থকাটো বিচাৰে৷ ওৱেচিয়ে আইনখনক লৈ ভুল ব্যাখ্যা দিছে৷ ওৱেচিয়ে কোৱাৰ দৰে মুছলমানৰ নিকাহ এই আইনে বন্ধ কৰা নাই৷’