‘আমাৰ অসম’ৰ গুৱাহাটীৰ প্ৰতিবেদক, ১১ এপ্ৰিলঃ অসমত লোকসভা নিৰ্বাচনৰ প্ৰথম পৰ্যায়ৰ ভোটগ্ৰহণৰ পাছতেই অনুষ্ঠিত হ’ব নাগৰিকত্ব সংশোধনী আইনৰ (কা) বিৰুদ্ধে উচ্ছতম ন্যায়ালয়ত ৰুজু হোৱা গোচৰৰ শুনানি৷ নৰেন্দ্ৰ মোদী চৰকাৰে অসমকে ধৰি দেশৰ বিভিন্ন ঠাইত হোৱা প্ৰতিবাদ নেওচি বিগত ১১ মাৰ্চত ‘কা’ৰ বিধি প্ৰস্তুত কৰাৰ বিৰোধিতা কৰি অসমৰ বিভিন্ন দল-সংগঠন তথা ব্যক্তি বিশেষে সৰ্বোচ্ছ ন্যায়ালয়ত গোচৰ ৰুজু কৰিছিল৷ ‘কা’ক লৈ কেন্দ্ৰীয় চৰকাৰৰ ১১ মাৰ্চৰ জাননীৰ আইনী বৈধতাক প্ৰত্যাহ্বান জনাই তথা বিধি বলৱৎকৰণত স্থগিতাদেশ বিচাৰি ৰুজু কৰা সকলো গোচৰৰে ৯ এপ্ৰিল, মঙলবাৰে শুনানিৰ দিন ধাৰ্য কৰিছিল উচ্ছতম ন্যায়ালয়ে৷ সৰ্বোচ্ছ ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুড়, ন্যায়াধীশ জে বি পাৰডিৱালা আৰু ন্যায়াধীশ মনোজ মিশ্ৰৰ তিনিজনীয়া খণ্ড বিচাৰপীঠত গোচৰটো মঙলবাৰে দিনৰ ২  বজাত শুনানিৰ বাবে তালিকাভুক্ত হৈছিল যদিও শেষ মুহূৰ্তত শুনানি বাতিল হৈছিল৷ ‘কা’ক লৈ ৰুজু হোৱা এই গোচৰসমূহৰ পৰৱৰ্তী শুনানিৰ দিন সৰ্বোচ্ছ ন্যায়ালয়ে ২৩ এপ্ৰিল নিৰ্ধাৰণ কৰিছে৷ বুধবাৰে সন্ধিয়া সৰ্বোচ্ছ ন্যায়ালয়ৰ তালিকাত ২৩ এপ্ৰিলত ‘কা’ গোচৰৰ শুনানিৰ দিন অন্তৰ্ভুক্ত হৈছে৷