নতুন দিল্লী, ২৪ মে’: জাৰ্মান সাহিত্যিক জেনী এৰ্পেনবেক আৰু অনুবাদক মাইকেল হফমেনে চলিত বৰ্ষৰ আন্তঃৰাষ্ট্ৰীয়  বুকাৰ বঁটা লাভ কৰিছে৷ জেনী এৰ্পেনবেকলৈ তেওঁৰ ব্যক্তিগত আৰু ৰাজনৈতিক উপন্যাস ‘কাইৰছ’ৰ বাবে এইবাৰৰ বুকাৰ বঁটা আগবঢ়োৱা হৈছে৷ আনহাতে একেখন উপন্যাসৰ জাৰ্মানী অনুবাদৰ বাবে মাইকেল হফমেনেও বুকাৰ জিনিবলৈ সক্ষম হৈছে৷ সেই অনুসৰি বঁটাটোৰ সৈতে আগবঢ়োৱা মুঠ ধনৰাশি দুয়োৰে মাজত সমানে ভগাই দিয়া হ’ব৷ উল্লেখ্য যে বুকাৰৰ দৰে সন্মান লাভ কৰা এৰ্পেনবেক হৈছে জাৰ্মানীৰ প্ৰথমগৰাকী সাহিত্যিক৷  মঙলবাৰে লণ্ডনত আয়োজিত এক অনুষ্ঠানত এই বঁটা ঘোষণা কৰা হয়৷ 

উল্লেখ্য যে ‘কাইৰছ’ নামৰ উপন্যাসখন এৰ্পেনবেকে এগৰাকী বয়োজ্যেষ্ঠ সাহিত্যিক আৰু এজন ছাত্ৰৰ মাজত হোৱা প্ৰেমৰ সম্পৰ্কক লৈ লিখিছে৷ ৫৭ বছৰীয়া এৰ্পেনবেকৰ জন্ম হৈছিল পূব বাৰ্লিনত৷ এৰ্পেনবেকৰ উপন্যাসখনত পূব ৰ্জামানীৰ বিলুপ্তিৰ সময়ত কেনেদৰে এগৰাকী সাহিত্যিকৰ সৈতে এজন ছাত্ৰৰ মাজত প্ৰেমৰ সম্পৰ্ক গঢ়ি উঠিছিল সেই বিষয়ে বৰ্ণনা কৰা হৈছে৷ লগতে সেই সময়ত পূব জাৰ্মানীত দেখা দিয়া ৰাজনৈতিক পৰিৱৰ্তনৰ বিষয়েও উল্লেখ কৰা হৈছে৷ এৰ্পেনবেকৰ মতে, উপন্যাসখনৰ পৰিকল্পনা আছিল তেওঁৰ বহুদিনীয়া৷ অৱশেষত সম্পূৰ্ণ কৰিবলৈ সক্ষম হোৱা উপন্যাসখনে বুকাৰৰ দৰে আন্তঃৰাষ্ট্ৰীয় সন্মান লাভ কৰাটো তেওঁৰ বাবে সৌভাগ্যৰ বিষয় বুলি উল্লেখ কৰিছে৷ আনহাতে প্ৰথমবাৰৰ বাবে এগৰাকী পুৰুষ অনুবাদক হিচাপে বুকাৰ লাভ কৰি গৌৰৱ অনুভৱ কৰা বুলি উল্লেখ কৰিছে হফমেনে৷ তেওঁ কয় যে  মই অতি ভাগ্যৱান যে জেনী এৰ্পেনবেকৰ দৰে সাহিত্যিকৰ উপন্যাস অনুবাদৰ দায়িত্ব লাভ কৰিছিলোঁ৷ তেওঁ ইয়াৰ বাবে এৰ্পেনবেকৰ প্ৰতি কৃতজ্ঞতা প্ৰকাশ কৰে৷  উল্লেখ্য যে হফমেনে ইয়াৰ পূৰ্বে ১৯৯৫ চনত  অনুবাদ কৰ্মৰ বাবে একাধিক বঁটা লাভ কৰিবলৈ সক্ষম হৈছিল৷