এইবাৰ নাবাৰ্ডৰ পৰা ৬৩৪ কোটি টকা ঋণ ল’ব দিছপুৰে

‘আমাৰ অসম’ৰ মহানগৰ সংবাদ, ৮ জুন: মুখ্যমন্ত্ৰী ড॰ হিমন্ত বিশ্ব শৰ্মাৰ কেবিনেটে বৃহস্পতিবাৰে পুনৰ নাবাৰ্ডৰ পৰা ৬৩৪ কোটি ৩৫ লাখ টকাৰ ঋণ লোৱাৰ সিদ্ধান্ত গ্ৰহণ কৰে৷ ৰাজ্যৰ আন্তঃগাঁথনি উন্নীতকৰণৰ নামত কেবিনেটে এই ঋণৰ প্ৰস্তাৱত অনুমোদন জনায়৷ ৰাজ্য চৰকাৰে ইয়াৰ পূৰ্বে ৪ এপ্ৰিলত এক হাজাৰ কোটি, ৩০ এপ্ৰিলত এহাজাৰ কোটি আৰু ২৮ মে’ত এহেজাৰ কোটি টকাৰ ঋণ লৈছিল৷ চৰকাৰখনে চলিত বিত্তীয় বৰ্ষ আৰম্ভ হোৱাৰ পৰা বৰ্তমানলৈকে ৪ বাৰকৈ ঋণ ল’বলগীয়া হৈছে৷ ঋণৰ ওপৰত ঋণ লৈ ৰাজ্যখনক অৰ্থনৈতিকভাৱে কোঙা কৰি পেলাইছে মুখ্যমন্ত্ৰীয়ে৷ ইয়ে বিজেপি চৰকাৰৰ আমোলত অসমৰ অৰ্থনীতিৰ লাওলোৱা অৱস্থা উদঙাই দিছে৷ শুকুৰবাৰে অভিযোগ উত্থাপন কৰে আম আদমী পাৰ্টিৰ ৰাজ্যিক সভাপতি ডাঃ ভবেন চৌধুৰীয়ে৷ উল্লেখ্য যে অসম চৰকাৰে বৰ্তমানলৈকে লোৱা ঋণৰ পৰিমাণে ৰ লাখ ৫৩ হাজাৰ কোটি টকা অতিক্ৰম কৰিছে৷ ড॰ হিমন্ত বিশ্ব শৰ্মাৰ চৰকাৰে বছৰি প্ৰায় ২১ হাজাৰ ৫২৫ কোটি টকাৰ ঋণ লৈছে৷ অসমক দেশৰ ৫খন উন্নত ৰাজ্যৰ তালিকাত অন্তৰ্ভুক্ত কৰিব বিচৰা মুখ্যমন্ত্ৰীক আমাৰ প্ৰশ্ন-মুখ্যমন্ত্ৰী, কোনো ধৰণৰ উৎপাদনমুখী অৰ্থনীতি অবিহনে মাথোঁ ঋণ লৈ চৰকাৰ চলাব পাৰিনে? এইদৰে ৰাজ্যবাসীৰ মূৰৰ ওপৰত বিশাল পৰিমাণৰ ধাৰৰ বোজা জাপি দি অসমৰ উন্নয়ন সম্ভৱনে? ৰাজ্যৰ সামগ্ৰিক বিকাশৰ স্বাৰ্থত উৎপাদনমুখী অৰ্থনৈতিক আঁচনি গ্ৰহণ কৰিবলৈ আম আদমী পাৰ্টিৰ ৰাজ্যিক সভাপতি ডাঃ ভবেন চৌধুৰীয়ে মুখ্যমন্ত্ৰী ড॰ হিমন্ত বিশ্ব শৰ্মাক আহ্বান জনায়৷ উল্লেখ্য, ৰাজ্যৰ গড়কাপ্টনী, জল সম্পদ আৰু মহিলা সৱলীকৰণ আৰু শিশু কল্যাণৰ ক্ষেত্ৰত আন্তঃগাঁথনি উন্নীতকৰণৰ নামত নাবাৰ্ডৰ পৰা ঋণ লোৱাৰ সিদ্ধান্ত গ্ৰহণ কৰিছে মুখ্যমন্ত্ৰী ড॰ হিমন্ত বিশ্ব শৰ্মা মন্ত্ৰীসভাই৷