![image](https://aamarasom.com/uploads/posts/cvb.jpg1721553771.jpg)
‘কা’ বিক্ষোভত নিহত ৫জনৰ সন্দৰ্ভত মানৱ অধিকাৰৰ তদন্ত দাবী
‘আমাৰ অসম’ৰ ষ্টাফ ৰিপ’ৰ্টাৰ, ২১ জুলাইঃ ‘কা’ বিৰোধী আন্দোলনৰ পঞ্চ শ্বহীদক লৈ সৰৱ হৈ পৰে যোৰহাট লোকসভা সমষ্টিৰ সাংসদ গৌৰৱ গগৈ৷ উক্ত ঘটনা সন্দৰ্ভত তদন্ত বিচাৰি ৰাষ্ট˜ীয় মানৱ অধিকাৰ আয়োগলৈ পত্ৰ প্ৰেৰণ কৰে সাংসদ গগৈয়ে৷ পত্ৰখনত সাংসদজনে কয়– নাগৰিকত্ব সংশোধনী আইন (কা) গৃহীত হোৱাৰ পাছতে ‘কা’বিৰোধী আন্দোলনৰ প্ৰতি সমৰ্থন জনাই ৰাজপথলৈ ওলাই অহা লোকক নিৰ্বিচাৰে গুলী চলাই হত্যা কৰা ঘটনা সন্দৰ্ভত এইখন মোৰ দ্বিতীয় চিঠি৷ সংসদত নাগৰিকত্ব সংশোধনী আইন গৃহীত হোৱাৰ পাছত দেশজুৰি প্ৰতিবাদৰ জোৱাৰ উঠিছিল৷
অসমৰ জনতাই ‘কা’ৰ বিৰুদ্ধে শান্তিপূৰ্ণভাৱে আন্দোলন কৰিছিল৷ এই আইনখনে অসম চুক্তি ভংগ কৰাৰ লগতে ৰাষ্ট্ৰীয় নাগৰিকপঞ্জী অৰ্থহীন কৰিলে৷ এই আন্দোলনৰ সমৰ্থনত ওলাই অহা নিৰীহ লোকৰ ওপৰত বৰ্বৰোচিতভাৱে গুলীচালনা কৰাৰ ফলত ছেম ষ্টেফৰ্ড, দীপাঞ্জল দাস, আব্দুল আলিম, ঈশ্বৰ নায়ক আৰু দ্বিজেন্দ্ৰ পাংগিঙে মৃত্যুবৰণ কৰিবলগীয়া হ’ল৷ ১৭ বছৰীয়া ছেম ষ্টেফৰ্ডৰ পৰিয়ালে অভিযোগ কৰিছে যে ছেমক নিচেই ওচৰৰ পৰা মূৰত গুলীয়াই হত্যা কৰা হৈছে৷ কিন্তু দুৰ্ভাগ্যজনক কথা যে এই ঘটনাৰ চাৰি বছৰ পাছতো জগৰীয়া কোন বিচাৰ নহ’ল৷ মোৰ আহ্বান–এই ঘটনা সন্দৰ্ভত আৰক্ষীৰ তদন্ত কি পৰ্যায়ত আছে সেই সন্দৰ্ভত অৱগত কৰোৱাৰ লগতে ৰাজ্যখনৰ কৰ্তৃপক্ষক উক্ত ঘটনা সন্দৰ্ভত বিহীত ব্যৱস্থা গ্ৰহণ কৰক৷