আজিকালি বহুতকে প্ৰায়েই ডায়েবেটিছত ভোগা বুলি শুনিবলৈ পোৱা যায়৷ ডায়েবেটিছত আক্ৰান্ত হ’লে দেহত কলেষ্টেৰ’ল, উচ্ছ ৰক্তচাপৰ লগতে বিভিন্ন সমস্যাই দেখা দিয়ে৷ বিশেষকৈ ডায়েবেটিছত ভোগা লোকৰ উচ্ছ ৰক্তচাপৰ সমস্যা হোৱাৰ আশংকা বাঢ়ে৷ তেজত  ইনছুলিনৰ মাত্ৰা কমিলেই এনে সমস্যা হয়৷ সেয়ে  ডায়েবেটিছ নিয়ন্ত্ৰণত ৰখাটো অত্যন্ত জৰুৰী৷ তেজত শৰ্কৰাৰ মাত্ৰা কমোৱাৰ বাবে  চিকিৎসকৰ পৰামৰ্শ লোৱাৰ লগতে কেতবোৰ খাদ্য খায়ো  ডায়েবেটিছ নিয়ন্ত্ৰণত ৰাখিব পৰা যায়৷ উল্লেখা কৰা হ’ল কোনবোৰ খাদ্যৰে  ডায়েবেটিছ নিয়ন্ত্ৰণ কৰিব পাৰি–

(১) কলঃ আয়াৰলেণ্ডৰ ডাবলিন বিশ্ববিদ্যালয়ৰ এক গৱেষণামতে তেজত শৰ্কৰাৰ পৰিমাণ নিয়ন্ত্ৰণৰ বাবে কল খুবেই কাৰ্যকৰী৷  ডায়েবেটিছত ভোগা বহুতেই কল খোৱাৰ পৰা এৰাই চলে৷ কিন্তু গৱেষকৰ মতে কলে  ডায়েবেটিছ ৰোগীৰ কোনো ক্ষতি নকৰে৷

(২) বাদামঃ প্ৰ’টিন, ভিটামিন, খনিজ উপাদান সমৃদ্ধ বাদামে  ডায়েবেটিছ নিয়ন্ত্ৰণত ৰখাৰ লগতে কলেষ্টেৰ’ল আৰু প্ৰদাহজনিত সমস্যাৰ পৰা সুৰক্ষিত কৰি ৰখাত সহায় কৰে৷ তেজত ইনচুলিনৰ মাত্ৰা  বঢ়োৱাৰ বাবেও বাদাম খাব পাৰে৷

(৩) তিতা কেৰেলাঃ তিতা কেৰেলাক ডায়েবেটিছৰ মহৌষধ বুলি কোৱা হয়৷ সেয়ে হয়তো চিকিৎসকেও ডায়েবেটিছ ৰোগীক দৈনিক তিতা কেৰেলা খোৱাৰ পৰামৰ্শ আগবঢ়ায়৷ তিতা কেৰেলাই তেজত শৰ্কৰাৰ মাত্ৰা কমায়৷

(৪) মেথিগুটিঃ পুৱাই উঠি মেথি তিয়াই ৰখা এগিলাচ পানী খাব পাৰিলে ডায়েবেটিছ ৰোগীয়ে উপকাৰ পায়৷ মেথিৰ সৈতে হালধি গুড়ি আৰু আমলখিৰ গুড়ি মিহলাই পানীত তিয়াই ৰাখিলে আৰু বেছি উপকাৰ পোৱা যায়৷ 

(৫) আমলখিঃ শৰীৰ সুস্থ ৰাখিবলৈ প্ৰাচীন কালৰে পৰা আমলখিৰ ব্যৱহাৰ হৈ আহিছে৷ চুলি আৰু ছালৰ বাবে আমলখি খুবেই উপকাৰী৷ ডায়েবেটিছ নিয়ন্ত্ৰণৰ ক্ষেত্ৰতো আমলখিয়ে সমানেই কাম কৰে৷