'আমাৰ অসম'ৰ বৰভাগৰ প্ৰতিবেদক, ৮ জানুৱাৰীঃ নলবাৰীত হাতীৰ খেদাত প্ৰাণৰক্ষা কৰিবলৈ দৌৰি এজন ছাত্ৰ গুৰুতৰভাৱে আঘাতপ্ৰাপ্ত হয়। বুধবাৰে পুৱা হাতীৰ খেদাত গুৰুতৰভাৱে আঘাতপ্ৰাপ্ত হোৱা ছাত্ৰজন হৈছে কটাহকুছি গাঁৱৰ গৌতম বড়ো৷

ছাত্ৰজনক ততাতৈয়াকৈ নলবাৰীৰ এখন চিকিৎসালয়ত ভৰ্তি কৰোৱা হয়। শেহতীয়াকৈ হাতীৰ জাকটো বন বিভাগে খেদি পঠাইছিল যদিও জাকৰ পৰা বিচ্ছিন্ন হোৱা এটা হাতীয়ে পুনৰ স*ন্ত্ৰা*স চলাই আহিছে নলবাৰী আৰু বাক্সা জিলাৰ বিভিন্ন প্ৰান্তত৷

দুদিন পূৰ্বে নলবাৰীৰ সীমান্তৱৰ্তী উত্তৰ বৰশিৰালত হাতীৰ আক্ৰমণত গুৰুতৰভাৱে আঘাতপ্ৰাপ্ত হৈ বৰ্তমান চিকিৎসালয়ত জীৱন মৃত্যুৰে যুঁজি আছে এগৰাকী মহিলা৷ তাৰ পিছত আজি পুনৰ হাতীটোৱে খেদি আহে ছাত্ৰজনক। হাতীৰ আক্ৰমণৰ পৰা নিজকে ৰক্ষা কৰিবলৈ পলাবলৈ চেষ্টা কৰা মুহূৰ্ততে উজুটি পৰি গুৰুতৰভাৱে আঘাতপ্ৰাপ্ত হয় ছাত্ৰজন৷