মণিপুৰত শান্তিৰ সুযোগ

৯ এপ্ৰিলত মণিপুৰৰ মুখ্যমন্ত্ৰী এন বীৰেন সিঙে পদত্যাগ কৰাৰ লগে লগে মণিপুৰত শান্তি স্থাপন প্ৰক্ৰিয়াত আশাৰ ৰেঙণিৰ সৃষ্টি হৈছে৷ ২০২৩ চনৰ মে’ৰ পৰা মণিপুৰত মূলতঃ মেইটেই আৰু কুকি-জো সম্প্ৰদায়ৰ মাজত সংঘটিত গোষ্ঠী-সংঘৰ্ষৰ পৰিপ্ৰেক্ষিতত ২০৫ জনতকৈও অধিক লোকে প্ৰাণ হেৰুওৱাৰ লগতে প্ৰায় ৭০ হাজাৰ লোক স্থানান্তৰিত হ’ব লগা হৈছে৷ ৰাজ্যখনৰ দুয়োটা সম্প্ৰদায়ৰ মাজত সম্পদৰ ওপৰত নিজৰ অধিকাৰ সাব্যস্তকৰণ আৰু ৰাজনৈতিক ক্ষমতা আহৰণৰ প্ৰতিযোগিতাৰ ফলত এনে গোষ্ঠীগত সংঘাতে মূৰ দাঙি উঠিছিল৷ মণিপুৰত সংঘটিত এই সংঘাতৰ সময়ত মুখ্যমন্ত্ৰীয়ে ৰাজ্যখনৰ আইন-শৃংখলা পৰিস্থিতি নিয়ন্ত্ৰণ কৰাৰ ক্ষেত্ৰত বিফল হোৱা আৰু পক্ষপাতিত্বমূলক আচৰণ কৰাৰ অভিযোগ উত্থাপন কৰি প্ৰধান বিৰোধী দল কংগ্ৰেছ আৰু ৰাজ্যখনৰ নাগৰিক সমাজে মুখ্যমন্ত্ৰীৰ পদত্যাগ দাবী কৰি আহিছিল৷ কিন্তু নিজৰ দলৰ শীৰ্ষ নেতৃত্বৰ আশীৰ্বাদপুষ্ট হোৱাৰ বাবে মুখ্যমন্ত্ৰী বীৰেন সিঙে অহৰহ উত্থাপিত এনে দাবীকো আওকাণ কৰি নিৰ্বিঘ্নে শাসন চলাই যাবলৈ সক্ষম হৈছিল৷ কিন্তু সময় বাগৰাৰ লগে লগে নিজৰ দলৰ ভিতৰৰ পৰাই মুখ্যমন্ত্ৰীৰ বিৰুদ্ধে বিধায়কসকলৰ ক্ষোভৰ উদ্‌গীৰণ হ’বলৈ ধৰিলে৷ পৰিস্থিতি এনে পালেগৈ যে, মণিপুৰৰ ৬০জনীয়া বিধানসভাৰ কেৱল ২২জন বিধায়কহে মুখ্যমন্ত্ৰীৰ সমৰ্থনত থিয় হৈছিল৷ তদুপৰি আগন্তুক বিধানসভাৰ অধিৱেশনত কংগ্ৰেছ দলে বীৰেন সিঙৰ বিৰুদ্ধে অনাস্থা প্ৰস্তাৱ আনিবলৈ প্ৰস্তুত হোৱাৰ সময়তে নিজৰ দলৰ ভিতৰতে এলাগি হৈ চৰকাৰৰ নিয়ন্ত্ৰণ হেৰুৱাই পেলোৱাৰ ফলত তেওঁৰ সন্মুখত পদত্যাগ কৰাৰ বাহিৰে আন কোনো বিকল্প নাছিল৷

মুখ্যমন্ত্ৰী এন বীৰেন সিঙে পদত্যাগ কৰাৰ ফলত ৰাজ্যখনত শান্তি প্ৰতিষ্ঠাৰ প্ৰক্ৰিয়া ত্বৰান্বিত হ’ব বুলি বহুতেই মত পোষণ কৰিছে৷ এইক্ষেত্ৰত অৱশ্যে নেতৃত্বৰ পৰিৱৰ্তনৰ উপৰি বহুমুখী দৃষ্টিভংগীৰো প্ৰয়োজন হ’ব৷ সংঘৰ্ষত লিপ্ত দুয়োটা সম্প্ৰদায়ৰ মাজত প্ৰথমতে বিশ্বাসহীন পৰিস্থিতিৰ উপশম ঘটাব লাগিব৷ ইয়াৰ বাবে পৰৱৰ্তী ৰাজনৈতিক নেতৃত্বই উভয় সম্প্ৰদায়কে বিশ্বাসত লৈ আগবাঢ়িব লাগিব৷ তদুপৰি, উভয় পক্ষৰ মাজত ন্যায সম্পদৰ সঠিক বিতৰণ, উপযুক্ত ৰাজনৈতিক প্ৰতিনিধিত্ব আৰু সামাজিক আৰু জীৱনৰ নিৰাপত্তাৰ দৰে দিশত সংবেদনশীলতাৰে মোকাবিলা কৰিব লাগিব৷ এইক্ষেত্ৰত কেন্দ্ৰীয় চৰকাৰৰ ভূমিকা পূৰ্বতকৈ অধিক সবল আৰু দূৰদৰ্শী হ’ব লাগিব৷ মণিপুৰৰ পৰৱৰ্তী ৰাজনৈতিক নেতৃত্ব যাতে অত্যন্ত নিৰপেক্ষ আৰু শান্তি প্ৰতিষ্ঠাৰ প্ৰতি যাতে অধিক দায়বদ্ধ হয়, সেই কথা সুনিশ্চিত কৰিব লাগিব৷ গোষ্ঠীগত সংঘাতৰ সময়ত বৰ্বৰ ঘটনাৰাজিৰে দেশক সমগ্ৰ বিশ্বৰ আগত লজ্জানত কৰাৰ পাছত এতিয়া ৰাজ্যখনত শান্তি প্ৰতিষ্ঠাৰ মূল অন্তৰায়সমূহ আঁতৰি যোৱাৰ ফলত ৰাজ্যখনত শান্তি প্ৰতিষ্ঠাৰ প্ৰক্ৰিয়াটো কিদৰে আগবাঢ়ে তাৰ ওপৰত আন্তঃৰাষ্ট্ৰীয় সম্প্ৰদায় আৰু মানৱ অধিকাৰ সংগঠনসমূহে চোকা নজৰ ৰাখিব৷ এমনেষ্টী ইণ্টাৰনেচনেলে ইতিমধ্যে মতপোষণ কৰিছে যে, এন বীৰেন সিঙৰ পদত্যাগে ৰাজ্যখনত দণ্ডভীতিহীনভাৱে অবাধে সংঘৰ্ষ চলাই থকা চক্ৰটোক ভাঙি পেলোৱাৰ সুযোগ প্ৰদান কৰিছে৷

এন বীৰেন সিঙৰ পদত্যাগ এক উল্লেখযোগ্য পৰিঘটনা হিচাপে পৰিগণিত হ’লেও ৰাজ্যখনৰ সংঘাত নিৰাময়ৰ ক্ষেত্ৰত ই একমাত্ৰ চৰ্ত নহয়৷ নিঃসন্দেহে মুখ্যমন্ত্ৰীৰ পদত্যাগে শান্তি প্ৰতিষ্ঠাৰ প্ৰক্তিয়াটোক নতুন চিন্তা-চৰ্চাৰে আগুৱাই লৈ যোৱাৰ সুযোগ প্ৰদান কৰিছে যদিও প্ৰকৃত আৰু দীৰ্ঘম্যাদী শান্তি তেতিয়াহে প্ৰতিষ্ঠা হ’ব, যেতিয়া এই ক্ষেত্ৰত ইয়াৰ সকলো অংশীদাৰ সমানে জড়িত হ’ব৷ কেন্দ্ৰীয় আৰু ৰাজ্য চৰকাৰে সামগ্ৰিক আলোচনা, সমতাপূৰ্ণ নীতি আৰু সংঘাতৰ বলি হোৱা লোকৰ স্বাৰ্থক অগ্ৰাধিকাৰ দিব লাগিব৷ তদুপৰি, প্ৰশাসন ব্যৱস্থাত স্বচ্ছতা, দায়বদ্ধতা আৰু সংঘৰ্ষত লিপ্ত উভয়পক্ষৰে বৈধ উদ্বিগ্নতাক নিৰাময়ৰ সঠিক পদক্ষেপ গ্ৰহণ কৰি বিশ্বাস গঢ়ি তুলিব লাগিব৷ গতিকে মণিপুৰত স্থায়ী শান্তি প্ৰতিষ্ঠা হ’বনে, নে ৰাজ্যখন অধিক সংকটৰ দিশলৈ আগবাঢ়িব, সেয়া পৰৱৰ্তী সময়তহে অধিক স্পষ্ট হৈ পৰিব৷