এতিয়া কৃষ্ণচূড়া, সোণাৰু ফুলাৰ সময়...

গতিশীল সময়ৰ স’তে ছন্দ মিলাই ঋতু অনুসৰি সলনি হয় প্ৰকৃতিও৷ সময় অনুসৰি প্ৰকৃতিও সেউজীয়া হয়, বান-খৰাং আহে...৷ বসন্ত, শৰৎ, হেমন্ত, শীত, গ্ৰীষ্ম, বৰ্ষা এই প্ৰতিটো ঋতুত নানা ৰূপ লোৱা প্ৰকৃতিয়ে চৌদিশে মায়াময় কৰি এনে সময়তে ডাল ভৰি ফুলে তেজৰঙা কৃষ্ণচূড়া৷ প্ৰকৃতি শুৱনি কৰি থোপাথোপে ওলমে সোণ হালধীয়া সোণাৰু৷  এতিয়া কৃষ্ণচূড়া আৰু সোণাৰু ফুলাৰ বতৰ৷ চৌদিশে তেজৰঙা কৃষ্ণচূড়া আৰু থোপাথোপে হালধীয়া সোণাৰু ফুল ফুলিছে৷ কৃষ্ণচূড়াৰ তলত বহি প্ৰেমিকযুগল প্ৰেম আলাপত মগন হয়৷ কৃষ্ণৰ মূৰত কৃষ্ণচূড়া দৃশ্যমান হোৱাৰ বাবে ৰাধাই তেওঁৰ প্ৰেম পাবলৈ ব্যাকুল হৈছিল বুলি কথিত আছে৷ কেৱল প্ৰেমেই আছেনে কৃষ্ণচূড়াত? প্ৰেমৰ লগতে কৃষ্ণচূড়াত আছে নতুন দিনৰ আশা, জীয়াই থকাৰ স্বপ্ন৷ কৃষ্ণচূড়াৰ জন্ম ক’ত? মূলতঃ ফায়াৰ ট্ৰী আৰু ফ্লাগাবজেণ্ট নামেৰে আফ্ৰিকাৰ দক্ষিণ-পূব উপকূলৰ মাডাগাস্কাৰত জন্মা এই ফুলবিধে ভাৰতত গোলমোহৰ নাম লোৱাৰ উপৰি অসমত ই কৃষ্ণচূড়া হয়৷

ভেবেছিছ গোত্ৰৰ অন্তৰ্ভুক্ত কৰি ৰাখি উদ্ভিদ বিজ্ঞানীয়ে ফুলবিধক ডেলোনিস্ক ৰেজিয়া নাম দিলে৷ কৃষ্ণচূড়া ফুলাৰ সময়তে থোপাথোপে ফুলে সোণাৰু৷ সোণ হালধীয়া ৰঙেৰ সোণাৰুৰ লগতো সংপৃক্ত হৈ আছে আমাৰ প্ৰাণৰ নিৰ্বাস৷ ইংৰাজীত সোণাৰুক ‘ইণ্ডিয়ান লেবাৰ ন্যয়’ বোলাৰ বিপৰীতে বিজ্ঞানীয়ে ফেবেছিছ গোত্ৰতে ৰাখি নামকৰণ কৰিলে কেচিয়া ফিছটলা বুলি৷ ৰজা দুষ্মন্তই মহৰ্ষি কম্ফ মুনিৰ আশ্ৰমত ফুলি থকা সোণাৰুৰ তলতে প্ৰথম দেখিছিল শকুন্তলাক৷ সোণাৰুৰ অপূৰ্ব সৌন্দৰ্যৰে পৰিৱেষ্টিত পৰিৱেশত শকুন্তলাক প্ৰত্যক্ষ কৰিয়েই দুষ্মন্ত ৰজা তেওঁৰ প্ৰেমত পৰি পৰৱৰ্তী সময়ত গন্ধৰ্ব ৰীতি অনুসৰি বিবাহপাশত আৱদ্ধ হয় বুলি বৰ্ণনা কৰি থৈ গৈছে মহাকবি কালিদাসে৷ ‘সোণাৰুৰে হালধীয়া থোপাথোপে ফুল/আইনা দেখি খোপা বান্ধে ৰাধে বিয়াকুল’ বুলি লোকগীতত উল্লেখ থকাৰ বিপৰীতে ‘অন্তৰত বিষণ্ণ এক সেউজীয়া স্তব্ধতা, সোণাৰুৰ অকণমান সোণ-হালধীয়া লৈ গাঁওখনৰ এমূৰত থকা গেজেপনি হাবি এখনৰ পৰা ওলাই আহিছোঁ’ বুলি লিখিছে ‘পাতি সোণাৰুৰ ফুল’ত কবি নীলমণি ফুকনে৷ প্ৰেমৰ আদিম সংজ্ঞাক পুনৰ উদ্বুদ্ধ কৰি এতিয়া ফুলি উঠিছে কৃষ্ণচূড়া, সোণাৰু৷