প্ৰশান্ত কিশোৰৰ প্ৰত্যাখ্যান

‘মোক নহয়, সবল নেতৃত্বৰহে প্ৰয়োজন কংগ্ৰেছক’

আমাৰ অসম,২৭ এপ্ৰিলঃ কংগ্ৰেছ দলত যোগদান কৰাৰ বাবে আগবঢ়োৱা প্ৰস্তাৱ প্ৰত্যাখ্যান কৰিছে দেশৰ ৰাজনীতিৰ চাণক্য বা নিৰ্বাচনী ৰণকৌশলী প্ৰশান্ত কিশোৰে৷ মঙলবাৰে প্ৰশান্ত কিশোৰে টুইট কৰি কেইবাদিনো জল্পনা-কল্পনা চলি থকা বিষয়টো স্পষ্ট কৰি দিয়ে৷ টুইটত তেওঁ কয়– ‘কংগ্ৰেছত যোগদান আৰু ভোটৰ দায়িত্ব গ্ৰহণৰ আহ্বান মই প্ৰত্যাখ্যান কৰিলো৷ মোৰ বিনীত মতামত,গঠনমূলক সংস্কাৰৰ মাধ্যমেৰে অন্তৰ্নিহিত ভিত্তিগত সমস্যাৰ সমাধানৰ বাবে মোতকৈও দলটোৰ অধিক প্ৰয়োজন দৃঢ় নেতৃত্ব আৰু সন্মিলিত সদিচ্ছাৰ৷’প্ৰসংগতঃ উল্লেখযোগ্য,কংগ্ৰেছৰ অন্তৰ্ৱৰ্তীকালীন সভানেত্ৰী ছোনিয়া গান্ধীয়ে পিকে অৰ্থাৎ প্ৰশান্ত কিশোৰক দলটোত যোগদান কৰিবলৈ অনুৰোধ জনোৱা বুলি ৰণদ্বীপ সিং সূৰজেৱালাই টুইটত প্ৰকাশ কৰিছে৷ পিকেই ছোনিয়া গান্ধীৰ অনুৰোধৰ প্ৰতি পোনপটীয়া সঁহাৰি জনোৱাৰ পৰিৱৰ্তে ভাবি চিন্তি উত্তৰ দিব বুলি কৈছিল৷ পিকেৰ সংস্থা আই-পেকৰ এজন সদস্যৰ মতে পিকেই প্ৰথমৰ পৰাই দলত যোগদানৰ প্ৰতি ইচ্ছুক নাছিল৷ তেওঁ বৰং পৰামৰ্শদাতা হিচাপে কংগ্ৰেছৰ হৈ কাম কৰিবলৈ ইচ্ছা প্ৰকাশ কৰিছিল৷ তেওঁৰ অনুঘটকৰ ভূমিকা পচন্দ কৰিছিল,যাতে সকলো বিৰোধী দলক বিজেপিৰ বিৰুদ্ধে একগোট কৰিব পাৰে৷ তদুপৰি পিকেই সদায় স্বাধীনভাৱে কাম কৰাৰ পক্ষপাতী৷ তেওঁ পেছাদাৰ,ৰাজনীতিক নহয়৷ ৰাজনীতিক কলা-কৌশল তেওঁ জানিলেও সেয়া যোগ্যজনৰ দ্বাৰা প্ৰয়োগ কৰোৱাতহে সিদ্ধহস্ত,নিজে সম্পাদন কৰাত নহয়৷ কিয়নো এসময়ত পিকেই নিতীশ কুমাৰৰ জেডি [ইউ]দলত যোগদান কৰিছিল যদিও উপ-সভাপতিৰ পদ লাভ কৰিও তেওঁ ৰাজনীতিত সফল নহ’ল৷ সেই সকলো পৰিস্থিতি চিন্তা কৰিয়েই তেওঁ কংগ্ৰেছৰ প্ৰস্তাৱ  প্ৰত্যাখ্যান কৰে৷ কিয়নো মুকলিভাৱে কাম কৰি তেওঁ বিগত সময়ত মমতা বেনাৰ্জীৰ তৃণমূল কংগ্ৰেছ আৰু তামিলনাডুত ডি এম কে তথা অন্ধপ্ৰদেশত ৱাই এছ আৰ কংগ্ৰেছক বিপুল ভোটত বিজয়ী হোৱাত সহায় কৰিবলৈ সমৰ্থ হৈছে৷ পিকেই কংগ্ৰেছতো একেই ভূমিকা বিচাৰে৷