এঞ্জিঅ’প্লাষ্টি সম্পন্ন, সাৱধানে থাকিব লাগিব সৌৰভ গাংগুলী

আমাৰ অসম, ০৫ জানুৱাৰীঃ দেওবাৰে হৃদযন্ত্ৰৰ এঞ্জিঅ’প্লাষ্টি সম্পন্ন হৈ যোৱা ভাৰতীয় ক্ৰিকেট ব’ৰ্ডৰ সভাপতি সৌৰভ গাংগুলীয়ে জীৱনৰ পৰৱৰ্তী সময়খিনি অতি সাৱধানে কটাব লাগিব৷ সৌৰভ গাংগুলীৰ কৰ’নাৰি আৰ্টাৰিত এঞ্জিঅ’প্লাষ্টি সম্পন্ন কৰা হৈছে৷ এঞ্জিঅ’প্লাষ্টি হৈছে এবিধ শল্য চিকিৎসা যাৰ জৰিয়তে হৃদপিণ্ডৰ  পেশীলৈ ৰক্ত সৰবৰাহ কৰা ধমনী বা ৰক্তনলীসমূহৰ পথ খুলি দিয়া হয়৷ কলেষ্ট’ৰেল বা আন আন কাৰণত গেদ জমা হৈ এই ৰক্ত পৰিবাহী ধমনীসমূহ বন্ধ হৈ যায়৷ সেই আঘাতেই হৈছে হাৰ্ট এটেক৷ কেতিয়াবা সেয়া মৃদু, কেতিয়াবা মজলীয়া আৰু কেতিয়াবা ডাঙৰ বা মেজৰ হাৰ্ট এটেক হয়৷  সৌৰভ গাংগুলীৰ ক্ষেত্ৰত হোৱা হাৰ্ট এটেক মৃদু৷ চিকিৎসকে প্ৰথম দিনা এডাল ধমনীৰ বন্ধ হৈ থকা স্থান মুকলি কৰি তাত এটা ষ্টেণ্ট স্থাপন কৰিছে৷ এতিয়া এই ষ্টেণ্টৰ মাজেৰে পূৰ্বৰ দৰে সাৱলীল গতিত তেজৰ চলাচল হৈ আছে৷ সৌৰভ গাংগুলীৰ মুঠতে তিনিডাল ধমনীত ব্লকেজ আছে অৰ্থাৎ বন্ধ হৈ আছে৷ বাকী দুডাল ধমনীও অনুৰূপ ব্যৱস্থাৰে চিকিৎসকে মুকলি কৰি ষ্টেণ্ট স্থাপন কৰিব৷ এনে পৰিস্থিতিত পৰৱৰ্তী সময়ত সৌৰভ গাংগুলী সাৱধান হৈ থাকিব লাগিব৷