ডিজিটেল সংবাদ, গুৱাহাটীঃ জাতি-মাটি-ভেটি ৰক্ষাৰ প্ৰতিশ্ৰুতি দি ক্ষমতালৈ অহা বিজেপি চৰকাৰখনে এপদ এপদকৈ অসমৰ ৰাজহুৱা  সম্পদ বহিঃৰাজ্যৰ পুঁজিপতি, গুজৰাটৰ ব্যৱসায়-প্রতিষ্ঠানক গতোৱা প্ৰতিযোগিতাত নামি পৰিছে। তথাকথিত উন্নয়নৰ নামত চৰকাৰখনে বহিঃৰাজ্যৰ প্ৰতিষ্ঠানক অসমলৈ ৰঙা দলিচাৰে আদৰণি জনাইছে। এই অভিযোগ কৰিছে  আপ, অসমৰ ৰাজ্যিক সমিতিৰ উপ-সভাপতি জিতুল ডেকাই।

শুকুৰবাৰে আপৰ  মুখ্য কাৰ্যালয়ত অনুষ্ঠিত এখন সংবাদ মেলত  জিতুল ডেকাই কয় যে সকলো সা-সুবিধা থকাৰ পিছতো চৰকাৰী বিভাগসমূহো এতিয়া ব্যক্তিগত প্ৰতিষ্ঠানৰ ওপৰত নিৰ্ভৰশীল হব লগা হৈছে। ইতিমধ্যে চৰকাৰী সদিচ্ছাৰ অভাৱত ৰাজহুৱা খণ্ডৰ উদ্যোগ-প্রতিষ্ঠান এফালৰ পৰা ব্যক্তিগতকৰণ হব ধৰিছে। চৰকাৰে ৰাজহুৱা খণ্ডৰ অসম ৰাজ্যিক পৰিবহণ নিগমৰ ২০০খনকৈ ইলেকট্রিক বাছ, পশু চিকিৎসা বিভাগৰ ভ্ৰাম্যমাণ চিকিৎসা গোটক ব্যক্তিগত প্রতিষ্ঠানক গতাবলৈ প্রস্তুতি চলাইছে। শেহতীয়াকৈ এই বিকাশ আৰু উন্নয়নৰ জয়ঢোল বজোৱা বিজেপি চৰকাৰখনে গুৱাহাটীৰ মাজমজিয়াত থকা সৌন্দৰ্যৰ আকৰ স্বৰূপ গুৱাহাটীৰ গৌৰৱ দীঘলীপুখুৰীটোও গতাইছে গুজৰাটৰ ব্যৱসায়ী প্রতিষ্ঠানক। ইচি এইচ টি কংলোমেৰাত প্রাইভেট লিমিটড' নামৰ গুজৰাটৰ আহমেদাবাদৰ প্রতিষ্ঠানটোক দীঘলীপুখুৰীৰ লগতে  তাৰ  পাৰ্ক, ৰেস্তোৰাঁ, নৌকা আদি সকলো ১৫বছৰৰ বাবে আবণ্টন দিছে পর্যটন বিভাগে। এই দীঘলীপুখুৰীৰ পাৰ্ক, ৰেস্তোৰাঁ আদি আগতে এগৰাকী অসমীয়া লোকে চলাইছিল।