‘আমাৰ অসম’ৰ বিশেষ প্ৰতিবেদন, ৩০ মাৰ্চঃ লোকসভা নিৰ্বাচনৰ প্ৰথম পৰ্যায়ৰ ভোটগ্ৰহণলৈ মাজত ২৫ দিন সময় বাকী থকা অৱস্থাত পুনৰ আয়কৰ বিভাগৰ হেঁচাত কাহিল হৈ পৰিছে দেশৰ প্ৰধান বিৰোধী দল কংগ্ৰেছ৷ ইতিপূৰ্বে কংগ্ৰেছৰ দলীয় বেংক একাউণ্ট ফ্ৰীজ কৰা, বলপূৰ্বক একাউণ্টৰ পৰা ১৩৫ কোটিৰো অধিক টকা বাজেয়াপ্ত কৰাৰ পাছত শুকুৰবাৰে আয়কৰ বিভাগে দলটোক অবিলম্বে আয়কৰ বাবদ ১৮শ ২৩ কোটি ৭ লাখ টকা আদায়ৰ নিৰ্দেশ দিছে৷ আয়কৰ বিভাগে প্ৰেৰণ কৰা জাননীত কংগ্ৰেছ দলক জনাইছে যে ২০১৭-১৮ বিত্তীয় বৰ্ষৰ পৰা ২০২০-২১ বিত্তীয় বৰ্ষলৈ আয়কৰ ৰিটাৰ্ণ পৰ্যালোচনা কৰি তেওঁলোকে কংগ্ৰেছ দলক আয়কৰ, ইমান বছৰৰ সূদ আৰু জৰিমনাৰ বাবদ ১৮২৩.০৭ কোটি টকা আদায়ৰ নিৰ্দেশ দিছে৷ আয়কৰ আইনৰ ১৩ (১) নম্বৰ ধাৰা উলংঘা কৰাৰ বাবেই এই পদক্ষেপ গ্ৰহণ কৰা হৈছে বুলি জাননীত জনোৱা হৈছে৷ কেন্দ্ৰীয় আয়কৰ বিভাগৰ এই কাৰ্যত প্ৰতিক্ৰিয়া প্ৰকাশ কৰি দলৰ কোষাধ্যক্ষ অজয় মাকেনে কয়– ‘পুৰণি আৰু ভিত্তিহীন অভিযোগৰ ভিত্তিত আয়কৰ ৰিটাৰ্ণ পূণৰ্মূল্যায়নৰ নামত এইদৰে কংগ্ৰেছ দলক হাৰাশাস্তি কৰা হৈছে৷  এয়া নৰেন্দ্ৰ মোদী চৰকাৰৰ কংগ্ৰেছৰ বিৰুদ্ধে পূৰ্ব পৰিকল্পিত ষড়যন্ত্ৰ৷ যিদিনা উচ্ছতম ন্যায়ালয়ে ইলেক্ট’ৰেল বণ্ড অসাংবিধানিক বুলি খাৰিজ কৰিলে, তাৰ পিছদিনাই আয়কৰ বিভাগ কংগ্ৰেছৰ ওপৰত জপিয়াই পৰিছিল৷ কংগ্ৰেছৰ একাউণ্ট ফ্ৰীজ, বলপূৰ্বক একাউণ্টৰ পৰা টকা আদায় কৰি নিৰ্বাচনত কংগ্ৰেছক আৰ্থিকভাৱে পংগু কৰি দিয়াৰ পৰিকল্পনা কৰিছে মোদী চৰকাৰে৷ সেই পৰিকল্পনা আয়কৰ বিভাগে কাৰ্যকৰী কৰিছে৷’ 

কংগ্ৰেছ দলৰ পুঁজিত ১৪ লাখ টকাৰ হিচাপত খেলিমেলি পাইছিল আয়কৰ বিভাগে৷ দলৰ একাউণ্টত ১৪.৪৯ লাখ নগদ টকা চান্দা দিছিল কংগ্ৰেছ সাংসদে৷ মুঠ ১৯৯ কোটি টকাৰ ০.০৭ শতাংশ নগদ লেনদেনৰ বাবে কংগ্ৰেছ দলক ১০৬% জৰিমনা বিহি ১৩৫ কোটি টকা একাউণ্টৰ পৰা বলপূৰ্বক লৈ গৈছিল আয়কৰ বিভাগে৷ এতিয়া ২০১৭-১৮ বিত্তীয় বৰ্ষৰ উপৰি ৩১ বছৰ পূৰ্বে অৰ্থাৎ ১৯৯৩-৯৪ চনত হোৱা আয়কৰ বিবাদৰ পৰা ২০২০-২১ লৈকে সৰ্বমুঠ ১৮২৩.০৭ কোটি টকা আয়কৰ, সূদ আৰু জৰিমনা বিহা হৈছে কংগ্ৰেছক৷ লোকসভা নিৰ্বাচনৰ প্ৰাকমুহূৰ্তত এয়া বিজেপি চৰকাৰৰ কৰ সন্ত্ৰাস বুলি অভিহিত কৰিছে কংগ্ৰেছ নেতা জয়ৰাম ৰমেশে৷