ছীজনৰ সমাপ্তিৰ পূৰ্বে ইণ্টাৰ মায়ামিলৈ প্ৰত্যাৱৰ্তন ঘটিব মেছিৰ

নতুন দিল্লী, ২৫  আগষ্ট : ছীজন সমাপ্তিৰ পূৰ্বেই ইণ্টাৰ মায়ামিলৈ প্ৰত্যাৱৰ্তন ঘটিব ছুপাৰষ্টাৰ ফুটবলাৰ  লিঅ’নেল মেছিৰ৷ শুকুৰবাৰে এক সংবাদ মেলত এই কথা ঘোষণা  কৰিছে  ইণ্টাৰ মায়ামিৰ মুখ্য প্ৰশিক্ষক টাটা মাৰ্টিনোৱে৷ ১৪ জুলাইত কোপা আমেৰিকাৰ ফাইনেলত কলম্বিয়াৰ বিৰুদ্ধে আৰ্জেণ্টিনাৰ হৈ অংশ লোৱাৰ সময়ত  গোৰোহাত আঘাত পাইছিল মেছিয়ে৷ তেতিয়াৰ পৰাই তেওঁ আমেৰিকাৰ ক্লাবটোৰ হৈ খেলা নাই৷ 

অৱশ্যে,  মেছিৰ কেতিয়া দললৈ প্ৰত্যাৱৰ্তন  ঘটিব সেই বিষয়ে নিৰ্দিষ্টকৈ জনোৱা নাই  মাৰ্টিনোৱে৷  ছীজনৰ অৱশিষ্ট ৯ খন মেচৰ এখনত হ’লেও মেছিৰ প্ৰত্যাৱৰ্তন ঘটিব বুলি তেওঁ কয়৷ প্ৰশিক্ষক  মাৰ্টিনোৱে কয়–‘মেছিৰ কেতিয়া  অনুশীলনলৈ প্ৰত্যাৱৰ্তন ঘটিব মই সঠিককৈ ক’ব নোৱাৰিম৷  কিন্তু  এটা কথা ঠিক যে  সেই দিন বেছি  আঁতৰত নহয়৷ তেওঁৰ অৱস্থা এতিয়া  আগতকৈ যথেষ্ট ভাল৷’