দক্ষিণ আফ্ৰিকা ভ্ৰমণত ভাৰতীয় দলৰ প্ৰশিক্ষকৰ দায়িত্বত লক্ষ্মণ

নতুন দিল্লী, ২৯ অক্টোবৰ: দক্ষিণ  আফ্ৰিকাৰ  বিৰুদ্ধে  অংশ ল’ব লগা আসন্ন টি-টুৱেণ্টী শৃংখলাত  ভাৰতীয় দলৰ মুখ্য প্ৰশিক্ষকৰ দায়িত্বত থাকিব প্ৰাক্তন ক্ৰিকেটাৰ  ভি ভি  এছ  লক্ষ্মণ৷ নৱেম্বৰত ভাৰতীয় দলে ভ্ৰমণটোত চাৰিখনীয়া মেচৰ টি-টুৱেণ্টী শৃংখলাত অংশ ল’ব৷ দক্ষিণ আফ্ৰিকাৰ বিৰুদ্ধে শৃংখলা চলি থকাৰ সময়তে ভাৰতীয় টেষ্ট দল অষ্টে˜লিয়ালৈ ৰাওনা হ’ব৷ সেই দলৰ সৈতে যাব গৌতম গম্ভীৰ৷ সেয়ে তেওঁ দক্ষিণ আফ্ৰিকা ভ্ৰমণৰ পৰা বাহিৰত থাকিব৷ দক্ষিণ আফ্ৰিকা ভ্ৰমণ ভাৰতীয় দলৰ মূল সূচীত  নাছিল৷ কিন্তু বি চি চি  আই আৰু ক্ৰিকেট  দক্ষিণ আফ্ৰিকাৰ মাজৰ আলোচনাৰ মৰ্মে  টি-টুৱেণ্টী শৃংখলাটোৰ আয়োজন কৰা হৈছে৷ ডাৰবান,  গেবেহা, চেঞ্চুৰিয়ন আৰু জোহানেছবাৰ্গত টি-টুৱেণ্টী কেইখন  অনুষ্ঠিত হ’ব ক্ৰমে  ৮, ১০, ১৩ আৰু ১৫ নৱেম্বৰত৷ নৱেম্বৰৰ  চাৰি তাৰিখে ভাৰতীয়  দল দক্ষিণ আফ্ৰিকালৈ ৰাওনা  হোৱাৰ সম্ভাৱনা আছে৷

আনহাতে, ব’ৰ্ডাৰ-গাভাস্কাৰ ট্ৰফীত অংশ লোৱাৰ  বাবে ভাৰতীয় টেষ্ট দল ১০ বা ১১ নৱেম্বৰত  অষ্ট্ৰেলিয়ালৈ ৰাওনা হ’ব৷ সেয়ে দুটা দলৰ বাবে পৃথক প্ৰশিক্ষক ৰখা হৈছে৷ দক্ষিণ আফ্ৰিকা  ভ্ৰমণত লক্ষ্মণৰ  সৈতে  থাকিব নেশ্বনেল ক্ৰিকেট  একাডেমীৰ  ষ্টাফ ছৈৰাজ বহুতুলে, হৃষিকেশ কানিটকাৰ আৰু শুভদীপ ঘোষ৷  এই প্ৰশিক্ষকসকল শেহতীয়াকৈ এছিয়া  ইমাৰ্জিং কাপত  অংশ লোৱা ভাৰত  ইমাৰ্জিং টীমৰ  সৈতে  জড়িত আছিল৷ উল্লেখ্য, সূৰ্যকুমাৰ যাদৱৰ নেতৃত্বত টি-টুৱেণ্টী শৃংখলাৰ বাবে বি চি  চি  আইয়ে ১৫ জনীয়া সদস্যৰ ভাৰতীয়  দল ঘোষণা কৰিছিল ২৫ অক্টোবৰত৷ আই পি এলৰ নিলামৰ পূৰ্বে শৃংখলাটোত নিজৰ শ্ৰেষ্ঠত্ব প্ৰতিপন্ন কৰাৰ সুযোগ পাব ভাৰতীয়  খেলুৱৈসকলে৷