আন এক মাইলষ্টোনৰ অপেক্ষাত কোহলি

চেম্পিয়নছ  ট্ৰফীত ভাৰতৰ আৰম্ভণি প্ৰত্যয়জনক হ’লেও প্ৰথম খেলখন বিৰাট কোহলিৰ বাবে নাছিল সন্তোষজনক৷ বাংলাদেশৰ বিৰুদ্ধে মাত্ৰ ২২ ৰানতে পেভেলিয়নলৈ উভতিবলগীয়া হৈছিল৷ ইয়াৰ বাবে অনুৰাগীৰ কটাক্ষও সহিবলগীয়া হৈছিল৷ এতিয়া সকলোৱে অপেক্ষা কৰিছে পাকিস্তানৰ বিৰুদ্ধে দেওবাৰে হ’বলগীয়া বহু প্ৰতীক্ষিত খেলখনত কোহলিৰ প্ৰদৰ্শন চোৱাৰ বাবে৷ খেলখনত ১৫ ৰান সংগ্ৰহ কৰিলেই এক নতুন কৃতিত্বৰ অধিকাৰী হ’ব টীম ইণ্ডিয়াৰ প্ৰাক্তন অধিনায়কজন৷ সেয়া হৈছে এদিনীয়া ক্ৰিকেটত ১৫ হাজাৰ ৰান৷ এতিয়ালৈকে এদিনীয়া ক্ৰিকেটত কেৱল দুজন ক্ৰিকেটাৰহে ১৪ হাজাৰ অথবা ততোধিক ৰান সংগ্ৰহ কৰিবলৈ সক্ষম হৈছে৷ তেওঁলোক হৈছে শচীন তেণ্ডুলকাৰ আৰু কুমাৰ ছাংগাকাৰা৷ তেণ্ডুলকাৰে ৩৫০টা আৰু ছাংগাকাৰাই ৩৭৮টা ইনিংছত ১৪ হাজাৰ ৰান সম্পূৰ্ণ কৰিছিল৷ দেওবাৰৰ খেলখনত অৱতীৰ্ণ হ’লে সেয়া হ’ব কোহলিৰ কেৰিয়াৰৰ ২৯৯সংখ্যক এদিনীয়া৷ এতিয়ালৈকে ২৮৬টা ইনিংছত তেওঁৰ সংগ্ৰহ ১৩,৯৮৫ ৰান৷ পাকিস্তানৰ বিৰুদ্ধে কোহলিয়ে ১৫ ৰান সংগ্ৰহ কৰিলেই এদিনীয়া ক্ৰিকেটত দ্ৰুততম সময়ত ১৪ হাজাৰ ৰান সংগ্ৰহ কৰা বেটাৰত পৰিণত হ’ব তেওঁ৷

পাকিস্তানৰ বিৰুদ্ধে কোহলিৰ প্ৰদৰ্শন যথেষ্ট উৎসাহজনক৷ ১৬খন এদিনীয়াত সংগ্ৰহ ৬৭৮ ৰান, য’ত আছে তিনিটা শতক৷ পাকিস্তানৰ বিৰুদ্ধেই কোহলি এদিনীয়াৰ দ্ৰুততম ১৪ ৰান সম্পূৰ্ণ কৰাৰ কৃতিত্বৰ অধিকাৰী হ’ব পাৰিবনে? উল্লেখ্য, চেম্পিয়নছ ট্ৰফীত কোহলিয়ে এতিয়ালৈকে ১৩টা ইনিংছত সংগ্ৰহ কৰিছে ৫৫১ ৰান, ৰানৰ গড় হৈছে ৭৮.৭৷ এটা ইনিংছত সৰ্বাধিক ৰান ৯৬৷ টুৰ্নামেণ্টখনত কোহলিৰ নামত আছে পাঁচটা অৰ্ধশতক৷ ২০১৩ চনত পাঁচটা ইনিংছত তেওঁৰ স্ক’ৰ আছিল ১৭৬, ৰানৰ গড় আছিল ৫৮.৭৷