আই পি এলৰ বাবে সাজু কামিন্ছ
আঘাতৰ বাবে অষ্টে˜লিয়াৰ চেম্পিয়নছ ট্ৰফীৰ দলত নাই৷ ক্ৰিকেটৰ পৰা আঁতৰি থাকিবলগীয়া হ’লেও পৰিয়ালৰ সদস্যৰ সান্নিধ্যত সময় অতিবাহিত কৰিবলৈ পাই যথেষ্ট সতেজ অনুভৱ কৰিছে পেট কামিন্ছে৷ আই পি এলৰ সূৰ্বে সম্পূৰ্ণ ফিট হৈ খেলপথাৰলৈ উভতিব পাৰিব বুলিয়েই আশাবাদী তেওঁ৷ এই সন্দৰ্ভত কামিন্ছে কয়–‘পৰিয়ালৰ সদস্যৰ সৈতে ভালদৰে সময় কটাইছো৷ অনুশীলনৰ ব্যস্ততা নাই৷ ভ্ৰমণ কৰিবলগীয়াও নাই৷ ক্ৰিকেট সূচীত ব্যস্ত থাকিলে পৰিয়ালৰ পৰা আঁতৰি থাকিবলগীয়া হয়৷
কিন্তু এইকেইদিন তেওঁলোকৰ সান্নিধ্য উপভোগ কৰিব পাৰিছো৷’ বৰ্তমান ক্ৰিকেটৰ পৰা আঁতৰি থাকিলেও অহা মাহৰ পৰা আৰম্ভ হ’বলগীয়া আই পি এলত খেলাৰ চিন্তা-চৰ্চাও আৰম্ভ কৰিছে কামিন্ছে৷ আঘাত প্ৰায় উপশম হৈছে৷ ছানৰাইজাৰ্ছ হায়দৰাবাদৰ অধিনায়কজনে কয়–‘ অহা সপ্তাহৰ পৰা অনুশীলন আৰম্ভ কৰিব পাৰিম বুলি আশা ৰাখিছো৷ মোৰ শাৰীৰিক অৱস্থা পূৰ্বতকৈ বহু ভাল৷ আই পি এলৰ ববেও সম্পূৰ্ণ সাজু৷’ আই পি এলৰ আৰম্ভণিৰ পৰাই খেলাত আগ্ৰহী কামিন্ছ৷ বিশ্ব টেষ্ট চেম্পিয়নশ্বিপৰ ফাইনেলকো গুৰুত্ব দিছে তেওঁ৷ তেওঁৰ লক্ষ্য ক্ৰমাগত দ্বিতীয়বাৰ অষ্টে˜লিয়াক চেম্পিয়ন কৰোৱা৷ ১১ জুনৰ পৰা আৰম্ভ হ’ব বিশ্ব চেম্পিয়নশ্বিপৰ ফাইনেল৷