ট্ৰাকে ট্ৰাকে নলবাৰীলৈ গৈছে টিংখাঙত উৎপাদিত আলু

'আমাৰ অসম'ৰ টিংখাঙৰ প্ৰতিবেদকঃ ৭৭৪ কোটি টকাৰে নলবাৰীত স্থাপন হোৱা পেপছিকোৰ কেঁচা সামগ্ৰী উৎপাদন হৈছে টিংখাঙত৷ মন্ত্ৰী বিমল বৰাৰ প্ৰচেষ্টাত ৪০০ৰো অধিক কৃষকে এতিয়া টিংখাঙত আৰম্ভ কৰিছে কৃষি বিপ্লৱ৷ টিংখাঙত দিহিংচাং বহুমুখী সমবায় সমিতি লিমিটেড নামৰ গোট গঠন কৰি যোৱা বৰ্ষৰে পৰা টিংখাঙত পেপছিকোৰ বাবে আৰম্ভ কৰা হৈছে আলু খেতি৷ বিগত বৰ্ষৰ দৰে এইবাৰো টিংখাঙত উৎপাদিত আলু প্ৰেৰণ কৰা হৈছে পেপছিকো কোম্পানীলৈ। অসম চৰকাৰৰ দ্বাৰা গঠিত দিহিংচাং বহুমুখী সমবায় সমিতি লিমিটেডৰ উদ্যোগত আৰু পেপছিকো প্ৰাঃ লিমিটেডৰ সহযোগত এইবাৰ টিংখাং বিধানসভা সমষ্টিৰ অন্তৰ্গত দিহিং আৰু দিচাং নদীৰ দাঁতি-কাষৰীয়া উৰ্বৰ কৃষিভূমিত প্ৰায় ২৫০ বিঘা মাটিত আলু খেতি কৰা হৈছে।

প্ৰায় ৪০০ গৰাকী কৃষকে এই আলু খেতি কৰিছে। সম্প্ৰতি ক্ৰমবৰ্ধমান নিবনুৱা সমস্যা আৰু কৰ্মসংস্থাপনহীনতাই ভাৰাক্ৰান্ত কৰা কৰ্মক্ষম যুৱক-যুৱতী,পুৰুষ-মহিলা, খেতিয়কসকলক সংগঠিত কৰি বুঢ়ীদিহিং আৰু দিচাং নদীৰ দাঁতি-কাষৰীয়া প্ৰায় ২৫০ বিঘা পলসুৱা মাটিত আলু খেতি কৰি ৬ লাখ কিলোগ্ৰাম আলু উৎপাদনৰ লক্ষ্য স্থিৰ কৰা হৈছে। টিংখাঙত এতিয়া আৰম্ভ হৈছে কৃষি বিপ্লৱ৷ কৃষকসকল এতিয়া ব্যস্ত আলু চপোৱাত৷ টিংখাঙৰ পৰা দৈনিক ট্ৰাকে ট্ৰাকে এতিয়া নলবাৰীৰ পেপছিকোলৈ পঠোৱা হৈছে আলু৷ কৃষকসকলৰ মুখত বিৰিঙিছে প্ৰাপ্তিৰ আনন্দ আৰু হাঁহি৷