এতিয়াৰে পৰা নিশা বন্ধ থাকিব জিএছ ৰোডৰ একাংশ

‘আমাৰ অসম’ৰ গুৱাহাটীৰ প্ৰতিবেদক, ২ মাৰ্চঃ  এতিয়াৰে পৰা গুৱাহাটীৰ ৰাজপথত যান-বাহন চলাওতে সাৱধান হ’ব৷ বিশেষকৈ জি এছ ৰোডেৰে নিশা যাতায়াত কৰোতে পথ নিৰ্দেশনা মানি চলিব লাগিব৷ ইয়াৰ অন্যথা আপুনি সমস্যাৰ সন্মুখীন হ’ব পাৰে৷ কিয়নো গুৱাহাটীৰ ডাউন-টাউন পইণ্টৰ পৰা ছয়মাইলৈ নিৰ্মাণৰত নতুন উৰণ সেতুখনৰ নিৰ্মাণকাৰ্যৰ বাবে সোমবাৰৰে প্ৰতি নিশাই জি এছ ৰোডত যান-বাহন  চলাচলত ন’ এণ্ট্ৰী জাৰি কৰিছে আৰক্ষী-প্ৰশাসনে৷ উৰণ সেতুখনৰ নিৰ্মাণকাৰ্য চলি থকাত সোমবাৰৰে পৰা অনিৰ্দিষ্ট কালৰ বাবে প্ৰতি নিশাই ১১.৩০ বজাৰ পৰা পুৱা ৪.৩০ বজালৈ ডাউন-টাউন আৰু ছয়মাইলৰ মাজৰ পথছোৱা অৰ্থাৎ জি এছ ৰোডত যান-বাহন চলাচল বন্ধ থাকিব৷ ছয়মাইলৰ পৰা ডাউন-টাউনলৈ জি এছ ৰোডৰ দুয়োটা ফালে পথ বন্ধ কৰাত সৰ্বসাধাৰণ ৰাইজে নিশা ভাগত বিকল্প পথেৰে গন্তব্য স্থানলৈ যাতায়াত কৰিব লাগিব৷ উৰণ সেতুখনৰ নিৰ্মাণ কাৰ্য সম্পূৰ্ণ নোহোৱা পৰ্যন্ত জি এছ ৰোডৰ উক্ত পথছোৱাত যাতায়াত বন্ধ থাকিব৷ ছয়মাইলৰ পৰা ডাউন-টাউনৰ মাজৰ জি এছ ৰোডৰ অংশটোত ন’ এণ্ট্ৰী জাৰি কৰাৰ ফলত কি কি বিকল্প পথেৰে জনসাধাৰণে অহা-যোৱা কৰিব পাৰিব সেই সন্দৰ্ভত গুৱাহাটীৰ যান-বাহন আৰক্ষীয়ে পথ নিৰ্দেশনা জাৰি কৰিছে৷ ডিচিপি (ট্ৰেফিক)ৰ ফালৰ পৰা জাৰি কৰা পথ নিৰ্দেশনা অনুসৰি ছয়মাইল উৰণসেতু আৰু ডাউন টাউনৰ (দুয়োটা ট্ৰেকৰ) মাজত জি এছ ৰোডত সকলো বাহন চলাচল ৩ মাৰ্চৰ পৰা প্ৰতিদিনে নিশা ১১.৩০ বজাৰ পৰা পুৱা ৪.৩০ বজালৈ বন্ধ থাকিব৷

ইয়াৰ ফলত খানাপাৰাৰ ফালৰ পৰা ভি আই পি ৰোড/পাঞ্জাবাৰী ৰোডযজয়ানগৰ পথৰ ফালে অহা সকলো বাহন ছয়মাইল ছাৰ্ভিচ ৰোডৰ মাজেৰে চলাচল কৰিব পাৰিব৷ খানাপাৰাৰ ফালৰ পৰা দিছপুৰ অভিমুখে অহা বাহনবোৰ জয়ানগৰ পথ-বেলতলা বজাৰ ৰোড, বেলতলা ছাৰ্ভে পথ -লাষ্টগেট হৈ যাব পাৰিব৷ আনহাতে পাঞ্জাবাৰীৰ ফালৰ পৰা দিছপুৰ অভিমুখে অহা বাহনবোৰ জয়ানগৰ পথ-বেলতলা বজাৰ ৰোড, বেলতলা-ছাৰ্ভে পথ-লাষ্টগেট হৈ যাব পাৰিব৷ ইফালে,  চচল/আনন্দ নগৰৰ ফালৰ পৰা দিছপুৰ অভিমুখে অহা বাহনবোৰ জয়ানগৰ পথ-বেলতলা বজাৰ ৰোড, বেলতলা-ছাৰ্ভে পথ, লাষ্টগেট হৈ যাব পাৰিব৷ তদুপৰি ৰুক্মিণীগাঁও দিশৰ পৰা দিছপুৰ অভিমুখে যোৱা সকলো বাহনে বেলতলা চাৰ্ভে পথ বা জি এন আৰ চি দিছপুৰ ৰোড হৈ যাব পাৰিব৷ একেদৰে জয়ানগৰৰ ফালৰ পৰা দিছপুৰ অভিমুখে অহা বাহনবোৰে বেলতলা বজাৰ হৈ চলাচল কৰিব পাৰিব৷ গণেশগুৰিৰ ফালৰ পৰা খানাপাৰা অভিমুখে অহা বাহনবোৰ ছুপাৰ মাৰ্কেট ফ্লাইঅভাৰ পইণ্টত লাষ্টগেটৰ ফালে পৰিৱৰ্তন কৰা হ’ব৷ উক্ত পথৰ সকলো বাহনে বেলতলা-বশিষ্ঠ ৰোড হৈ যাব লাগিব৷ ইফালে গণেশগুৰিৰ ফালৰ পৰা ডাউন টাউন ছয়মাইল অভিমুখে অহা সকলো বাহনে ছুপাৰ মাৰ্কেট ফ্লাইঅভাৰৰ ছাৰ্ভিচ ৰোড ল’ব পাৰিব আৰু ডাউন টাউন দ্বাৰকা পথ-আনন্দ নগৰ পথৰ মাজেৰে যাব পাৰিব৷ লাষ্টগেটৰ ফালৰ পৰা ডাউন টাউন অভিমুখে অহা সকলো বাহনে ছুপাৰ মাৰ্কেট ফ্লাইঅভাৰৰ ছাৰ্ভিচ ৰোড লৈ যাব পাৰিব৷