বিশ্বৰ সৰ্বোত্তম শিক্ষানুষ্ঠান মাতৃৰ কোলা
‘আমাৰ অসম’ৰ ডিব্ৰুগড়ৰ প্ৰতিবেদক, ২ মাৰ্চঃ ‘মাতৃৰ কোলাত লাভ কৰা শিক্ষাই হৈছে সৰ্বোত্তম শিক্ষা৷ মাতৃৰ কোলাই হৈছে বিশ্বৰ সৰ্বোত্তম শিক্ষানুষ্ঠান, সৰ্বশ্ৰেষ্ঠ বিশ্ববিদ্যালয়ৰ আটাইতকৈ শ্ৰেষ্ঠ চৌহদ৷’ আজি ডিব্ৰুগড়ত অনুষ্ঠিত হোৱা সদৌ অসম নাৰী সন্থাৰ ২৫সংখ্যক প্ৰতিষ্ঠা দিৱসত উপস্থিত থাকি এই গুৰুত্বপূৰ্ণ মন্তব্য কৰে ভাৰত চৰকাৰৰ বন্দৰ, জাহাজ তথা জলপৰিবহণ মন্ত্ৰী সৰ্বানন্দ সোণোৱালে৷ ডিব্ৰুগড় মহানগৰৰ আউনিআটী শাখা সত্ৰ প্ৰেক্ষাগৃহত আজি অনুষ্ঠিত হোৱা সোণোৱাল-কছাৰী নাৰী সন্থাৰ প্ৰতিষ্ঠা দিৱসত মুখ্য অতিথি হিচাপে উপস্থিত থাকি কেন্দ্ৰীয় মন্ত্ৰী সৰ্বানন্দ সোণোৱালে লগতে কয় যে, এগৰাকী মাতৃৰ পৰাই জীৱনটো আগুৱাই নিয়াৰ বাবে শক্তি, আদৰ্শ, অনু্প্ৰেৰণা পাবলৈ সক্ষম হয়৷ মাতৃক আমি বিশ্বৰ শ্ৰেষ্ঠ গুৰু হিচাপে মানি ল’ব লাগিব৷ নাৰী অবিহনে মানৱ সমাজ আগবাঢ়িব নোৱাৰে৷ নাৰী সমাজে মানৱতা প্ৰতিষ্ঠা কৰাৰ ক্ষেত্ৰত আটাইতকৈ গুৰুত্বপূৰ্ণ ভূমিকা পালন কৰি আহিছে৷ আনহাতে সোণোৱাল জনগোষ্ঠীৰ নাৰী সমাজক উদ্দেশ্যি কেন্দ্ৰীয় মন্ত্ৰী সোণোৱালে আৰু কয়– সোণোৱাল- কছাৰী নাৰী সমাজে নিজৰ শ্ৰেষ্ঠতা প্ৰদৰ্শন কৰিব লাগিব৷ এইক্ষেত্ৰত হিমালয়সদৃশ প্ৰত্যাহ৩ান থাকিবই৷ তাৰ মাজতো নাৰী সমাজ আগবাঢ়িব লাগিব৷ ভগৱান কৃষ্ণই মাতৃৰ গৰ্ভতে ষড়যন্ত্ৰৰ সন্মুখীন হৈছিল৷ কিন্তু সেই ষড়যন্ত্ৰ ওফৰাই তেওঁ আগবাঢ়ি গৈছিল৷ একেটা ভাষণ প্ৰসংগত কেন্দ্ৰীয় মন্ত্ৰী সোণোৱালে কয়, অসমৰ বুকুত থকা জাতি-জনগোষ্ঠীসকল আগবাঢ়ি যাবলৈ হ’লে শিক্ষা-সংস্কৃতি আৰু অধ্যয়নৰ জৰিয়তে আগবাঢ়িব লাগিব৷ চৰিত্ৰৱান, আদৰ্শৱান কৰি তুলিবলৈ অধ্যয়ন কৰিব লাগিব৷ সোণোৱাল সম্প্ৰদায়ৰ নাৰীসকলে বিভিন্ন জনগোষ্ঠীৰ সৈতে ফেৰ মাৰিব পৰাকৈ উঠি অহা প্ৰজন্মক পাকৈত কৰি তুলিব লাগিব৷ নাৰী আৰু পুৰুষে যৌথভাৱে পৰিয়ালক শক্তিশালী কৰাত দায়িত্ব আছে৷
সন্তানক উপযুক্ত হিচাপে গঢ় দিয়াৰ ক্ষেত্ৰত নাৰীৰ অৱদান গুৰুত্বপূৰ্ণ বুলি উল্লেখ কৰি সোণোৱালে লগতে কয়, বহুক্ষেত্ৰত হয়তো নিজৰ মনৰ কথা সন্তানে পিতৃক ক’ব নোৱাৰিব পাৰে৷ কিন্তু সন্তানৰ মৰ্মবেদনা মাতৃয়েহে অনুধাৱন কৰে৷ মাতৃৰ ব্যক্তিত্ব মহান৷ মাতৃৰ ওচৰত কেতিয়াবা ভগৱানো সৰু হৈ পৰে৷ মাতৃৰ উদাৰতা, মহানুভৱতা আমি স্বীকাৰ কৰিবই লাগিব৷ সোণোৱাল সম্প্ৰদায়ক শক্তিশালী কৰিবলৈ হ’লে নাৰীসকলৰ ভূমিকা আছে৷ আমি নিজকে কেতিয়াও পিছপৰা জাতি বুলি ভাবিব নালাগে৷ কষ্ট আৰু সাধনাই আত্মবিশ্বাস বৃদ্ধি কৰে৷ কষ্ট আৰু পৰিশ্ৰম কৰিলেহে সফল হ’ব পাৰি৷ আনহাতে মানৱ সমাজত প্ৰযুক্তিৰ প্ৰভাৱে প্ৰত্যাহ৩ান সৃষ্টি কৰা বুলি উল্লেখ কৰি কয়– প্ৰযুক্তিৰ প্ৰভাৱ পৰিলেও মানৱতাক বিসৰ্জন দিব নালাগে৷ প্ৰযুক্তি আৰু মানৱতাৰ জৰিয়তে আদৰ্শৱান ব্যক্তিত্ব প্ৰতিষ্ঠা লাভ কৰিব পাৰি৷ সমাজখন শক্তিশালী কৰিবলৈ হ’লে মানৱীয় গুণ থাকিব লাগিব৷ সেইখন সমাজে শান্তি প্ৰতিষ্ঠা কৰিব পাৰিব৷ সদৌ অসম সোণোৱাল কছাৰী নাৰী সন্থাৰ সভানেত্ৰী ৰশ্মিৰেখা সোণোৱালৰ পৌৰোহিত্যত অনুষ্ঠিত হোৱা অনুষ্ঠানত সদৌ অসম সোণোৱাল কছাৰী ছাত্ৰ সন্থাৰ সভাপতি দেৱানন্দ চেলেং উপস্থিত থাকি সোণোৱাল কছাৰী জনগোষ্ঠীটোক সামাজিক, অৰ্থনৈতিক, ৰাজনৈতিক তথা শৈক্ষিক দিশত আগবঢ়াই নিবলৈ হ’লে সোণোৱাল জনগোষ্ঠীৰ সকলো জাতীয় সংগঠন সংগবদ্ধ হৈ কাম কৰি যাব লাগিব বুলি উল্লেখ কৰে৷ এই সভাত সোণোৱাল কছাৰী নাৰী সন্থাৰ প্ৰতিষ্ঠা দিৱসৰ অভ্যৰ্থনা সমিতিৰ সভাপতি দীপুৰঞ্জন মাক্ৰাৰী, ডিব্ৰুগড় বিশ্ববিদ্যালয়ৰ প্ৰাধ্যাপিকা ড॰ শ্ৰুতিধাৰা মহন্ত, সোণোৱাল কছাৰী স্বায়ত্তশাসিত পৰিষদৰ প্ৰাক্তন মুখ্য কাৰ্যবাহী দণ্ডী সোণোৱাল, প্ৰাক্তন বিধায়িকা জ্যোৎস্না সোণোৱাল, কুলস্বামী লালোৱাৰী আদিকে ধৰি ভালেসংখ্যক বিশিষ্ট ব্যক্তি উপস্থিত থাকি বক্তব্য প্ৰদান কৰে৷