ঝুমুৰ শেষ, প্ৰাপ্য বিচাৰি চাহ শ্ৰমিকৰ বিক্ষোভ আৰম্ভ

‘আমাৰ অসম’ৰ মহানগৰীৰ প্ৰতিবেদক, ৩ মাৰ্চঃ  বিশ্ব অভিলেখৰ প্ৰাৰম্ভিক প্ৰস্তুতিৰূপে অসম চৰকাৰৰ উদ্যোগত ৰূপায়ণ কৰা ঝুমুৰ কাৰ্যূসচী সামৰণি পৰিল যদিও সমান্তৰালভাৱে আৰম্ভ হ’ল চাহ শ্ৰমিকৰ বিক্ষোভ৷ চাহ শ্ৰমিকৰ দৈনিক মজুৰি বৃদ্ধি কৰা আৰু ভূমিপট্টা দিয়াৰ দাবীত সদৌ ভাৰত চাহ মজদুৰ সংঘৰ উদ্যোগত আজি মহানগৰীৰ চচলৰ ধৰ্ণাস্থলীত চাহ শ্ৰমিকে মহা বিক্ষোভ কাৰ্যসূচী ৰূপায়ণ কৰে৷ প্ৰতিবাদীসকলে বিভিন্ন চৰকাৰ বিৰোধী  শ্লোগান দি ধৰ্ণাস্থলীৰ আকাশ-বতাহ উত্তাল কৰি তোলে৷ বিজেপি চৰকাৰে চাহ জনগোষ্ঠীক প্ৰতাৰণা কৰি অহাৰ অভিযোগ কৰে৷ যদি চৰকাৰে দাবী মানি নলয় তেন্তে পৰৱৰ্তী পৰ্যায়ত অধিক গণতান্ত্ৰিক আন্দোলন গঢ়ি তোলাৰ হুংকাৰ দিয়ে৷ প্ৰতিবাদৰ অন্তত প্ৰতিবাদীসকলে আৰক্ষীৰ জৰিয়তে মুখ্যমন্ত্ৰীলৈ এখন স্মাৰক-পত্ৰ প্ৰেৰণ কৰে৷ সদৌ ভাৰত চাহ মজদুৰ সংঘৰ দাবীসমূহ হ’ল– চাহ শ্ৰমিকৰ দৈনিক মজুৰি ৬৬১ টকালৈ বৃদ্ধি কৰা, বৰাক-ব্ৰহ্মপুত্ৰ ভেলিত সমান মজুৰি প্ৰদান কৰা, ভেটি-মাটিৰ পট্টা প্ৰদান কৰা আদি৷

স্বায়ত্ত শাসনৰ দাবীত গোৰ্খা ছাত্ৰৰ বিক্ষোভ

‘আমাৰ অসম’ৰ মহানগৰীৰ প্ৰতিবেদকঃ  অসমৰ গোৰ্খা লোকসকলৰ সাংবিধানিক সুৰক্ষা প্ৰদানৰ স্বাৰ্থত গোৰ্খা স্বায়ত্ত শাসিত পৰিষদ প্ৰদানৰ দাবী জনাইছে অসম গোৰ্খা ছাত্ৰ সন্থা আৰু গোৰ্খা স্বাযত্ত শাসিত পৰিষদ দাবী সমিতিয়ে৷ সোমবাৰে সংগঠনৰ দুটাৰ যৌথ উদ্যোগত মহানগৰীৰ চচলৰ ধৰ্ণাস্থলীত গোৰ্খা স্বায়ত্ত শাসিত পৰিষদ প্ৰদানকে ধৰি কেইবাটাও দাবীৰ সমৰ্থনত প্ৰতিবাদী কাৰ্যসূচী ৰূপায়ণ কৰা হয়৷ প্ৰতিবাদীকাৰীসকলে নায্য দাবীৰ সমৰ্থনত বিভিন্ন চৰকাৰ বিৰোধী শ্লোগান দি আকাশ-বতাহ উত্তাল কৰি তোলে৷ আজিৰ এই প্ৰতিবাদী কাৰ্যসূচীত অংশগ্ৰহণ কৰি সদৌ অসম গোৰ্খা ছাত্ৰ সন্থাৰ নেতৃবৃন্দই সংবাদ মাধ্যমৰ আগত কয়– ‘আমি চৰকাৰৰ ওচৰত কোনো গোৰ্খা লেণ্ডৰ দাবী কৰা নাই৷ গোৰ্খা ছাত্ৰ সন্থাই ২০০৩ চনৰ পৰা গোৰ্খা স্বায়ত্ত শাসনৰ দাবী জনাই আহিছো৷ ২০০৩ চনৰ পৰা কৰা ধাৰাবাহিক আন্দোলনৰ ফলশ্ৰুতিত প্ৰয়াত মুখ্যমন্ত্ৰী তৰুণ গগৈ চৰকাৰৰ দিনত অৰ্থাৎ ২০১০চনত গোৰ্খা উন্নয়ন পৰিষদ গঠন কৰি দিয়ে৷ কিন্তু যোৱা ৫বছৰে গোৰ্খাসকলৰ ভাষা-সংস্কৃতি বিকাশৰ ক্ষেত্ৰত কোনো ধৰণৰ কাম কৰিব পৰা নাই৷ সেয়ে আমাৰ স্পষ্ট কথা, আমাক গোৰ্খা স্বায়ত্ত পৰিষদ লাগিবই৷’ প্ৰতিশ্ৰুতি দিয়াৰ পিছতো বিজেপি চৰকাৰে গোৰ্খাসকলক স্বায়ত্ত পৰিষদ প্ৰদানৰ ক্ষেত্ৰত চৰম প্ৰতাৰণা কৰি অহাৰ অভিযোগ তোলে গোৰ্খা ছাত্ৰ সন্থাই৷ চৰকাৰে তেওঁলোকৰ দাবী মানি নল’লে পৰৱৰ্তী পৰ্যায়ত তীব্ৰ গণতান্ত্ৰিক আন্দোলন কৰাৰ হুংকাৰ প্ৰদান কৰে প্ৰতিবাদকাৰীসকলে৷ তেওঁলোকে অসমৰ গোৰ্খাসকলৰ সাংবিধানিক সুৰক্ষা প্ৰদানৰ একমাত্ৰ বিকল্প হিচাপে গোৰ্খা স্বায়ত্ত শাসিত পৰিষদ প্ৰদান, ষষ্ঠ অনুসূচিত অঞ্চল টিৰাপ-জাগুন জনজাতীয় আবেষ্টনীৰ অন্তৰ্গত গোৰ্খাসকলৰ ভূমি সমস্যা সমাধান কৰি সুৰক্ষিত শ্ৰেণীৰ মৰ্যাদাৰে জীয়াই থকাৰ নিশ্চিত প্ৰদান কৰা, অসমৰ চিকিৎসা মহাবিদ্যালয়, আভিযান্ত্ৰিক মহাবিদ্যালয়, পশু চিকিৎসা মহাবিদ্যালয় আৰু নাৰ্ছিং মহাবিদ্যালয় সমূহত গোৰ্খা জনগোষ্ঠীৰ ছাত্ৰ-ছাত্ৰীসকলৰ বাবে আসন সংৰক্ষণৰ ব্যৱস্থা গ্ৰহণ কৰা, চিনিয়ৰ ছেকেণ্ডাৰী, মহাবিদ্যালয় আৰু বিশ্ববিদ্যালয়সমূহত নেপালী ভাষা অধ্যয়নৰ সুবিধাৰ বাবে নেপালী ভাষা বিষয় শিক্ষক নিযুক্তিৰ ব্যৱস্থা কৰা আদিৰ দাবী তোলে৷

আজিৰ পৰা এন টি ই পি কৰ্মচাৰীৰ কৰ্মবিৰতি

‘আমাৰ অসম’ৰ মঙলদৈৰ প্ৰতিবেদকঃ  এবছৰ-দুবছৰ নহয়, মাৰাত্মক সোঁচৰা ৰোগ ‘যক্ষ্মা’ দূৰীকৰণৰ বাবে আমি ২৭বছৰে কাম কৰি আহিছোঁ৷ কিন্তু আমাৰ পাঁচ শতাধিক ঠিকাভিত্তিক কৰ্মচাৰীৰ জীৱনৰ কোনো নিৰাপত্তা নাই৷ ইতিমধ্যে অৰ্ধ শতাধিক কৰ্মচাৰী নিজেই যক্ষ্মা ৰোগত আক্ৰান্ত হৈ চিকিৎসা লৈছে৷ ১৮জন সতীৰ্থ কৰ্মচাৰীক চিৰদিনৰ বাবে আমি হেৰুৱাইছোঁ৷ মৃত্যুৰ শীতল কোলাত চিৰদিনৰ বাবে শুই পৰা এই কৰ্মচাৰীৰ পৰিয়ালক মাত্ৰ প্ত লাখ টকা দিয়েই চৰকাৰে দায়িত্ব সামৰিছে৷ এই কাৰ্যত আমি সন্তুষ্ট নহয়৷ আমি বিচাৰিছোঁ ‘সম-কামৰ সম-দৰমহা’ আৰু চাকৰি নিয়মীয়াকৰণ’– এই ভাষ্য ৰাষ্ট্ৰীয় যক্ষ্মা দূৰীকৰণ আঁচনি, অসমৰ ঠিকাভিত্তিক কৰ্মচাৰী সন্থাৰ৷ আজি এক প্ৰেছ বিজ্ঞপ্তিত সন্থাৰ সভাপতি গণেশ দত্ত, কাৰ্যকৰী সভাপতি ৰঞ্জিত বৰুৱা আৰু সাধাৰণ সম্পাদক ৰিয়াজ উদ্দিনে উল্লেখ কৰে যে, বৰ্তমান যক্ষ্মা বিভাগত কৰ্মৰত ঠিকাভিত্তিক কৰ্মচাৰীৰ জীৱনৰ কোনো নিৰাপত্তা নাই৷ চাকৰিৰ পৰা অৱসৰ লোৱাৰ সময়ত এই কৰ্মচাৰীসকলে চৰকাৰৰ পৰা কি সা-সুবিধা লাভ কৰিব তাৰো কোনো নীতি নিৰ্ধাৰণ চৰকাৰে কৰা নাই৷ মাত্ৰ সামান্য পাৰিতোষিকত দিন-ৰাতি একাকাৰ কৰি কামত খটুৱাইছে৷ আনকি প্ৰাইভেট কোম্পানীত কাম কৰা কৰ্মচাৰীসকলে বৰ্তমান যি সা-সুবিধা লাভ কৰে, সেইখিনিও এই কৰ্মচাৰীসকলে লাভ নকৰে বুলি উল্লেখ কৰি কয়- আমি এতিয়া জীৱন মৰণৰ সংকটত পৰিছোঁ৷ সেয়ে ৰাষ্ট্ৰীয় স্বাস্থ্য মিছনৰ অন্তৰ্গত সদৌ অসম স্বাস্থ্য ও কাৰিকৰী কল্যাণ সন্থাই অহা ৪, ৫ আৰু ৬ মাৰ্চত ৰাজ্যজুৰি পালন কৰিবলগীয়া তিনিদিনীয়া কৰ্ম বিৰতিত ৰাষ্ট্ৰীয় যক্ষ্মা দূৰীকৰণ আঁচনি, অসমৰ ঠিকাভিত্তিক কৰ্মচাৰী সন্থা সমৰ্থন জনাইছোঁ৷ সন্থাই যক্ষ্মা বিভাগৰ ঠিকাভিত্তিক কৰ্মচাৰীৰ চাকৰি নিয়মীয়া কৰি পেন্সন প্ৰদান কৰা, দৰমহা বৃদ্ধি কৰা, মৃত সতীৰ্থ কৰ্মচাৰীৰ পৰিয়ালক কমে ২৫ লাখ টকা আৰ্থিক সাহায্য প্ৰদান কৰাৰ লগতে যোগ্যজনক চাকৰিত মকৰল কৰা, অনাদায় ভ্ৰমণ বানচ আৰু দৈনিক ভাত্তা মোকলাই দিয়া, অইন কৰ্মচাৰীৰ দৰে চৰকাৰী সা-সুবিধা প্ৰদান কৰা, কৰ্মচাৰীসকলৰ বাবে বিনামূলীয়া চিকিৎসা আঁচনি প্ৰৱৰ্তন কৰা, ৰাজ্য চৰকাৰৰ অন্যান্য কৰ্মচাৰীৰ সমহাৰত দৈনিক ভাট্টা প্ৰদান কৰা, ট্ৰাইবেল বেল্ট ৰ জিলাকেইখনত কৰ্মৰত কৰ্মচাৰীক অতিৰিক্ত ভাট্টা প্ৰদানৰ কৰা, ৰাষ্ট্ৰীয় স্বাস্থ্য মিছন আৰু ৰাষ্ট্ৰীয় যক্ষ্মা নিৰ্মূলকৰণ আঁচনিৰ লেবৰেটৰী টেকনিচিয়ানসকলৰ দৰমহা বৈষম্য দূৰ কৰা, ডাটা এণ্ট্ৰী অপাৰেটৰ আৰু ড্ৰাইভাৰক আউটচৰ্চৰ পৰিৱৰ্তে অন্যান্য কৰ্মচাৰীৰ দৰে দৰমহা প্ৰদান কৰা, খালী পদসমূহ শীঘ্ৰেই পূৰণ কৰা, কামৰ বোজা অনুপাতে অধিক কৰ্মচাৰী নিয়োগ কৰা, এই কৰ্মচাৰীসকলে অৱসৰকালীন অৱস্থাত চৰকাৰে কি কি সুবিধা প্ৰদান কৰিব তাক স্পষ্টকৈ উল্লেখ প্ৰকাশ কৰা আদি দাবী সন্থাই উত্থাপন কৰি আহিছে৷