পুৰণি বিজেপিৰ পদূলিয়ে পদূলিয়ে ৰাজেন গোহাঁই

‘আমাৰ অসম’ৰ যোৰহাটৰ ষ্টাফ ৰিপ’ৰ্টাৰ, ৩ মাৰ্চঃ  বিজেপিৰ বিদ্ৰোহী নেতা ৰাজেন গোহাঁইয়ে উজনিৰ পুৰণি বিজেপি কৰ্মীসকলৰ ঘৰে-ঘৰে গৈ দলটোৰ পুৰণি কৰ্মীসকলক পুনৰ সংগঠিত কৰাৰ এক প্ৰচেষ্টা আৰম্ভ কৰিছে৷ উল্লেখ্য, প্ৰাক্তন কেন্দ্ৰীয় মন্ত্ৰী গোহাঁইয়ে দলত পুৰণি কৰ্মীসকল গুৰুত্বহীন হোৱা বুলি এক প্ৰকাৰ  বিদ্ৰোহ ঘোষণা কৰিছিল৷ আনকি তেওঁৰ নেতৃত্বত এক নতুন আঞ্চলিক দলে আত্মপ্ৰকাশ কৰিব বুলিও জল্পনা কল্পনা আৰম্ভ হৈছিল৷ কিন্তু দিলীপ শইকীয়াক ৰাজ্যিক বিজেপিৰ সভাপতিৰ দায়িত্ব অৰ্পণ কৰাৰ পাছৰে পৰা ৰাজেন গোহাঁইয়ে পুৰণি কৰ্মীসকলক দলত পুনৰ সক্ৰিয় কৰাৰ প্ৰচেষ্টা আৰম্ভ কৰিছে৷ সেই মৰ্মে কালিৰে পৰা ৰাজেন গোহাঁইয়ে উজনিত বাহৰ পাতি আছে৷ কালি তেওঁ শিৱসাগৰ জিলাৰ ডিমৌ অঞ্চল ভ্ৰমণ কৰাৰ পাছত ডিব্ৰুগড়ত উপস্থিত হয়৷ প্ৰাক্তন কেন্দ্ৰীয় মন্ত্ৰীজনে ডিমৌত থাওৰা, নহাট, শুকানপুখুৰী, নিতাইপুখুৰী আদি অঞ্চলৰ পুৰণি দলীয় কৰ্মীসকলৰ সৈতে মত বিনিময় কৰে৷ তদুপৰি, তেওঁ অলপতে মৃত্যু হোৱা দলৰ জ্যেষ্ঠ কৰ্মী যাদৱ দত্তৰ বাসগৃহতো উপস্থিত হয়৷ ইফালে ডিব্ৰুগড়তো প্ৰাক্তন মন্ত্ৰীজনে একাংশ পুৰণি দলীয় কৰ্মীৰ সৈতে মত বিনিময় কৰাৰ লগতে কেইবাজনো পুৰণি নেতা কৰ্মীৰ বাসগৃহত উপস্থিত হোৱাৰ বিষয়ে জানিব পৰা গৈছে৷ তেওঁ জনসংঘৰ অসম ৰাজ্যিক সমিতিৰ প্ৰতিষ্ঠাপক সভাপতি বিমলেশ্বৰ ফুকনৰ পৰিয়ালৰ কাষতো উপস্থিত হয়৷ মঙলবাৰে তেওঁ তিনিচুকীয়া ভ্ৰমণ কৰিব বুলিও জানিব পৰা গৈছে৷ এই ভ্ৰমণ কালত তেওঁ পুৰণি কৰ্মীসকলক দলে কৰা উপেক্ষাৰ অজুহাতত যাতে দলত্যাগৰ বিষয়ে চিন্তা নকৰে, তাৰ বাবে আহ৩ান জনায়৷ আনকি তেওঁ ৰাজ্যিক বিজেপিৰ নৱনিযুক্ত সভাপতি দিলীপ শইকীয়াৰ প্ৰতি গভীৰ আস্থা প্ৰকাশ কৰে৷ উল্লেখ্য, ২৩ ফেব্ৰুৱাৰীত ৰাজেন গোহাঁইয়ে যোৰহাট আৰু শিৱসাগৰ জিলা ভ্ৰমণ কৰি পুৰণি বিজেপি কৰ্মীসকলৰ সৈতে আলোচনাত মিলিত হৈছিল৷ ৰাজেন গোহাঁইয়ে পুৰণি বিজেপিসকলক এনেদৰে সংগঠিত কৰাৰ লগতে দিলীপ শইকীয়াৰ প্ৰতি আস্থা প্ৰকাশ কৰাটোৱে দলত পুনৰ পুৰণি বিজেপিসকল সক্ৰিয় হৈ উঠাৰ সম্ভাৱনা প্ৰকট কৰি তুলিছে৷ অৱশ্যে দিলীপ শইকীয়াৰ আস্থাভাজন হোৱাৰ আশাৰে গোহাঁয়ে পুৰণি বিজেপিসকলক সংগঠিত কৰাৰ প্ৰচেষ্টা চলোৱা বুলিও একাংশই মতপোষণ কৰিছে৷

গৌৰৱ গগৈৰ বিজয়ে বিজেপিক বহুত ক্ষতি কৰিলে

‘আমাৰ অসম’ৰ নিতাই পানীদিহিঙৰ প্ৰতিবেদকঃ  ‘‘গৌৰৱ গগৈয়ে নগাঁৱত প্ৰথম লোকসভা নিৰ্বাচনত উঠাৰ চিন্তা কৰিছিল৷ কিন্তু কাজিৰঙাত টিকট বিচৰা নাছিল৷ যোৰহাটত কি সাহসত উঠিল আৰু জিকিও গ’ল–সেয়া ডাঙৰ কথা৷ গৌৰৱ গগৈৰ বিজয়ে বিজেপি দলক বহুত ক্ষতি কৰি থৈ গ’ল৷’’ – নগাঁও লোকসভা সমষ্টিৰ প্ৰাক্তন সাংসদ তথা প্ৰাক্তন কেন্দ্ৰীয় মন্ত্ৰী ৰাজেন গোঁহাইয়ে দেওবাৰে শিৱসাগৰ জিলাৰ ডিমৌ বিধানসভা সমষ্টি পৰিভ্ৰমণ কৰি পালেঙীত সাংবাদিকৰ আগত এই কথা প্ৰকাশ কৰে৷ প্ৰাক্তন সাংসদজনে লগতে কয়, “বিজেপি দলৰ পুৰণি নিষ্ঠাৱান কৰ্মীক দলে উপেক্ষা কৰাৰ বাবেই যোৰহাটত আমি বেয়াকৈ হাৰিলোঁ৷ দলত পুৰণি কৰ্মীৰ স্থান নাই৷ এতিয়া তেওঁলোক বৰ হতাশ হৈ আছে৷ তথাপিও তেওঁলোকে দল ত্যাগ নকৰি দলৰ ধৰ্ম পালন কৰি আছে৷” সাংবাদিকে সোধা এক প্ৰশ্নৰ উত্তৰত তেওঁ কয় যে পুৰণি কৰ্মীসকলে কাম নাপায়৷ কিন্তু তেওঁলোকে যুঁজি যুঁজি দলটোক ওপৰলৈ উঠাই আনে৷ পুৰণি কৰ্মীসকলৰ আৰ্থিক দিশটো অতি বেয়া৷ দলৰ শীৰ্ষ নেতৃত্বই যদিহে পুৰণি কৰ্মীক শ্ৰদ্ধা আৰু সন্মান কৰিব নাজানে তেন্তে দলটোৰ যাত্ৰা কিমান দীঘল হ’ব তাত সন্দেহ আছে৷ ৰাজ্যিক বিজেপিৰ প্ৰাক্তন সভাপতিজনে নৱনিযুক্ত ৰাজ্যিক সভাপতিজনৰ প্ৰতি গভীৰ আস্থা প্ৰকাশ কৰি কয়, ‘‘বিজেপিৰ নৱ নিৰ্বাচিত ৰাজ্যিক সভাপতি দিলীপ শইকীয়াৰ ওপৰত আমাৰ আস্থা আছে৷ দিলীপ এটা ভাল ল’ৰা৷ তাৰ নেতৃত্বত দল আগবাঢ়ি যাব৷ দিলীপে নজনাকৈয়ে মই এতিয়া দলীয় কাম কৰি আছো৷ সংঘৰ পৰা অহা দিলীপে দলৰ পুৰণি নিষ্ঠাৱান কৰ্মীক সন্মান দিব বুলি মোৰ বিশ্বাস আছে৷” ডিমৌৰ লগতে ধেমাজি,  লখিমপুৰৰ পুৰণি নিষ্ঠাৱান কৰ্মীসকলৰ ক্ষোভৰ কথা তেওঁ দিলীপ শইকীয়াৰ আগত প্ৰকাশ কৰিব বুলিও ৰাজেন গোহাঁইয়ে সাংবাদিকক জানিবলৈ দিয়ে৷ আগন্তুক পঞ্চায়ত নিৰ্বাচনত জয়ী হ’বলৈ পুৰণি কৰ্মীক গুৰুত্ব দিব লাগিব বুলিও ৰাজেন গোহাঁইয়ে মতপ্ৰকাশ কৰে৷ অৱশ্যে নতুন দল গঠন সন্দৰ্ভত কোনো মত প্ৰকাশ কৰাৰ পৰা তেওঁ বিৰত থাকে৷ উল্লেখ্য, পালেঙীত ৰাজেন গোহাঁইক দলীয় কৰ্মীসকলে ফুলাম গামোচাৰে আদৰণি জনায়৷ তেওঁক সংগ দিয়ে পুৰণি বিজেপি কৰ্মী উমা গগৈ, প্ৰহ্লাদ দত্ত প্ৰমুখে শতাধিক বিজেপি কৰ্মীয়ে৷ ইফালে  ৰাজেন গোঁহাইয়ে ডিমৌ সমষ্টিৰ থাওৰা, নহাট, শুকানপুখুৰী, নিতাইপুখুৰী  পঞ্চায়তৰ পুৰণি কৰ্মীসকলৰ সৈতে মত বিনিময় কৰাৰ লগতে অলপতে পৰলোকপ্ৰাপ্তি হোৱা নিতাইপুখুৰীৰ জ্যেষ্ঠ কৰ্মী যাদৱ দত্তৰ ঘৰলৈ গৈ পৰিয়ালৰ সৈতে মত বিনিময় কৰে৷