'ৰাজ্যিক কৰ্মচাৰীক অ’পিএছ দিব নোৱাৰোঁ'

‘আমাৰ অসম’ৰ ষ্টাফ ৰিপ’ৰ্টাৰ, ৪ মাৰ্চঃ শিৱসাগৰৰ বিধায়ক অখিল গগৈয়ে আজি বিধানসভাত ৰাজ্য চৰকাৰৰ সকলো চৰকাৰী শিক্ষক-কৰ্মচাৰীৰ লগতে অন্যান্য চৰকাৰী কৰ্মচাৰীৰ বাবে পুৰণি পেঞ্চন পুনঃ প্ৰৱৰ্তনৰ দাবী জনায় এক সংকল্প প্ৰস্তাৱ উত্থাপন কৰে৷ এই সংকল্প প্ৰস্তাৱৰ প্ৰতি কংগ্ৰেছ, এআইইউডিএফৰ লগতে চিপিআই(এমএল)ৰ বিধায়ক মনোৰঞ্জন তালুকদাৰেও সমৰ্থন জনায়৷ সদনত ইয়াৰ উত্তৰ দি সংসদীয় পৰিক্ৰমা মন্ত্ৰী চন্দ্ৰমোহন পাটোৱাৰীয়ে ৰাজ্যিক কৰ্মচাৰীসকলক অ’পিএছ বা পুৰণি পেঞ্চন দিব নোৱাৰি৷ বৰ্তমান এনপিএছ দি থকা হৈছে৷ এনপিএছতকৈ যদিহে ইউপিএছ বেছি ভাল হয়, তেতিয়া সেইটোকে দিয়া হ’ব৷ ইউপিএছৰ সমগ্ৰ বিষয়টো বিত্ত বিভাগে চোৱা-চিতা কৰি আছে৷ বৰ্তমান ৰাজ্য চৰকাৰৰ ২ লাখ ৮০ হাজাৰ কৰ্মচাৰী এন পি এছত আছে৷

ইয়াৰে ৬২,৮০০ শিক্ষক-কৰ্মচাৰী৷ কিন্তু মন্ত্ৰীৰ উত্তৰত সন্তুষ্ট নহৈ বিধানসভাত বিৰোধীয়ে পুৰণি পেঞ্চনৰ দাবীত হুলস্থূলীয়া পৰিস্থিতিৰ সৃষ্টি কৰাত অধ্যক্ষৰ আসনত থকা উপাধ্যক্ষই তিনি মিনিটৰ বাবে সদনৰ কাম-কাজ স্থগিত ৰাখে৷ ইয়াৰ পাছত সদন আৰম্ভ হয় যদিও উপাধ্যক্ষই ধ্বনি ভোটত অখিল গগৈৰ সংকল্প প্ৰস্তাৱ খাৰিজ কৰে৷ কিন্তু অখিল গগৈয়ে ডিভিজন অৰ্থাৎ ভোটিং বিচাৰি আকোৰগোঁজ হৈ থকাত উপাধ্যক্ষই তেওঁক দিনটোৰ বাবে সদনৰ পৰা নিলম্বিত কৰে৷ আজি সদনত পুনৰ অ’পিএছ প্ৰৱৰ্তনৰ দাবী জনায় অখিল গগৈয়ে কয় যে এনপিএছ বজাৰৰ ওপৰত নিৰ্ভৰশীল, ইউপিএছত ১০ বছৰ চাকৰি কৰিলেহে ১০ হাজাৰ টকাৰ পেঞ্চন দিয়ে৷ কোনো কোনো ক্ষেত্ৰত ইউপিএছ এনপিএছতকৈও ভয়ংকৰ৷ সেয়েহে দুয়োটা ব্যৱস্থা বাতিল কৰি অ’পিএছ বা পুৰণি পেঞ্চন ব্যৱস্থা বাহাল ৰাখিব লাগে৷ এয়া কৰ্মচাৰীসকলৰ বাবে চৰকাৰৰ অনুগ্ৰহ নহয়, প্ৰাপ্য৷