গুৱাহাটী-উত্তৰ গুৱাহাটী সংযোগী দলঙৰ ৯০ শতাংশ কাম সম্পূৰ্ণ

‘আমাৰ অসম’ৰ আমিনগাঁৱৰ প্ৰতিনিধি, ৫ মাৰ্চঃ  মহাবাহু ব্ৰহ্মপুত্ৰত নিৰ্মাণকাৰ্য চলি থকা গুৱাহাটী-উত্তৰ গুৱাহাটী সংযোগী দলংখন সম্পূৰ্ণ হ’বলৈ এতিয়া মাথোঁ ১০শতাংশ কামহে বাকী আছে৷ এতিয়া বাকী অংশৰ বাবে দিনে-নিশাই পূৰ্ণ গতিত চলিছে নিৰ্মাণকাৰ্য৷ অত্যাধুনিক প্ৰযুক্তিৰে নিৰ্মাণ কৰা এই দলংখনে কেৱল গুৱাহাটী-উত্তৰ গুৱাহাটীৰেই নহয় সমগ্ৰ ৰাজ্যৰ আৰ্থ-সামাজিক, শৈক্ষিক, পৰ্যটনকে ধৰি সকলো ক্ষেত্ৰতে এক আমূল পৰিৱৰ্তন আনিবলৈ সক্ষম হ’ব বুলি সকলোৱে আশা প্ৰকাশ কৰিছে৷ উল্লেখ্যস গুৱাহাটী-উত্তৰ গুৱাহাটী সংযোগী এখন দলঙৰ বাবে উত্তৰ গুৱাহাটীৰ বিভিন্ন দল-সংগঠনে দীৰ্ঘদিন ধৰি দাবী জনাই অহাৰ পাছত এতিয়া উত্তৰ গুৱাহাটীবাসীৰ সপোন দিঠক হোৱাৰ দিশত আগবাঢ়িছে৷ উল্লেখ্য, দ্ৰুতগতিত যান-বাহনৰ সংখ্যা বৃদ্ধি পোৱাত শৰাইঘাট দলংখনত প্ৰায়ে হাৰাশাস্তিৰ সন্মুখীন হ’বলগীয়া হয় সৰ্বসাধাৰণ লোক৷ নতুন দলংখনে শৰাইঘাট দলঙৰ যানজঁট নাইকিয়া কৰিব বুলি মন্তব্য কৰিছে সচেতন মহলে৷

লোক নিৰ্মাণ বিভাগৰ পৰা জানিব পৰা মতে ইতিমধ্যে ৯৫ শতাংশ সম্পূৰ্ণ গৈছে দলঙৰ খুঁটাৰ কাম৷ খুটাৰ ওপৰত লগাবলগীয়া আটক ধুনীয়া ছেগমেণ্টৰ কাম সম্পূৰ্ণ হোৱাৰ পাছতে জুন মাহত সাজু হৈ উঠিব গুৱাহাটী-উত্তৰ গুৱাহাটী দলংখন৷ ৬টা খুঁটাৰ মুঠ ৪০১টা ছেগমেণ্টৰ বিপৰীতে ৩৬০টা ছেগমেণ্ট ইতিমধ্যে লগোৱা হৈছে৷  অত্যাধুনিক কাৰিকৰী কৌশলেৰে বাকী ১০ শতাংশ ছেগমেণ্টৰ লগোৱাৰ পাছতে সাজু হ’ব দলংখন৷ লোকনিৰ্মাণ বিভাগৰ সূত্ৰৰ পৰা জানিব পৰা অনুসৰি মাৰ্চৰ শেষত দলংখনৰ খুঁটাৰ কাম সম্পূৰ্ণ হোৱাৰ পাছত¸ ছেগমেণ্টৰ কাম সম্পূৰ্ণ হ’লেই জুন মাহত সাজু হৈ উঠিব গুৱাহাটী-উত্তৰ গুৱাহাটী দলং৷ উল্লেখ্য, কিছুদিন পূৰ্বে মুখ্যমন্ত্ৰী ড॰ হিমন্ত বিশ্ব শৰ্মাই গুৱাহাটী-উত্তৰ গুৱাহাটী সংযোগী দলং এই বৰ্ষৰ জুন মাহত জনসাধাৰণৰ বাবে মুকলি কৰি দিয়া হ’ব বুলি সামাজিক মাধ্যমযোগে জনাইছিল৷ মুখ্যমন্ত্ৰী ড॰ শৰ্মাৰ তৎপৰতাত ৰাইজৰ দীৰ্ঘদিনীয়া সমস্যা সমাধান হোৱাত ৰাইজে তেওঁৰ শলাগ লৈছে৷