অৱসৰৰ পিছতো স্বেচ্ছাই শিক্ষাদান দুই শিক্ষকৰ

'আমাৰ অসম'ৰ পশ্চিম দৰঙৰ প্ৰতিবেদকঃ দৰঙৰ মাতৃভাষা মাধ্যমৰ এখন চৰকাৰী প্ৰাথমিক বিদ্যালয়। কলাইগাওঁ শিক্ষা খণ্ডৰ অন্তৰ্গত বিদ্যালয়খনত শ্ৰেণী কোঠাৰ অভাৱে উন্মোচিত কৰিছে চৰকাৰী শিক্ষা ব্যৱস্থাৰ ফোঁপোলা স্বৰূপ। ৩১৬ নং বৰঙ্গাবাৰী প্ৰাথমিক বিদ্যালয়ত শিক্ষাৰ্থীৰ অনুপাতে নাই শ্ৰেণী কোঠা। শৈক্ষিক-বিদ্যাতনিক দিশত যথেষ্ট আগবঢ়া বিদ্যালয়খনত শ্ৰেণী কোঠাৰ অভাৱৰ বাবে বিপাঙত পৰিছে বিদ্যালয় কৰ্তৃপক্ষ। ১৬২ গৰাকী শিক্ষাৰ্থী থকা বিদ্যালয়খনত শ্ৰেণীকোঠাৰ অভাৱৰ বাবে বাৰান্দা আৰু টিনৰ এচলীয়া কোঠাত পাঠদান কৰিব লগা হৈছে একাংশ শিক্ষাৰ্থীক। বিদ্যালয়খনৰ 'ক' শ্ৰেণীত ৩৬ গৰাকী, প্ৰথম শ্ৰেণীত ২৩ গৰাকী, দ্বিতীয় শ্ৰেণীত ২৭ গৰাকী, তৃতীয় শ্ৰেণীত ৩০ গৰাকী, চতুৰ্থ শ্ৰেণীত ২২ গৰাকী আৰু পঞ্চম শ্ৰেণীত ২৩ গৰাকী ছাত্ৰ-ছাত্ৰীয়ে অধ্যয়ন কৰি থকাৰ লগতে আন ১২ গৰাকী কণ কণ ছাত্ৰ-ছাত্ৰী নিয়মীয়াকৈ আহে বিদ্যালয়লৈ। অৱশ্যে বয়স নোহোৱাৰ বাবে সংশ্লিষ্ট ছাত্ৰ-ছাত্ৰী কেইগৰাকীৰ নাম ভৰ্তি কৰিব পৰা নাই কৰ্তৃপক্ষই। স্বাভাৱিকতে চৰকাৰী প্ৰাথমিক বিদ্যালয়খনৰ প্ৰতি শিক্ষাৰ্থী-অভিভাৱকৰ সঁহাৰিয়ে চৰকাৰী শিক্ষা ব্যৱস্থাৰ প্ৰতি ইতিবাচক বাৰ্তা বহন কৰিছে।

১৯৪৬ চনত স্থাপিত বিদ্যালয়খনত তিনিটা পকী শ্ৰেণী কোঠা আছে যদিও ছাত্ৰ-ছাত্ৰীৰ পৰিসংখ্যা অনুসৰি পৰ্যাপ্ত নহয়। মুঠ ৫ গৰাকী শিক্ষক থকা বিদ্যালয়খনত আছে দুগৰাকী অৱসৰপ্ৰাপ্ত স্বেচ্ছাসেৱী শিক্ষক। অৱসৰৰ পিছতো শ্ৰেণীকোঠাৰ মোহ এৰিব পৰা নাই বিদ্যালয়ৰে প্ৰাক্তন দুই শিক্ষকে। প্ৰাপ্ত তথ্য অনুসৰি, ২০২২ চনত অৱসৰ গ্ৰহণ কৰা বিদ্যালয়ৰ প্ৰাক্তন প্ৰধান শিক্ষক নুৰুল আমিন আৰু কিৰণ কুমাৰী ডেকাই স্বেচ্ছাই শিক্ষাদান কৰি আহিছে শিক্ষানুষ্ঠান খনত। অৱসৰৰ পিছতো নিয়মীয়াকৈ বিদ্যালয়ত উপস্থিত হৈ পাঠদান কৰি থকা দুই শিক্ষাগুৰুৰ মহানুভৱতাক একেমুখে স্বীকাৰ কৰিছে স্থানীয় ৰাইজ তথা অভিভাৱকে। উল্লেখ্য, ৪ কঠা ৩ লেচা মাটিত থকা বিদ্যালয়খনত অত্যাধুনিক বিজ্ঞানসন্মত শ্ৰেণী কোঠা নিৰ্মাণৰ দাবী জনাইছে শিক্ষানুৰাগী ৰাইজে। শিক্ষাৰ্থীৰ অভাৱত এখনৰ পিছত এখন চৰকাৰী বিদ্যালয় বন্ধ হৈ পৰা সময়ত দৰঙৰ শৈক্ষিক মানচিত্ৰত উজলি উঠিছে ৩১৬ নং বৰঙ্গাবাৰী প্ৰাথমিক বিদ্যালয়।