পৌৰকৰ্মীৰ প্ৰাদেশিকীকৰণ আধা হ’লগৈ দৰমহা

‘আমাৰ অসম’ৰ ষ্টাফ ৰিপ’ৰ্টাৰ, ৬ মাৰ্চঃ  ‘অসম চৰকাৰে মিউনিচিপাল কৰ্মচাৰীৰ চাকৰিৰ প্ৰাদেশিকীকৰণৰ বিধেয়ক আনি কৰ্মচাৰীসকলক ঠগিছে৷ এতিয়া পৌৰ কৰ্মচাৰীসকলে পূৰ্বৰ দৰমহাৰ আধাহে লাভ কৰিব৷’– এই মন্তব্য শিৱসাগৰৰ বিধায়ক অখিল গগৈৰ৷ আজি বিধানসভাত গৃহ নিৰ্মাণ আৰু নগৰ পকিল্পনা বিভাগৰ মন্ত্ৰী জয়ন্তমল্ল বৰুৱাই উত্থাপন কৰা ‘দি আছাম নিউনিচিপল এমপ্লয়িজ (প্ৰিভিঞ্চিয়েলাইজেশ্বন) বিল, ২০২৫ত এক সংশোধনী প্ৰস্তাৱ আনি অখিল গগৈয়ে কয়– ‘যদিহে চৰকাৰে পৌৰ কৰ্মচাৰীসকলক নিযুক্তিৰ দিনৰ পৰা বিত্তীয় সুবিধা নিদিয়ে, তেনেহ’লে কৰ্মচাৰীসকল বৃহৎ লোকচানৰ সন্মুখীন হ’ব৷ এখন পৌৰসভাত এগৰাকী কনিষ্ঠ সহায়কে বৰ্তমান ৬৬,২২৩.৬০ টকা দৰমহা লাভ কৰি আছে৷ প্ৰাদেশিকীকৰণৰ নামত তেওঁৰ দৰমহা এতিয়া ৩৩,১২২ টকালৈ হ্ৰাস কৰিব বিচৰা হৈছে৷ একেদৰে চতুৰ্থ বৰ্গৰ এগৰাকী কৰ্মচাৰীয়ে বৰ্তমানে পাই থকা ৪৮,৪৪৯.২০ টকাৰ দৰমহা ৪,১৩৯ টকালৈ হ্ৰাস কৰিব বিচৰা হৈছে৷

এজন সহকাৰী অভিযন্তালৈ বৰ্তমানে পাই থকা ১,৪,৬৩০.৮০ টকাৰ দৰমহা ৭০,৩১৩ টকালৈ হ্ৰাস কৰিব বিচৰা হৈছে৷ এনেদৰে চাকৰি প্ৰাদেশিকীকৰণৰ নামত পাই থকা দৰমহা আধা কৰি দিলে কৰ্মচাৰীসকল কেনেকৈ চলিব৷ উল্লেখ্য, অখিল গগৈয়ে তেওঁৰ সংশোধনী প্ৰস্তাৱ উঠাই নোলোৱাত উপাধ্যক্ষই ধবনি ভোটত উক্ত প্ৰস্তাৱ খাৰিজ কৰে৷ ইফালে, সদনত বিধেয়কখনৰ সপক্ষত যুক্তি দাঙি ধৰি মন্ত্ৰী জয়ন্তমল্ল বৰুৱাই কয় যে বিধেয়কখনৰ শিৰোনামাতে সকলো কথা স্পষ্ট হৈ আছে৷ অখিল গগৈয়ে সকলো কথা বুজি পায়ো নুবুজাৰ ভাও ধৰিছে৷ পূৰ্বতে পৌৰনিকায়, সভাসমূহে নিজৰ উপাৰ্জনৰ পৰা কৰ্মচাৰীসকলক দৰমহা দিছিল৷ উপাৰ্জন নোহোৱা পৌৰনিকায়-সভাসমূহত ১৮ মাহ পৰ্যন্ত দৰমহা বন্ধ হৈ আছিল৷ সংশ্লিষ্ট কৰ্মচাৰীসকলৰ পদ প্ৰাদেশিকীকৰণৰ ফলত এতিয়াৰে পৰা তেওঁলোকৰ দৰমহা ৰাজ্য চৰকাৰৰ হাতলৈ আহিল৷ ৪ ছেপ্টেম্বৰ, ২০১৩ চনৰ পৰা উক্ত সময়ৰ কেবিনেটে গ্ৰহণ কৰা সিদ্ধান্তমৰ্মে আমাৰ চৰকাৰে পদসমূহ প্ৰাদেশিকীকৰণ কৰিছে৷