বিটিআৰ নিৰ্বাচনত অকলেই নামিব বিজেপি

‘আমাৰ অসম’ৰ ষ্টাফ ৰিপ’ৰ্টাৰ, ৬ মাৰ্চঃ  বিটিআৰৰ নিৰ্বাচনক লৈ তৎপৰ হৈছে বিজেপি, ইউপিপিএল, বিপিএফ৷ শাসকীয় ইউপিপিএলৰ লগতে সবলভাৱে যুঁজ দিবলৈ ইতিমধ্যে ৰণক্ষেত্ৰত নামি পৰিছে বিপিএফৰ নেতা-কৰ্মী৷ ইয়াৰ মাজতে ইউপিপিএলৰ সহযোগী দল বিজেপিয়ে বিটিআৰত সক্ৰিয়তাৰে জঁপিয়াই পৰিছে৷ বিটিআৰত বিভিন্ন সভা-সমিতি অনুষ্ঠিত কৰি বিটিআৰত বিজেপিয়ে চলাইছে ব্যাপক প্ৰস্তুতি৷

বিজেপিৰ বিভিন্ন পৰ্যায়ৰ নেতাৰ উপৰি ৰাজ্যিক সভাপতি দিলীপ শইকীয়াই সক্ৰিয়তাৰে নিৰ্বাচনী অভিযান আৰম্ভ কৰিছে বিটিআৰত৷ বৃহস্পতিবাৰে ওদালগুৰিত বিজেপিৰ বিশাল সভাত ভাগ লৈ বিটিআৰত বিজেপিয়ে অকলেই নিৰ্বাচন খেলাৰ ইংগিত দিয়ে৷ বিটিআৰৰ আটাইকেইটা সমষ্টিতে বিজেপিয়ে প্ৰতিদ্বন্দ্বিতা কৰিব বুলি ঘোষণা কৰে বিজেপিৰ ৰাজ্যিক সভাপতিজনে৷ তেওঁ কয়– বিটিআৰৰ  ৫০টা সমষ্টিতে বিজেপিয়ে এককভাৱে নিৰ্বাচনী যুঁজত অৱতীৰ্ণ হ’ব৷ পূৰ্বে লোৱা হৈছিল এই সিদ্ধান্ত৷ আজিৰ দিনটোত এই সিদ্ধান্তত আমি অটল আছোঁ৷