ADREৰ লিখিত পৰীক্ষাত দৃষ্টিহীন অভিশেষৰ সফলতা

'আমাৰ অসম'ৰ দেৰগাঁৱৰ প্ৰতিবেদকঃ বৃহস্পতিবাৰে মাজনিশা ঘোষণা কৰা ADRE ফলাফলে দেৰগাঁৱৰ এজন দৃষ্টিহীন যুৱকৰ জীৱনলৈ কঢ়িয়াই আনিছে আশাৰ বতৰা। সদ্য ঘোষিত ADRE ফলাফলত এই দৃষ্টিহীন যুৱকজনৰ সফলতাত উৎফুল্লিত হৈ পৰিছে দেৰগাঁৱৰ কাকডোঙাৰ চমুৱা গাঁওবাসী। জানিব পৰা মতে, দৃষ্টিহীন যুৱকজনৰ নাম অভিশেষ বৰা। শেহতীয়াকৈ অনুষ্ঠিত অসম চৰকাৰৰ চতুৰ্থ বৰ্গৰ লিখিত পৰীক্ষাত অৱতীৰ্ণ হৈছিল অভিশেষ। কাকডোঙা মৌজাৰ চমুৱা গাঁৱৰ নিবাসী অৱসৰপ্ৰাপ্ত প্ৰধান শিক্ষক তৰুণ চন্দ্ৰ বৰা আৰু অনিমা বৰাৰ পুত্ৰ অভিশেষ বৰাই এই পৰীক্ষাত লাভ কৰিছে সফলতা। উল্লেখযোগ্য যে অভিশেষৰ পিতৃ তৰুণ চন্দ্ৰ বৰা কাচমাৰি এম ই স্কুলত প্ৰধান শিক্ষক হিচাপে কৰ্মৰত হৈ অৱসৰ গ্ৰহণ কৰিছিল।

ইপিনে, অভিশেষৰ মাতৃ অনিমা বৰাইয়ো ৮২নং গ্ৰান্ত প্ৰথামিক বিদ্যালয়ত শিক্ষকতা কৰিছিল যদিও দৃষ্টিহীন পুত্ৰক চোৱা চিতা কৰিব লগাৰ বাবেই চাকৰিৰ পৰা অব্যাহতি ল'বলগা হৈছিল। দৃষ্টিহীনতাৰ বাবেই অভিশেষৰ লগতে পৰিয়ালটোৱে তেওঁৰ ভৱিষ্যতকলৈ চিন্তিত আছিল যদিও এ ডি আৰ ই পৰীক্ষাৰ ফলাফলে এই চিন্তাৰ পৰা সকাহ দিয়ে পৰিয়ালটোক। উল্লেখ্য যে অভিশেষ বৰাই প্ৰথমে যোৰহাটৰ অন্ধ বিদ্যালয়ত প্ৰাথমিক শিক্ষা গ্ৰহণ কৰিছিল পৰৱৰ্তী সময়ত হাতীয়েখোৱা পূৰ্বাঞ্চলিক উচ্চতৰ মাধ্যমিক বিদ্যালয়ৰ পৰা ২০২১ চনত উচ্চতৰ মাধ্যমিক পৰীক্ষাত উত্তীৰ্ণ হৈছিল। মেধা সম্পন্ন যুৱক জনৰ সফলতাৰ বাবে আজি পিতৃ-মাতৃয়ে চৰকাৰৰ প্ৰতি কৃতজ্ঞতা জনাইছে।