পশ্চিম অসমৰ নৈপৰীয়া অঞ্চলত মাকৈ খেতিৰে সেউজ বিপ্লৱৰ সূচনা

‘আমাৰ অসম’ৰ যোগীঘোপাৰ প্ৰতিবেদক, ৮ মাৰ্চঃ  ব্ৰহ্মপুত্ৰ আৰু পশ্চিম অসমৰ আই, মানাহ, চম্পা, বেকী নৈৰ বিধৌত অঞ্চলবোৰৰ হাজাৰ-হাজাৰ হেক্টৰ কৃষিভূমিত উৎপাদন হোৱা মাকৈ খেতিৰ ওপৰতে নিৰ্ভৰ কৰি বহিঃৰাজ্যত গঢ়ি উঠিছে অসংখ্য গৰু, কুকুৰাৰ ফাৰ্ম আৰু বীয়েৰ কাৰখানা৷ উল্লেখ্য, ব্ৰহ্মপুত্ৰ, আই, মানাহ, চম্পা নৈৰ দাঁতি কাষৰীয়া অঞ্চল বৰজানা, মালেগড়, তিনকোণীয়া, পাচনীয়া, ঔডুবি, কচুডোলা, আঁৰিমাৰা, যোগীঘোপা, মেৰেৰচৰ, কুশবাৰী, লেংটিছিঙা, সন্তোষপুৰ-ডুমেৰগুৰী, কাছাৰীপেটী, কাহীবাৰী, কাবাইটাৰী, কীৰ্তনপাৰা, সৃজনগ্ৰাম, জপেয়া, বালাৰচৰকে ধৰি ধুবুৰী, গোৱালপাৰা, বৰপেটা জিলাৰ নৈপৰীয়া অঞ্চলসমূহত প্ৰতিবছৰে হাজাৰ- হাজাৰ হেক্টৰ কৃষিভূমিত মাকৈ খেতি কৰি আহিছে কৃষকসকলে৷ দুৰ দিগন্তলৈ চকুৰে মনিব নোৱাৰালৈকে কেৱল মাকৈ খেতিৰে সেউজীয়া অঞ্চলসমূহ৷ এই অঞ্চলসমূহত উৎপাদন হয় হাজাৰ হাজাৰ মেট্ৰিকটন মাকৈ৷ খেতিৰ পৰা মাকৈ চপোৱাৰ বাবে সদাব্যস্ত হৈ পৰাৰ সময় সমাগত কৃষকসকল৷

স্মৰ্তব্য যে, উৎপাদিত হাজাৰ হাজাৰ মেট্ৰিকটন মাকৈ বহিঃৰাজ্যলৈ সৰবৰাহ হৈ আহিছে৷ এই অঞ্চলৰ মাকৈৰ ওপৰত নিৰ্ভৰ কৰিয়েই পশ্চিমবংগ, অন্ধ্ৰপ্ৰদেশ, ৰাজস্থান আদি ৰাজ্যত কুকুৰা, গৰুৰ ফাৰ্মৰ লগতে বীয়েৰৰ কাৰখানা গঢ়ি উঠিছে৷ উক্ত মাকৈৰ ওপৰত নিৰ্ভৰ কৰি বহিঃৰাজ্যসমূহত গৰু, কুকুৰাৰ দানাৰ কাৰখানাও গঢ়ি উঠিছে৷ স্থানীয়ভাৱে দানা উৎপাদনৰ বাবে কাৰখানা নথকা বাবে বহিঃৰাজ্যলৈ মাকৈ সৰবৰাহ কৰাৰ পাছত বহিঃৰাজ্যৰ কাৰখানাত উৎপাদিত দানা অসমলৈ সৰবৰাহ হৈ আহিছে৷ এনে সময়তে দানা উৎপাদনৰ বাবে অভয়াপুৰীৰ নিকটৱত্তৰ্ী লেংটিছিঙাৰ ব্যৱসায়ী অতুল ঘোষে নিজা উদ্যোগত ব্ৰয়লাৰ ফাৰ্মৰ চাহিদা পুৰাবলৈ লেংটিছিঙাতে দানা প্ৰস্তুতকৰনণৰ কাৰখানা গঢ়ি তোলোৰ পাচত নতুনকৈ উত্তৰ শালমাৰাৰ নিকটবত্তৰ্ী ঘিলাগুৰীতো এটা কাৰখানা নিৰ্মাণৰ প্ৰস্তুতি চলোৱা বুলি জানিব পৰা গৈছে৷ ইপিনে কৃষকসকলে মাকৈ খেতিৰে জৰিয়তে সেউজ বিপ্লৱ সৃষ্টি কৰাৰ পাচতো ৰাজ্যৰ কৃষি বিভাগ অথবা জলসিঞ্চন বিভাগে পৰ্যন্ত তেনে কোনো সুবিধা আগবঢ়োৱা নাই৷