গড়চূকলৈ নাযাবা, টুইন টাৱাৰ নাচাবা...

‘আমাৰ অসম’ৰ ষ্টাফ ৰিপ’ৰ্টাৰ, ১১ মাৰ্চঃ  আন দিনাৰ দৰে আজিও সদনৰ বাহিৰে ভিতৰে দেখা গ’ল তেওঁলোক দুয়োজনকেই সপ্ৰতিভ আৰু আগ্ৰাসী ৰূপত– হয়, ক’বলৈ ওলাইছোঁ শাসক-বিৰোধী দুই নেতা মুখ্যমন্ত্ৰী ড॰ হিমন্ত বিশ্ব শৰ্মা আৰু শিৱসাগৰৰ বিধায়ক অখিল গগৈৰ কথা৷ আজি বিধানসভাত মুখ্যমন্ত্ৰী ড॰ হিমন্ত বিশ্ব শৰ্মাই বাজেটৰ সন্দৰ্ভত উদাত্ত ভাষণ দি থকাৰ মাজতে অখিল গগৈয়ে টপকৰে  গড়চুক বেটকুছিৰ টুইট টাৱাৰটো কি হ’ল বুলি মুখ্যমন্ত্ৰীক প্ৰশ্ন কৰে৷ অখিলৰ প্ৰশ্নত অলপো চিন্তা নকৰাকৈয়ে মুখ্যমন্ত্ৰী ড॰ শৰ্মাই কয়– টুইট টাৱাৰটো ৰিলিজ কৰি দিয়া৷ টুইট টাৱাৰ দেখুৱাবলৈ পাটোৱাৰী দাই আপোনাক লৈ যাব৷

অখিল গগৈয়ে কয়– ‘মই আপোনাৰ লগতহে যাম৷ তৰুণ গগৈয়ে বনোৱা বিল্ডিংটোকে আপুনি টুইন টাৱাৰ বুলি মিছা কথা কৈ ফুৰিছে৷’ ইয়াৰ উত্তৰত মুখ্যমন্ত্ৰীয়ে কয়– ‘আপোনাক মোৰ লগত নিলে মই ঘৰত গালি খাব লাগিব৷ ১,২০০ কোটি টকাৰ টুইন টাৱাৰৰ বিল্ডিঙৰ ময়ে আধাৰশিলা কৰিছোঁ, ময়ে শেষ কৰিম৷ তৰুণ গগৈয়ে কৰা কোনো কামত আমি হাত দিয়া নাই৷ তেওঁ মহান আত্মা, মহান জেগাতে থাকক৷’ উল্লেখ্য, আজি অখিল গগৈয়ে বাজেটখনক ভোট কিনাৰ বাজেট বুলি কটাক্ষ কৰে৷ মুখ্যমন্ত্ৰীয়ে এনেয়ে ফুলাম কথা কৈ আভুৱা ভাৰিছে বুলি অখিল গগৈয়ে কয়৷ ইয়াৰ প্ৰত্তু্যত্তৰত মুখ্যমন্ত্ৰীয়ে কয়– ’২৬ত ভোট কিনাৰ কোনো দৰকাৰ নাই৷ ৩২ত আমি আৰু দিম৷ অখিল গগৈয়ে মুখ্যমন্ত্ৰীয়ে অৰুণোদয় আঁচনিৰ নামত ভোটাৰক ব্লেকমেইল কৰা বুলিও অভিযোগ কৰে৷ গগৈৰ মতে কেৱল বিজেপি কৰিলেহে অৰুণোদয় দিয়ে৷ অখিল গগৈয়ে মুখ্যমন্ত্ৰীক উদ্দেশ্যি কয় যে কালি আপুনি কৈছে– শিৱসাগৰত অৰুণোদয় নিদিলে মোক বানপানীয়ে উটাই নিব৷ মই আজি আপোনাক কৈছোঁ সাহস আছে যদি অৰুণোদয় বন্ধ কৰি ২০২৬ৰ নিৰ্বাচন খেলক, আপোনাক উটাই নিব৷ মুখ্যমন্ত্ৰী ড॰ হিমন্ত বিশ্ব শৰ্মাই অখিল গগৈৰ চকীত বান্দৰ কেকোৰা লাগি থকা বুলি কটাক্ষ কৰে৷ বিধানসভাত মুখ্যমন্ত্ৰীৰ ভাষণৰ মাজতে এনেদৰে সৃষ্টি হয় অনেক কথাৰ কটাকটি৷