ডিব্ৰুগড়ৰ সমস্ত দায়িত্ব লৈ গুৱাহাটীলৈ উভতিল মুখ্যমন্ত্ৰী

‘আমাৰ অসম’ৰ ডিব্ৰুগড়ৰ প্ৰতিবেদক, ২৩ মাৰ্চঃ  বহুকেইটা গুৰুত্বপূৰ্ণ কাৰ্যসূচী সামৰি ডিব্ৰুগড়ৰ পৰা আজি গুৱাহাটীলৈ উভতিল মুখ্যমন্ত্ৰী ড॰ হিমন্ত বিশ্ব শৰ্মা৷ ডিব্ৰুগড়ক অসমৰ দ্বিতীয় ৰাজধানীকে ধৰি ডিব্ৰুগড়ৰ কেইবাটাও অভিলাষী প্ৰকল্প ৰূপায়ণৰ দায়িত্ব লৈ চাৰিদিনৰ পাছত দিছপুৰলৈ উভতিল মুখ্যমন্ত্ৰী শৰ্মা৷ ২০ মাৰ্চত উপস্থিত হোৱা মুখ্যমন্ত্ৰীয়ে কেবিনেট বৈঠকৰ পাছতে ২১ মাৰ্চত পৰ্যালোচনা বৈঠক আৰু সন্ধিয়া অসম বিধানসভাৰ স্থান পৰিদৰ্শনৰ লগতে খনিকৰস্থিত ষ্টেডিয়ামৰ নিৰ্মাণকাৰ্য বুজ লয়৷ ২২ মাৰ্চত তৃতীয়টো দিনৰ পৰ্যালোচনা বৈঠক আৰু বিচিপিএল পৰিদৰ্শন কৰাৰ পাছত ২৩ মাৰ্চত পৰ্যালোচনা বৈঠকত অংশ লৈ উভতি যায় মুখ্যমন্ত্ৰী ড॰ শৰ্মা৷ ঐতিহাসিক চহৰখনক অসমৰ দ্বিতীয় ৰাজধানী হিচাপে প্ৰতিষ্ঠা কৰিবলৈ মুখ্যমন্ত্ৰীয়ে গ্ৰহণ কৰিছে কেইবাটাও পৰিকল্পনা৷ চৰকাৰ-প্ৰশাসনক ডিব্ৰুগড় আৰু এই অঞ্চলত বসবাস কৰা লোকসকলৰ ওচৰলৈ আগবঢ়াই নিবলৈ পদক্ষেপ গ্ৰহণ কৰিছে মুখ্যমন্ত্ৰীয়ে৷ আনহাতে এই উদ্দেশ্য সাধনৰ বাবে মুখ্যমন্ত্ৰী ড॰ শৰ্মাৰ নেতৃত্বত ইতিমধ্যে কেইবাটাও আঁচনি আৰম্ভ কৰা হৈছে, য’ত মুখ্যমন্ত্ৰীৰ সচিবালয় কাৰ্যকৰী কৰা, অসম বিধানসভা চৌহদত কাম আৰম্ভ কৰা আৰু চহৰখনক অসমৰ দ্বিতীয় ৰাজধানী হিচাপে প্ৰতিষ্ঠা কৰাৰ পদক্ষেপ গ্ৰহণ কৰা আদি অন্যতম৷ অসম চৰকাৰে ডিব্ৰুগড়ৰ গৌৰৱময় অতীতক পুনৰুদ্ধাৰ কৰি চহৰখনক পূব ভাৰতৰ এক প্ৰধান অৰ্থনৈতিক আৰু সাংস্কৃতিক কেন্দ্ৰ হিচাপে পুনৰ নিৰ্মাণৰ বাবে এক বিস্তৃত পৰিকল্পনাৰ কাম কৰি আছে৷ ডিব্ৰুগড়ৰ মুখ্যমন্ত্ৰীৰ সচিবালয়ে কেইটামান বিশেষ দিশত যথেষ্ট গুৰুত্বপূৰ্ণ ভূমিকা পালন কৰিছে৷ নিয়মীয়া পৰ্যালোচনা বৈঠকৰ ফলত কেবিনেটৰ সিদ্ধান্ত, আঁচনি আৰু আন্তঃগাঁথনিমূলক প্ৰকল্পসমূহৰ ৰূপায়ণ ত্বৰান্বিত হৈছে, যাৰ ফলত আৰ্থ-সামাজিক উন্নয়নত ইতিবাচক প্ৰভাৱ পৰিব বুলিও আশা ব্যক্ত কৰিছে মুখ্যমন্ত্ৰী হিমন্ত বিশ্ব শৰ্মাই৷ আনহাতে এই সচিবালয়ে অঞ্চলটিৰ সামাজিক সংগঠনসমূহক চৰকাৰৰ কাষলৈ লৈ অহাৰ ক্ষেত্ৰত গুৰুত্বপূৰ্ণ ভূমিকা পালন কৰিছে৷ মুখ্যমন্ত্ৰীগৰাকীয়ে ভ্ৰমণৰ সময়ছোৱাত ডিব্ৰুগড়, ধেমাজি, ঢকুৱাখনা আৰু ডিমৌ বিধানসভা সমষ্টিত ৩৫০০ কোটি টকাৰ ৫০০ৰো অধিক চলি থকা প্ৰকল্পৰ পৰ্যালোচনা বৈঠক অনুষ্ঠিত কৰে৷ এই বৈঠকত অঞ্চলটোৰ পথ, উৰণ সেতু, ঘাইপথ, চৰকাৰী ভৱন, মথাউৰি, বিদু্যৎ কেন্দ্ৰ, চিকিৎসালয়, বিদ্যালয়, ক্ৰীড়া আৰু সাংস্কৃতিক সুবিধাসমূহৰ নিৰ্মাণৰ কাম ক্ষিপ্ৰতাৰে কৰিবলৈ মুখ্যমন্ত্ৰী ড॰ শৰ্মাই বিভাগীয় কতৃৰ্পক্ষক নিৰ্দেশ দিয়ে৷ এই সমষ্টিসমূহৰ সৈতে জড়িত প্ৰতিটো কেবিনেট ঘোষণাৰ ওপৰত এখন অগ্ৰগতিৰ প্ৰতিবেদন বৈঠকসমূহত মুখ্যমন্ত্ৰীগৰাকীয়ে পৰ্যালোচনা কৰে৷ আন্তঃগাঁথনি প্ৰকল্পৰ উপৰি কেন্দ্ৰীয় চৰকাৰৰ মূল আঁচনি আৰু মাতৃ স্বাস্থ্য, প্ৰতিষ্ঠানিক প্ৰসৱ ইত্যাদি জটিল আৰ্থ-সামাজিক সূচকসমূহৰ ৰূপায়ণো পৰীক্ষা কৰে ড॰ শৰ্মাই৷ মুখ্যমন্ত্ৰীগৰাকীয়ে সামগ্ৰিকভাৱে এই অঞ্চলসমূহৰ প্ৰতিটো ঘৰৰ বাবে সৰল জীৱন-যাপনৰ বাবে ব্যতিক্ৰমী লাভ অৰ্জন কৰা বুলি উল্লেখ কৰি কয় যে এই বিস্তৃত বৈঠকসমূহৰ ফলাফলে প্ৰতিটো পৰিয়ালে ভাল ঘৰ, পথ, বিদ্যুৎ, বিদ্যালয় আৰু স্বাস্থ্যসেৱাৰ বিকল্পৰ সুবিধা লাভ কৰাটো নিশ্চিত কৰিব৷ ডিব্ৰুগড়ক দ্বিতীয় ৰাজধানী হিচাপে গঢ়িবলৈ আমি এই বৃহত্তৰ অঞ্চলৰ সৰ্বাংগীণ বিকাশ-উন্নয়নত গুৰুত্ব প্ৰদান কৰিছোঁ৷ তেওঁ লগতে কয়, বিশেষভাৱে ডিব্ৰুগড়ৰ বাবে মই নগৰীয়া বানপানীৰ সমস্যা দূৰ কৰাৰ বাবে এখন বিস্তৃত বৈঠকৰ অধ্যক্ষতাও কৰিছিলোঁ৷ মই জনাবলৈ পাই সুখী হৈছোঁ যে আমি বৰ্তমানৰ নলাবোৰ ডিচিলটিং, নতুন নলা নিৰ্মাণ আৰু ডিৱাটাৰিং পাম্প আৰু মিনি ছুপাৰ চকাৰ ক্ৰয়ৰ ক্ষেত্ৰত উৎকৃষ্ট অগ্ৰগতি লাভ কৰিছোঁ৷

ডিব্ৰুগড় ভ্ৰমণৰ সময়ছোৱাত খনিকৰ ষ্টেডিয়ামো পৰিদৰ্শন কৰে মুখ্যমন্ত্ৰী হিমন্ত বিশ্ব শৰ্মাই, য’ত আসনৰ ক্ষমতা ৫০০ শতাংশ বৃদ্ধি কৰাৰ চেষ্টা কৰি আছে৷ লগতে ডিব্ৰুগড়ত হ’বলগীয়া অসম বিধানসভাৰ কমপ্লেক্স আৰু বিধায়ক আৱাসৰ প্ৰস্তাৱিত স্থানো পৰিদৰ্শন কৰে মুখ্যমন্ত্ৰীয়ে৷ ২০২৭ চনৰ ভিতৰত এই কমপ্লেক্সটোৰ নিৰ্মাণ সম্পূৰ্ণ হ’ব বুলি মুখ্যমন্ত্ৰীগৰাকীয়ে আশা প্ৰকাশ কৰে৷ ব্ৰহ্মপুত্ৰ ক্ৰেকাৰ এণ্ড পলিমাৰ লিমিটেডে সন্মুখীন হোৱা সমস্যাসমূহৰ বিষয়ে গুৰুত্ব প্ৰদান কৰি মুখ্যমন্ত্ৰীগৰাকীয়ে এই ভ্ৰমণৰ সময়তে বিচিপিএলো পৰিদৰ্শন কৰে৷ ডিব্ৰুগড়ত কেবিনেট মন্ত্ৰীসকলৰ সৈতে এখন গুৰুত্বপূৰ্ণ কেবিনেট বৈঠকতো অংশগ্ৰহণ কৰে মুখ্যমন্ত্ৰী হিমন্ত বিশ্ব শৰ্মাই৷ য’ত কিছুমান উল্লেখনীয় সিদ্ধান্ত গ্ৰহণ কৰে অসম কেবিনেটে৷ যেনে ডিব্ৰুগড়, শিলচৰ আৰু গুৱাহাটী পৌৰ এলেকাত বাণিজ্যিক প্ৰতিষ্ঠানসমূহ ২৪ ঘণ্টাই খোলা থাকিবলৈ দিয়া আৰু চাহ বাগিচা আৰু মৰাণ সমাজৰ বাবে কেইবাটাও কল্যাণমূলক ব্যৱস্থাৰ লগতে অন্যান্য গুৰুত্বপূৰ্ণ সিদ্ধান্ত গ্ৰহণ কৰা হয়৷ চুবুৰীয়া অৰুণাচল প্ৰদেশত বাস কৰা কিন্তু অসমত স্থায়ী বাসস্থান বা পূৰ্বপুৰুষৰে সম্পৰ্ক থকা মৰাণ সম্প্ৰদায়ৰ লোকসকলক শৈক্ষিক উদ্দেশ্যত পি আৰ চি প্ৰদানত কেবিনেটে অনুমোদন জনায়৷ মুখ্যমন্ত্ৰীয়ে ২৯টা ই-ফাইল নিষ্পত্তি কৰাৰ লগতে ১৮টা বিধানসভাৰ প্ৰশ্ন অনুমোদন কৰে ডিব্ৰুগড়ৰ মুখ্যমন্ত্ৰী সচিবালয়ৰ পৰাই৷ লগতে ১০৬খন ইউ অ’ পত্ৰত স্বাক্ষৰ আৰু অনুমোদন জনায়৷ তেওঁ প্ৰধানমন্ত্ৰী, কেন্দ্ৰীয় ৰাসায়নিক আৰু সাৰ মন্ত্ৰী আৰু ভাৰত চৰকাৰৰ সাৰ বিভাগৰ সচিবলৈ অঞ্চলটোৰ উন্নয়ন সম্পৰ্কীয় কিছুমান গুৰুত্বপূৰ্ণ বিষয়ৰ ৩খন ডি অ’ পত্ৰত স্বাক্ষৰ কৰে৷ মটক জনগোষ্ঠীৰ সদৌ অসম মটক সন্মিলন, সদৌ অসম মটক মহিলা পৰিষদ, সদৌ অসম মটক ছাত্ৰ সন্থা, সদৌ অসম মটক যুৱ-ছাত্ৰ সন্মিলনৰ প্ৰতিনিধিবৰ্গৰ সৈতে এখন বৈঠকত মিলিত হয় মুখ্যমন্ত্ৰী শৰ্মাই৷ বৈঠকত জনগোষ্ঠীটোৰ জনজাতিকৰণ, অৰুণাচলত থকা মটক জনগোষ্ঠীয় লোকসকলক অসম চৰকাৰৰ পি আৰ চি প্ৰদান, গছতলৰ বিহুৰ প্ৰচাৰ, মটক ৰজাদিনীয়া সম্পদৰ সংৰক্ষণ, কীৰ্তিচিহ্নসমূহ বেদখলমুক্তকৰণ, গুৱাহাটীত মটক ভৱন নিৰ্মাণ, মটক স্বায়ত্তশাসিত পৰিষদত মহিলাৰ সংৰক্ষিত আসন বৃদ্ধিকে ধৰি গুৰুত্বপূৰ্ণ বিষয়সমূহ আলোচনা কৰা হয়৷ ডিব্ৰুগড়ত থকাৰ সময়ছোৱাত জনসাধাৰণ, নাগৰিক সমাজ আৰু সামূহিক সংগঠনৰ সদস্যসকলৰ সৈতে মুখ্যমন্ত্ৰীগৰাকীয়ে অন্তৰংগ সাক্ষাতত মিলিত হয়৷ অসম চৰকাৰে আগবঢ়োৱা সেৱা সম্পৰ্কত তেওঁলোকৰ মতামত বুজিবলৈ চেষ্টা কৰাৰ লগতে তেওঁলোকৰ পৰামৰ্শ, সমস্যাসমূহো মনপুতি শুনি সমাধান যথাসাধ্য সকলো সমাধানৰ আশ্বাস প্ৰদান কৰে মুখ্যমন্ত্ৰী ড॰  শৰ্মাই৷ মুখ্যমন্ত্ৰীয়ে তিনিচুকীয়া, ডিব্ৰুগড় আদি অঞ্চলৰ দলীয় কাৰ্যকৰ্তাসকলকো লগ কৰি অঞ্চলটোৰ সাংগঠনিক বিষয়সমূহৰ বুজ লয়৷