ঘনে ঘনে কঁপি উঠিল অসমো

‘আমাৰ অসম’ৰ মহানগৰৰ বিশেষ প্ৰতিবেদক, ২৮ মাৰ্চঃ  উত্তৰ পূৰ্বাঞ্চলৰ গাতে লগা ম্যানমাৰসহ দক্ষিণ পূব এছিয়াৰ কেবাখনো দেশত শুকুৰবাৰে দিনৰ ভাগত কেবাটাও বিধংসী ভূমিকম্পই জোকাৰি যায়৷ ভাৰতীয় মান সময় অনুসৰি দিনৰ ১১.৫০ বজাৰ পৰা নিশা ৮.২০ বজালৈ মাত্ৰ ৯ ঘণ্টাৰ ভিতৰতে ১২ টাকৈ সৰু-বৰ ভূমিকম্পৰ জোকাৰণি অনুভূত  হয়৷ য’ত ৰিখটাৰ স্কেলত ৭ বা প্ৰাৱল্যতকৈ অধিক কম্পনাংকৰ দুটা ভূমিকম্পই জোকাৰি যায়৷ এই দুয়োটা ভূমিকম্পৰ অভিকেন্দ্ৰ বা উৎপত্তিস্থল আছিল চুবুৰীয়া মণিপুৰৰ গাতে লগা ম্যানমাৰ৷ ১২টা ভূমিকম্পৰ ভিতৰত জ্ঝ টাৰ অভিকেন্দ্ৰ ম্যানমাৰ হোৱাৰ বিপৰীতে দুটাৰ অভিকেন্দ্ৰ আছিল চুবুৰীয়া ৰাজ্য মণিপুৰ আৰু মেঘালয়ৰ দক্ষিণ গাৰো পাহাৰ জিলা৷ উল্লেখ্য যে উত্তৰ পূৰ্বাঞ্চলৰ চুবুৰীয়া দেশ ম্যানমাৰত অনুভূত হোৱা ভূমিকম্পৰ কঁপনিৰ প্ৰভাৱ অসমতো পৰা পৰিলক্ষিত হয়৷ আনহাতে জানুৱাৰী মাহৰ পৰা অসমসহ উত্তৰ পূবত প্ৰায় তিনিটা মাহৰ ভিতৰতে ২০ টাকৈ সৰু - বৰ ভূমিকম্পই জোকাৰি গৈছে অসমসহ উত্তৰ পূবৰ কেইবাখনো ৰাজ্য৷

অৱশ্যে শুকুৰবাৰে হোৱা ভূমিকম্পৰ ফলত ম্যানমাৰ, থাইলেণ্ড আদি দেশত ব্যাপক হাৰত ধন - জন, সা - সম্পত্তিৰ ক্ষতিসাধন হলেও অসমসহ উত্তৰ পূবত জোকাৰণিৰ তীব্ৰতা কম হোৱা বাবে এই পৰ্যন্ত ভূমিকম্পৰ ফলত সা-সম্পত্তি কিম্বা ধন-জনৰ ক্ষয়-ক্ষতি হোৱাৰ বাতৰি পোৱা হোৱা নাই৷  বৰঝাৰস্থিত আঞ্চলিক বতৰ বিজ্ঞান কেন্দ্ৰই সদৰি কৰা অনুসৰি শুকুৰবাৰে প্ৰথমটো ভূমিকম্পৰ জোকাৰণি অনুভূত হয় ভাৰতীয় মান সময় অনুসৰি দুপৰীয়া ১১ বাজি ৫০ মিনিট ৫২ ছেকেণ্ডত৷ ভূমিকম্পটোৰ ৰিখটাৰ স্কেলত প্ৰাবল্যৰ পৰিমাণ আছিল ৭.২ কল্পনাংক আৰু অভিকেন্দ্ৰ আছিল ম্যানমাৰৰ পৰা ১০ কিঃ মিঃ গভীৰতাত৷ তাৰ মাত্ৰ ২২ মিনিট পাছত ভাৰতীয় মান সময় অনুসৰি দুপৰীয়া ১২ বাজি ২মিনিট ৭ ছেকেণ্ডত দ্বিতীয়টো ভূমিকম্পৰ জোকাৰণি অনুভূত হয়৷ সেই ভূমিকম্পটোৰ ৰিখটাৰ স্কেলত প্ৰাবল্যৰ পৰিমাণ আছিল ৭.০ কম্পনাংক আৰু অভিকেন্দ্ৰ আছিল ম্যানমাৰৰ ১০ কিলোমিটাৰ গভীৰতাত৷ তাৰ পাছত একাদিক্ৰমে নিশা ৮.২০ বজালৈ ধাৰাবাহিক আহি থাকে সৰু - বৰ ১২ টাকৈ ভূমিকম্প৷ উত্তৰ পূবৰ মণিপুৰ আৰু মেঘালয়ত অভিকেন্দ্ৰ থকা তিনিওটা ভূমিকম্পৰ ৰিখটাৰ স্কেলত প্ৰাবল্যৰ পৰিমাণ আছিল ৩.৭ ৰ পৰা ৪.৩ কম্পনাংকৰ ভিতৰত থকা বাবে অসমসহ উত্তৰ পূৰ্বাঞ্চলত বিশেষ ক্ষতিসাধন নহল৷  তাৎপৰ্যপূৰ্ণভাৱে অসমৰ গাতে লগা এখন ৰাজ্য আৰু সেই ৰাজ্যৰ গাতে লগা এখন দেশত মাত্ৰ  ৯ ঘণ্টাৰ ভিতৰত ১২ টাকৈ ভূমিকম্পই জোকাৰি যোৱা আৰু আটাইকেইটা ভূমিকম্পৰ অভিকেন্দ্ৰ ওচৰা-ওচৰিকৈ হোৱা বাবে আগন্তুক দিনত বিশ্বৰ অন্যতম ভূ-কম্পন অঞ্চল হিচাপে পৰিচিত অসমসহ উত্তৰ পূবত বৃহৎ বা উচ্চ প্ৰাবল্যৰ ভূমিকম্প আহিব পাৰে নেকি তাক লৈ ভূ-তত্ত্ব বিজ্ঞানীসকল চিন্তিত হৈ পৰিছে৷