টিকট শেষ, গুৱাহাটীত ধোনিক লৈ উন্মাদনা

‘আমাৰ অসম’ৰ গুৱাহাটীৰ প্ৰতিবেদক, ২৯ মাৰ্চঃ  গুৱাহাটীত এতিয়া চাৰিওফালে আই পি এলৰ উন্মাদনা৷ ইণ্ডিয়ান প্ৰিমিয়াৰ লীগৰ ১৮ সংখ্যক সংস্কৰণৰ বৰ্ষাপাৰা ষ্টেডিয়ামত অনুষ্ঠিত হ’বলগীয়া অন্তিমখন মেচক লৈ সমগ্ৰ গুৱাহাটীয়েই এতিয়া যেন ক্ৰিকেট জ্বৰত  আক্ৰান্ত৷ ৩০ মাৰ্চ অৰ্থাৎ দেওবাৰে বৰ্ষাপাৰা ক্ৰিকেট ষ্টেডিয়ামত সন্ধিয়া ৭.৩০ বজাত অনুষ্ঠিত হ’ব ঘৰুৱা দল ৰাজস্থান ৰয়েলছ আৰু চেন্নাই ছুপাৰ কিংছৰ মাজত এখন হাইভেল্টজ মেচ৷ দেওবাৰৰ মেচখনক লৈ ক্ৰীড়াপ্ৰেমীৰ উৎকণ্ঠাৰ অন্যতম কাৰণ হৈছে অধিনায়ক হিচাপে অসম সন্তান ৰিয়ান পৰাগৰ আই পি এলৰ অন্তিমখন মেচ৷ পূৰ্বৰ দুখন খেলত পৰাজয় বৰণ কৰাৰ পাছত ৰিয়ানে এইখন মেচত শ্ৰেষ্ঠতম প্ৰদৰ্শনৰ আশা কৰিছে অনুৰাগীসকলে৷ লক্ষণীয়ভাৱে কাইলৈ বৰ্ষাপাৰাৰ মেচখনক লৈ ক্ৰিকেটানুৰাগীৰ উন্মাদনাৰ আন এক কাৰণ হৈছে চেন্নাই ছুপাৰ কিংছৰ প্ৰাক্তন অধিনায়ক মহেন্দ্ৰ সিং ধোনি৷ ভাৰতীয় ক্ৰিকেট দলৰ পৰা অৱসৰ ল’লেও আই পি এলত অংশ লোৱা মহেন্দ্ৰ সিং ধোনিক এবাৰ ওচৰৰ পৰা চাবলৈ উৎকণ্ঠাৰ অন্ত নাই অনুৰাগীসকলৰ৷ মহেন্দ্ৰ সিং ধোনিৰ চেন্নাই ছুপাৰ কিংছৰ বৰ্ষাপাৰা মেচখনৰ ইতিমধ্যে সকলো টিকট বিক্ৰী হৈ গৈছে৷ দেওবাৰৰ মেচখনৰ একোটা টিকট সৰ্বাধিক ৩৫ হাজাৰ টকাত বিক্ৰী হৈছে৷ কাইলৈ মেচখনৰ আন এক অন্যতম আকৰ্ষণ হৈছে বলীউদৰ মোহময়ী অভিনেত্ৰী ছাৰা আলী খান৷

কিয়নো কাইলৈৰ মেচখনৰ প্ৰাকমুহূৰ্তত ছাৰা আলী খানে এটা নৃত্যানুষ্ঠানত অংশ ল’ব৷ ইতিমধ্যে গুৱাহাটীত আহি উপস্থিত হোৱা বলীউদৰ অভিনেত্ৰীগৰাকীয়ে নৃত্যানুষ্ঠানৰ অনুশীলনতো অংশ লৈছে৷ ১৫-২০ মিনিটৰ এই অনুষ্ঠান পৰিৱেশনৰ বাবদ ছাৰা আলী খানে ৰ কোটি টকাৰ ওপৰত মাননি লোৱা বুলিও জানিব পৰা গৈছে৷ উল্লেখ্য, ৰাজস্থান ৰয়েলছ আৰু কলকাতা নাইট ৰাইডাৰ্ছৰ মাজত চ্ছ মাৰ্চত বৰ্ষাপাৰাত হোৱা প্ৰথমখন মেচত বলিউড অভিনেত্ৰী জেকুলিনা ফাৰ্নাণ্ডেজে নৃত্যানুষ্ঠান পৰিৱেশনৰ কথা আছিল যদিও শেষ মুহূৰ্তত মাতৃৰ অসুস্থতাৰ বাবে অভিনেত্ৰীগৰাকীয়ে গুৱাহাটীৰ উক্ত কাৰ্যসূচী বাতিল কৰিছিল৷ জেকুলিনা ফাৰ্নাণ্ডেজৰ পৰিৱৰ্তে দেওবাৰে অভিনেত্ৰী ছাৰা আলী খানে নৃত্যানুষ্ঠানত ভাগ ল’ব৷ উল্লেখ্য, ২৫ মাৰ্চত গুৱাহাটীত আহি উপস্থিত হোৱা ৰাজস্থান ৰয়েলছৰ দলটো বৰ্তমান ৰেডিশ্বন ব্লু হোটেলতে বাহৰ পাতি আছে যদিও চেন্নাই ছুপাৰ কিংছৰ দলটোৱে শনিবাৰে সন্ধিয়া বিশেষ বিমান যোগে বৰঝাৰত আহি উপস্থিত হয়৷ মহেন্দ্ৰ সিং ধোনিয়ে বৰঝাৰত আহি উপস্থিত হোৱাৰ সময়ত তেওঁক প্ৰত্যক্ষ কৰাৰ বাবে অনুৰাগীয়ে বিমান বন্দৰত ভিৰ কৰা পৰিলক্ষিত হয়৷ ৰেডিশ্বন ব্লু হোটেলত কটাবলগীয়া মহেন্দ্ৰ সিং ধোনিসহ চেন্নাই ছুপাৰ কিংছৰ খেলুৱৈ সকলে কাইলৈ পুৱা বৰ্ষাপাৰাত অনুশীলনতো অংশ ল’ব৷ ইফালে কাইলৈ মেচখনক লৈ ক’লা বজাৰত চৰা দামত বিক্ৰী হৈছে টিকট৷ একাংশই অ’ এল এক্স, ফেচবুক, ইনষ্ট্ৰাগ্ৰামকে ধৰি ছ’চিয়েল মিডিয়াত মুকলিকৈ অধিক দামত টিকট বিক্ৰীৰ বিজ্ঞাপন দিয়াও পৰিলক্ষিত হৈছে৷