এণ্টিবায়’টিকসহ প্ৰায় ৯০০বিধ ঔষধৰ মূল্যবৃদ্ধি
‘আমাৰ অসম’ৰ গুৱাহাটীৰ প্ৰতিবেদক, ২ এপ্ৰিলঃ নতুন বিত্তীয় বৰ্ষৰ প্ৰথমটো দিনতে জনতাৰ মূৰত পুনৰ ৰাম টাঙোন সোধালে প্ৰধানমন্ত্ৰী নৰেন্দ্ৰ মোদী চৰকাৰে৷ ২০২৫-২৬ বিত্তীয় বৰ্ষৰ প্ৰথম দিন অৰ্থাৎ পহিলা এপ্ৰিলৰ পৰা সমগ্ৰ দেশতে বৃদ্ধি পালে অত্যাৱশ্যকীয় ঔষধৰ মূল্যৰ লগতে টোলগেটৰ মাচুল৷ ৰাষ্ট্ৰীয় ঔষধ মূল্য নিৰ্ধাৰণ কতৃৰ্পক্ষই পহিলা এপ্ৰিলৰ পৰা কাৰ্যকৰী হোৱাকৈ কৰ্কট ৰোগ, মধুমেহ, হূদৰোগ, যকৃতজনিত ৰোগ আৰু এণ্টিবায়টিক্ছকে ধৰি প্ৰায় ৯০০ বিধ ঔষধৰ দাম বৃদ্ধিত অনুমোদন জনাইছে৷ ফাৰ্মা কোম্পানীসমূহৰ আবেদনৰ ভিত্তিত কেন্দ্ৰীয় ঔষধ মূল্য নিৰ্ধাৰণ কতৃৰ্পক্ষই সংশি¡ষ্ট প্ৰতিবিধ ঔষধৰ বিপৰীতে ১.৭ শতাংশ পৰ্যন্ত দাম বৃদ্ধিত অনুমোদন জনাইছে৷ সেই অনুসৰি মঙলবাৰৰ পৰা ক’লেষ্টেৰল, ইনছুলিন, ডায়েৰিয়া, গেষ্ট্ৰ’, পক্ষাঘাত ইত্যাদি ঔষধৰো দাম বৃদ্ধি পাইছে৷ এনপিপিএৰ তথ্য অনুসৰি মুদ্ৰাস্ফীতি ভিত্তিক মূল্য পুনৰীক্ষণৰ বাবে ঔষধৰ দাম বৃদ্ধি কৰা হৈছে৷ নতুন নিৰিখ অনুসৰি এতিয়া সাধাৰণ জ্বৰ হ’লে চিকিৎসকে নিদান হিচাপে দিয়া এজিথ্ৰ’মাইচিন এণ্টিবাৰ্য়টিকৰ ২৫০ মিলিগ্ৰাম আৰু ৫০০ মিলিগ্ৰাম প্ৰতিটো ঔষধৰ দাম হ’বগৈ ক্ৰমে ১১.৮৭ টকা আৰু ২৩.৯৮ টকা৷ একেদৰে বিষনাশক ডাইক্ল’ফিনাক ঔষধৰো দাম বৃদ্ধি পাব৷ তদুপৰি ৰক্তহীনতা প্ৰতিৰোধী ঔষধ, ভিটামিন, খনিজ পদাৰ্থৰ লগতে একাংশ ষ্টেৰইড আৰু মৰ্ফিনৰ দৰে কৰ্কট ৰোগৰ বেদনানাশক দৰৱৰো দাম বৃদ্ধি পাইছে৷ একেদৰে জ্বৰ, বমি, ইনছুলিন, হাঁপানী আৰু মানসিক ৰোগৰ অত্যাৱশ্যকীয় ঔষধৰ লগতে বিশেষ কেইবাবিধো জীৱনদায়িনী দৰৱৰ দাম বৃদ্ধি পাইছে৷ তাৎপৰ্যপূৰ্ণ বিষয়টো হৈছে কেৱল ঔষধৰ দাম বৃদ্ধি পোৱাই নহয়, ষ্টেণ্টকে ধৰি বিভিন্ন কাৰ্ডিয়াক আৰু অৰ্থপেডিক ইমপ্লাণ্টৰো মূল্য আজিৰে পৰা আকাশলংঘী হৈ পৰিল৷ ঔষধৰ দাম বৃদ্ধিৰে জনতাক দুৰ্যোগৰ মুখলৈ ঠেলি দিয়াৰ সময়তে ৰাজ্যৰ বহুবল্কী স্বাস্থ্যমন্ত্ৰী অশোক সিংঘালৰ এটা মন্তব্যই ৰাইজক খৰ্গহস্ত কৰি তোলা দেখা গৈছে৷
ঔষধৰ মূল্যবৃদ্ধিৰ প্ৰতিক্ৰিয়া ব্যক্ত কৰি মন্ত্ৰী সিংঘালে মঙলবাৰে সংবাদ মাধ্যমৰ আগত কয়– ‘চৰকাৰে ১৪খন মেডিকেল কলেজ বনাইছে, চিকিৎসা সেৱা উন্নত কৰা হৈছে৷ তেনেক্ষেত্ৰত ৰাইজে বে-চৰকাৰী হাস্পতাললৈ কিয় যাব লাগে? চৰকাৰী চিকিৎসালয়ত ঔষধ বিনামূলীয়া কৰা হৈছে৷ গতিকে সাধাৰণ জনতাৰ ঔষধৰ মূল্যবৃদ্ধি কোনো অনুভৱে নহয়৷’ মন্ত্ৰী অশোক সিংঘালৰ এই বক্তব্যৰ বিপৰীতে অত্যাৱশ্যকীয় ঔষধৰ দাম বৃদ্ধিৰ ফলত দৰিদ্ৰ আৰু মধ্যবিত্ত শ্ৰেণীৰ সৰ্বসাধাৰণ ৰোগী আৰু ৰোগীৰ অভিভাৱকৰ যে পানীত হাঁহ নচৰা অৱস্থাৰ সৃষ্টি হ’ব, সেয়া নক’লেও স্পষ্ট হৈ পৰিছে৷ ইফালে, ঔষধৰ সমান্তৰালভাৱে ৰাষ্ট্ৰীয় ঘাইপথৰ টোলগেটৰো মাচুল মঙলবাৰৰ পৰা ৪-৫ শতাংশ পৰ্যন্ত বৃদ্ধি পাইছে৷ ৰাষ্ট˜ীয় ঘাইপথ প্ৰাধিকৰণে দেশজুৰি টোলগেটৰ মাচুল বৃদ্ধিৰ কথা ঘোষণা কৰিছে৷ নেচনেল হাইৱে ফীজ [ডিটাৰমিনেশ্বন অৱ ৰেট্ছ এণ্ড কালেকশ্বন] ৰুল্ছ-২০০৮১ অধীনত দেশৰ ৮৫৫খন টোলগেটতে বাৰ্ষিক মাচুল বৃদ্ধি কৰা হৈছে৷ মাচুল বৃদ্ধি হোৱা টোলগেটৰ ৬৭৫খন হৈছে এন এইচ এ আইৰ দ্বাৰা পৰিচালিত টোলগেট আৰু ১৮০খন হৈছে ব্যক্তিগত সংস্থাৰ অধীনৰ টোলগেট৷ ৰাষ্ট্ৰীয় ঘাইপথ প্ৰাধিকৰণৰ অসমৰ জ্ঝখন টোলগেটতে মঙলবাৰৰ পৰা ৪-৫ শতাংশ মাচুল বৃদ্ধি পাইছে৷ লক্ষণীয় বিষয়টো হৈছে অসমৰ ৯খন টোলগেটৰ পৰা বিগত ২০১৯-২০ বৰ্ষৰ পৰা ২০২৩-২৪ বৰ্ষলৈ ৫ বছৰত সৰ্বমুঠ ১,৪৫৮.০৬ কোটি টকা টোলকৰ সংগ্ৰহ কৰিছে৷ এই সময়ছোৱাত মদনপুৰ টোলগেটৰ পৰাই সৰ্বাধিক ৩৭৭.১৫ কোটি টকা টোল কৰ সংগ্ৰহ কৰা হৈছে৷ ইফালে, বিহুৰ পাছতেই চৰকাৰে কলিয়াবৰৰ চুলুং, বিশ্বনাথ আৰু দেৰগাঁৱত তিনিখন টোলগেট মুকলি কৰাৰ বাবেও সাজু হৈছে৷