বাণিজ্যিক চিলিণ্ডাৰৰ দাম কমিল

‘আমাৰ অসম’ৰ গুৱাহাটীৰ প্ৰতিবেদক, ২ এপ্ৰিলঃ  অত্যাৱশ্যকীয় ঔষধ আৰু টোলগেটৰ মাচুল বৃদ্ধিৰ মাজতে তেল কোম্পানীসমূহে পহিলা এপ্ৰিলত গ্ৰাহকৰ বাবে দিলে এটা আশাৰ বাৰ্তা৷ পহিলা এপ্ৰিল অৰ্থাৎ মঙলবাৰৰ পৰা দেশজুৰি বাণিজ্যিক ৰন্ধন গেছৰ চিলিণ্ডাৰৰ দাম হ্ৰাস পালে৷ তেল বিপণন কোম্পানীসমূহে ১৯ কিলোগ্ৰাম ওজনৰ বাণিজ্যিক এলপিজি চিলিণ্ডাৰৰ বিপৰীতে ৪১ টকাকৈ দাম হ্ৰাস কৰিছে৷ ফাকুৱাৰ পূৰ্বে তেল কোম্পানীসমূহে বাণিজ্যিক গেছ চিলিণ্ডাৰৰ বিপৰীতে ৬ টকাকৈ দাম বৃদ্ধি কৰিছিল যদিও মঙলবাৰে একেবাৰতে বাণিজ্যিক চিলিণ্ডাৰৰ দাম ৪১ টকা পৰ্যন্ত হ্ৰাস কৰিছে৷ নতুন নিৰিখত দেশৰ ৰাজধানী চহৰ নতুন দিল্লীত মঙলবাৰে প্ৰতিটো বাণিজ্যিক চিলিণ্ডাৰত খুচুৰা বিক্ৰী মূল্য ১,৭৬২ টকালৈ হ্ৰাস পাইছে৷

আনহাতে, মুম্বাইত ১,৭১৪.৫০ টকা, কলকাতাত ১,৮৭২ টকা, চেন্নাইত ১,৯২৪.৫০ টকা আৰু গুৱাহাটীতো বাণিজ্যিক চিলিণ্ডাৰৰ মূল্য ১,৯৫৮.৫০ টকালৈ হ্ৰাস পায়৷ গুৱাহাটীত সৰ্বাধিক ৪৪ টকা  দাম হ্ৰাস পাইছে৷ তেল কোম্পানীসমূহে বাণিজ্যিক চিলিণ্ডাৰৰ মূল্য হ্ৰাস কৰাত হোটেল, ৰেস্তোৰাঁৰ ব্যৱসায়ীসকলে কিছু সকাহ লাভ কৰা দেখা গৈছে৷ অৱশ্যে, বাণিজ্যিক চিলিণ্ডাৰৰ দাম হ্ৰাস পালেও ১৪ কেজি ওজনৰ ঘৰুৱা ৰন্ধন গেছৰ চিলিণ্ডাৰৰ মূল্য অপৰিৱৰ্তশীল হৈ আছে৷ অৰ্থাৎ ৰন্ধন গেছ ব্যৱহাৰকাৰী সৰ্ব সাধাৰণ গ্ৰাহকে কোনো সকাহ নাপালে৷