লোকসভাত আজি ৱাক্ফ বিলক লৈ ভোটগ্ৰহণ
‘আমাৰ অসম’ৰ ষ্টাফ ৰিপ’ৰ্টাৰ, ২ এপ্ৰিলঃ ৱাক্ফ সংশোধনী বিধেয়ক যিকোনো প্ৰকাৰে সংসদত গৃহীত কৰিবলৈ যুদ্ধংদেহী বিজেপি নেতৃত্বাধীন মিত্ৰজোঁটৰ চৰকাৰ৷ বিধেয়কখনক লৈ শাসকীয় দলৰ মাজত অব্যাহত আছে তীব্ৰ উত্তেজনা৷ বিধেয়কখন গৃহীত কৰিবলৈ গৈ চৰকাৰ যাতে শ’লঠেকত নপৰে তাৰ বাবে বুধবাৰে এনডিএ মিত্ৰজোঁটৰ অংশীদাৰী দলসমূহৰ সকলো সাংসদক গোটেই দিনটো লোকসভাত উপস্থিত থাকিবলৈ হুইপ জাৰি কৰা হৈছে৷ হুইপত স্পষ্টভাৱে কোৱা হৈছে যে লোকসভাত এখন অতি গুৰুত্বপূৰ্ণ বিধেয়ক উত্থাপন কৰা হ’ব৷ বিধেয়কখন গৃহীত কৰিবলৈ হ’লে সমৰ্থন আৰু ভোট দিবলগীয়া হ’ব পাৰে৷ উল্লেখ্য, সপ্তদশ লোকসভাত বিজেপিৰ ২৪০জন সদস্য আছে৷ চৰকাৰে এই বিধেয়কখন গৃহীত কৰিবলৈ হ’লে মিত্ৰদল জেডিইউ আৰু টিডিপিৰ ওপৰত নিৰ্ভৰ কৰিব লাগিব৷ নৰেন্দ্ৰ মোদী চৰকাৰ উক্ত দল দুটাৰ ওপৰত নিৰ্ভৰশীল৷ ৰামবিলাস পাছোৱান নেতৃত্বাধীন জনশক্তি পাৰ্টীয়ে এইপৰ্যন্ত ৱাকফ্ সংশোধনী বিধেয়কত সমৰ্থন জনোৱা নাই৷ আনহাতে, বিধেয়খনক লৈ জেডিইউৰ স্থিতিও স্পষ্ট নহয়৷ জেডিইউৰ নেতা লালন সিঙে ইতিমধ্যে জনাইছে যে লোকসভাৰ মজিয়াতহে বিধেয়কখনক লৈ সিদ্ধান্ত ল’ব৷ সংসদীয় পৰিক্ৰমা বিভাগৰ মন্ত্ৰী কিৰেণ ৰিজিজু যথেষ্ট আত্মবিশ্বাসী যে চৰকাৰৰ মিত্ৰজোঁটৰ অংশীদাৰী দলসমূহৰ উপৰি বিৰোধী দলসমূহৰ কিছুসংখ্যক সাংসদেও বিধেয়কখনক সমৰ্থন জনাব৷
লোকসভাত বিধেয়কখনক লৈ আধাঘণ্টা আলোচনা হ’ব পাৰে৷ মঙলবাৰে লোকসভাৰ অধ্যক্ষ ওম বিড়লা নেতৃত্বাধীন বিজনেছ এডভাইছৰী কমিটীৰ [বিএচি] বৈঠকত বিষয়টোক লৈ বিস্তাৰিত আলোচনা হৈছে৷ যোৱা বছৰো বিধেয়কখন সংসদত উত্থাপন কৰা হৈছিল৷ তাৰ পাছতে চৰকাৰে বিধেয়কখন সৰ্বদলীয় যৌথ কমিটীলৈ প্ৰেৰণ কৰাৰ প্ৰস্তাৱ দিছিল৷ কমিটীখনে প্ৰতিবেদন দিয়াৰ পাছত উক্ত প্ৰতিবেদনৰ ভিত্তিত বিধেয়কখনৰ কিছু সাল-সলনি কৰা হয়৷ বিএচিৰ বৈঠকত বিৰোধীয়ে বিধেয়কখনক লৈ ১২ ঘণ্টা আলোচনা কৰাৰ প্ৰস্তাৱ দিছিল৷ কিছুসংখ্যক দলে আলোচনা ৬ ঘণ্টা কৰাৰ বাবে প্ৰস্তাৱ দিলেও বিৰোধীয়ে এই আলোচনা ১২ঘণ্টা কৰাৰ দাবীত অটল থাকে৷ পাছত লোকসভাৰ অধ্যক্ষই উক্ত আলোচনা জ্জ্ব ঘণ্টা ঠিৰাং কৰে আৰু প্ৰয়োজন হ’লে সময় বঢ়াই দিয়া হ’ব বুলি কয়৷ বুধবাৰে দুপৰীয়া প্ৰশ্নোত্তৰ পৰ্ব শেষ হোৱাৰ পাছতে বিধেয়কখন আলোচনাৰ বাবে উত্থাপন কৰা হ’ব৷ এই বিধেয়কখন সংখ্যালঘু সম্প্ৰদায়ৰ ৱাকফ্ সম্পত্তিৰ পৰিচালনা আৰু ৰক্ষণাবেক্ষণ সন্দৰ্ভত গুৰুত্বপূৰ্ণ পৰিৱৰ্তন ঘটিব৷ ইফালে, মঙলবাৰে সংসদ ভৱনত নিখিল ভাৰত কংগ্ৰেছ কমিটিৰ সভাপতি আৰু ৰাজ্যসভাৰ বিৰোধী নেতা মল্লিকাজ্জুৰ্ন খৰ্গে, লোকসভাৰ বিৰোধী দলপতি ৰাহুল গান্ধী প্ৰমুখ্যে বিৰোধী নেতাসকলৰ সৈতে অনুষ্ঠিত বৈঠকত কাইলৈ সংসদত দাখিল হ’বলগীয়া ৱাকফ্ বিধেয়কখনৰ ওপৰত বিতংভাৱে আলোচনা কৰে৷