আজি পুৱা ৭ বজাৰ পৰা আৰম্ভ হৈছে ৰাভা হাছং পৰিষদৰ ভোট

‘আমাৰ অসম’ৰ গোৱালপাৰাৰ প্ৰতিবেদক, ২ এপ্ৰিলঃ  বুধবাৰে অনুষ্ঠিত হবলগীয়া ৰাভা হাছং স্বায়ত্ত্ব শাসিত পৰিষদৰ নিৰ্বাচনৰ বাবে কামৰূপ জিলাৰ লগতে গোৱালপাৰা জিলা প্ৰশাসনে সকলো ধৰণৰ ব্যৱস্থা সম্পূৰ্ণ কৰি তুলিছে৷  ৰাভা হাছং স্বায়ত্ত্ব শাসিত পৰিষদৰ মুঠ ৩৬টা সমষ্টিৰ ভিতৰত গোৱালপাৰা জিলাত ২০টা আৰু কামৰূপ জিলাত ১৬টা পৰিষদীয় সমষ্টি আছে৷ গোৱালপাৰা জিলাৰ ২০ টাৰ ভিতৰত জয়ৰামকুচি সমষ্টিত বিজেপিৰ  প্ৰাৰ্থী প্ৰেমাজুলি ৰাভা ইতিমধ্যে বিনা প্ৰতিদ্বন্দ্বিতাৰে নিৰ্বাচিত হৈছে৷ অন্য ১৯টা সমষ্টিৰ নিৰ্বাচনৰ বাবে জিলা প্ৰশাসন সম্পূৰ্ণ সাজু হৈ উঠিছে৷ গোৱালপাৰা জিলাৰ অন্তৰ্গত ১৯টা পৰিষদীয় নিৰ্বাচনৰ কাম কাজ জিলা আয়ুক্ত কাৰ্যালয়ৰ পৰাই পৰিচালিত হব৷ ১৯টা সমষ্টিৰ বিপৰীতে ৩৬২টা ভোট গ্ৰহণ কেন্দ্ৰ স্থাপন কৰা হৈছে৷ নিৰ্বাচনৰ বাবে নিয়োজিত পোলিং আৰু প্ৰিজাইডিং বিষয়া সকলে বেলট বাকচ, বেলট পেপাৰ আদি লৈ আজি ভোট গ্ৰহণ কেন্দ্ৰলৈ ৰাওনা হয়৷ ইতিমধ্যে প্ৰায় সংখ্যক ভোট গ্ৰহণকাৰী দল নিজৰ নিজৰ ভোট গ্ৰহণ কেন্দ্ৰত উপস্থিত হৈছে৷ বুধবাৰে পুৱা সাত বজাৰ পৰা বিয়লি তিনি বজালৈ ভোট গ্ৰহণ চলিব৷ জিলাখনৰ ১৯টা পৰিষদীয় সমষ্টিত ভোট গ্ৰহণৰ জৰিয়তে ৫২ গৰাকী প্ৰাৰ্থীৰ ভাগ্য নিৰ্ণয় হব৷  ১৯টা পৰিষদীয় সমষ্টিৰ বিপৰীতে ২ লাখ ৪০ হাজাৰ ২৫ গৰাকী আছে৷ 

পৰিষদীয় অঞ্চলত ৰাজহুৱা বন্ধ ঘোষণা 

‘আমাৰ অসম’ৰ, আগিয়াৰ প্ৰতিবেদকঃ  গোৱালপাৰা জিলা প্ৰশাসনে ৰাভা হাছং স্বায়ত্ত শাসিত পৰিষদীয় নিৰ্বাচনৰ ভোটগ্ৰহণৰ বাবে ২ এপ্ৰিলত পৰিষদীয় এলেকাধীন অঞ্চলত ৰাজহুৱা বন্ধ ঘোষণা কৰিছে৷ অসম ৰাজ্যিক নিৰ্বাচন আয়োগৰ সচিবৰ জাননী অনুসৰি-ৰাভা হাছং স্বায়ত্ত শাসিত পৰিষদীয় নিৰ্বাচন-২০২৫ ৰ ভোট গ্ৰহণৰ দিনাখন পৰিষদখনৰ এলেকাধীন চৰকাৰী, বেচৰকাৰী কাৰ্যালয়, শিক্ষা প্ৰতিষ্ঠান, ব্যৱসায়িক প্ৰতিষ্ঠান, বিত্তীয় প্ৰতিষ্ঠান, চাহ বাগিছা, আদি বন্ধ থাকিব বুলি গোৱালপাৰা জিলা প্ৰশাসনে ঘোষণা কৰিছে৷ 

ভোটগ্ৰহণ কেন্দ্ৰলৈ ৰাওঁনা প্ৰিজাইডিং আৰু প’লিং বিষয়া

‘আমাৰ অসম’ৰ আমিনগাঁৱৰ প্ৰতিনিধি আৰু শুৱালকুছিৰ প্ৰতিবেদকঃ   ৰাভা হাছং স্বায়ত্ত্ব শাসিত পৰিষদৰ কামৰূপ জিলাৰ অন্তৰ্গত ১৪টা পৰিষদীয় সমষ্টিৰ বাবে ২ এপ্ৰিলত ভোটগ্ৰহণ অনুষ্ঠিত হ’ব৷ জিলাখনৰ অন্তৰ্গত মুঠ ১৬টা পৰিষদীয় সমষ্টিৰ দুটাত ইতিমধ্যে দুগৰাকী প্ৰাৰ্থীয়ে বিনাপ্ৰতিদ্বন্দ্বিতাই জয়ী হৈছে৷ বুধবাৰে অনুষ্ঠিত হ’বলগীয়া এই পৰিষদীয় নিৰ্বাচনৰ বাবে আজি কামৰূপ জিলাৰ সংহত জিলা আয়ুক্ত কাৰ্যালয়ৰ পৰা ভোটগ্ৰহণ কেন্দ্ৰত নিয়োজিত প্ৰিজাইডিং আৰু প’লিং বিষয়াসকল নিৰ্বাচনৰ যাৱতীয় সা-সামগ্ৰীসহ নিজ নিজ ভোটগ্ৰহণ কেন্দ্ৰলৈ ৰাওঁনা হয়৷ জিলাখনত সুকলমে আৰু শান্তিপূৰ্ণভাৱে ভোটগ্ৰহণ প্ৰক্ৰিয়া পৰিচালনা কৰাৰ বাবে ৰ, ১৩৬ গৰাকী প্ৰিজাইডিং আৰু প’লিং বিষয়া নিয়োজিত কৰা হৈছে৷ ভোট গ্ৰহণ কেন্দ্ৰৰ সুৰক্ষা সুনিশ্চিত কৰাৰ বাবে আৰক্ষী প্ৰশাসনৰ তৰফৰ পৰা পৰ্যাপ্তসংখ্যক আৰক্ষী তথা নিৰাপত্তাৰক্ষী নিয়োগ কৰা হৈছে৷  কাইলৈ অনুষ্ঠিত হ’বলগীয়া ১৪টা ৰাভা হাছং স্বায়ত্ত শাসিত পৰিষদীয় সমষ্টিৰ বাবে মুঠ ৪৪ গৰাকী প্ৰাৰ্থী নিৰ্বাচনত অৱতীৰ্ণ হৈছে৷ এই সমষ্টি কেইটাৰ সৰ্বমুঠ ভোটাৰৰ সংখ্যা হ’ল ৰ, ৬৯, ২৫৯ গৰাকী৷ ইয়াৰে ৮২, ৪৫৮ গৰাকী পুৰুষ আৰু ৮৬, ৮০১ গৰাকী মহিলা৷ পৰিষদীয় সমষ্টিত থকা মুঠ ভোটগ্ৰহণ কেন্দ্ৰৰ সংখ্যা হ’ল ২০৯ টা৷ ইয়াৰে মুঠ ১০টা ভোটগ্ৰহণ কেন্দ্ৰ কেৱল মহিলা প্ৰিজাইডিঙ-পলিঙ বিষয়াৰ দ্বাৰা আৰু ৰটা দিব্যাংগ প্ৰিজাইডিঙ-প’লিঙ বিষয়াৰ দ্বাৰা পৰিচালিত হ’ব৷ মহিলা সকলৰ দ্বাৰা পৰিচালিত ভোটগ্ৰহণ কেন্দ্ৰৰ ভিতৰত ২টা হৈছে আদৰ্শ ভোটগ্ৰহণ কেন্দ্ৰ৷ বুধবাৰে পুৱা ৭ বজাৰ পৰা বিয়লি ৩ বজালৈ ভোট গ্ৰহণ অনুষ্ঠিত হ’ব৷ কামৰূপৰ জিলা আয়ুক্ত দেৱ কুমাৰ মিশ্ৰই এই নিৰ্বাচন মুক্ত, নিকা আৰু শান্তিপূৰ্ণভাৱে অনুষ্ঠিত কৰাত সকলোৰে সহযোগ কামনা কৰাৰ লগতে জিলাখনৰ সংশ্লিষ্ট প্ৰতিগৰাকী ভোটাৰকে তেওঁলোকৰ গণতান্ত্ৰিক অধিকাৰ সাব্যস্ত কৰি নিৰ্বাচন প্ৰক্ৰিয়া সফল কৰি তুলিবলৈ আহ্বান জনাইছে৷