চিমেন চাপৰি আঞ্চলিক ছাত্র সন্থাৰ উদ্যোগত দহদিনীয়া বিহু নাচ আৰু ঢোল বাদন কৰ্মশালা

'আমাৰ অসম'ৰ জোনাইৰ প্ৰতিবেদক, ৫ এপ্ৰিলঃ  সদৌ অসম ছাত্র সন্থাৰ চিমেন চাপৰি আঞ্চলিক সমিতিৰ উদ্যোগত আজিৰে পৰা দহদিনীয়াকৈ বিহু নাচ আৰু ঢোল বাদন কৰ্মশালাৰ আৰম্ভ হৈছে। চিমেন চাপৰি মিনি ষ্টেডিয়ামত শুভাৰম্ভ হোৱা বিহু নাচ আৰু ঢোল বাদন কৰ্মশালাত মুখ্য অতিথি হিচাপে উপস্থিত থাকি ধেমাজি জিলা ছাত্র সন্থাৰ সভাপতি সঞ্জীৱ দাসে কয়, বাপতি সাহোন ৰঙালী বিহু অসমৰ জাতীয় উৎসৱ। বিহুক নিভাঁজ আৰু শুদ্ধ ৰূপত তুলি ধৰিবলৈ অভিজ্ঞ বিহুৱতী আৰু ঢোল বাদকৰ দ্বাৰা কৰ্মশালাৰ প্ৰয়োজনীয়তা আছে। লগতে বিহুক সাৰ্বজনীন কৰাৰ বাবে সদৌ অসম ছাত্র সন্থা সদায় বদ্ধপৰিকৰ বুলি বক্তব্য আগবঢ়ায়। 

অনুষ্ঠানত চিমেন চাপৰি আঞ্চলিক ছাত্র সন্থাৰ উদ্যোগত আয়োজন কৰা ষষ্ঠদশ বাৰ্ষিক ৰঙালী বিহু আদৰণি উদযাপন সমিতিৰ সভাপতি ৰজনী সন্দিকৈ, যুটীয়া সম্পাদক লোনা গগৈ, মৃদুল হাজৰিকা, অসম সেনাৰ ধেমাজি জিলা সমিতিৰ আহ্বায়ক দেৱজিৎ মৰাণ, চিমেন চাপৰি আঞ্চলিক ছাত্র সন্থাৰ উপদেষ্টা নিপু গগৈ উপস্থিত থাকে। বিহু নাচৰ প্ৰশিক্ষণ আগবঢ়াব ডি ৱাই ২০২১ৰ বিহুৰাণী নিৰ্জুমা কাকতি আৰু ঢোল বাদনৰ প্ৰশিক্ষণ আগবঢ়াব বিশিষ্ট বিহুৱা উমানন্দ শেনচোৱাই।