সুখবৰ! কাজিৰঙাত নথিভুক্ত হ’ল ৭০ প্ৰজাতিৰ অৰ্কিড

'আমাৰ অসম'ৰ কাজিৰঙাৰ প্ৰতিবেদকঃ কাজিৰঙাত নথিভুক্ত হ’ল অৰ্কিডৰ ৭০ টা প্ৰজাতি৷ কাজিৰঙাৰ চহকী ফুল আৰু প্ৰাণীজগতৰ সমষ্টিৰ পদ্ধতিগত নথিপত্ৰৰ বাবে শেহতীয়া প্ৰচেষ্টাত অৰ্কিডৰ ওপৰত কৰা এক দ্ৰুত সমীক্ষাত এই আকৰ্ষণীয় ফলাফল প্ৰকাশ পাইছে বুলি জানিব দিছে কাজিৰঙা ৰাষ্ট্ৰীয় উদ্যান কৰ্তৃপক্ষই৷ এক প্ৰেছ নোট যোগে উদ্যান কৰ্তৃপক্ষই প্ৰকাশ কৰা মতে, প্ৰখ্যাত অৰ্কিড সংৰক্ষণবিদ ক্ষণজিৎ গগৈ, উদ্যানৰ বাগৰি বনাঞ্চলৰ বনবিষয়া বিবিত দিহিঙ্গীয়া আৰু কহঁৰা বনাঞ্চলৰ বনবিষয়া ড০ বিভূতি ৰঞ্জন গগৈৰ নেতৃত্বত চলা এক দৃশ্যমান সমীক্ষাত বিশেষকৈ ঘাঁহনি আৰু বনাঞ্চলৰ ক্ষেত্ৰখনত নতুন অভিলেখৰ তথ্য পোৱা গৈছে। সেই অনুসৰি, কাজিৰঙাত ৩৬টা বংশৰ ৭০টা অৰ্কিডৰ প্ৰজাতি লিপিবদ্ধ কৰা হৈছে৷ ইয়াৰে ৪৬ টা প্ৰজাতি এপিফাইট আৰু ২৪ টা টেৰেছট্ৰিয়েল প্ৰজাতিৰ। প্ৰেছ নোটত উল্লেখ কৰা অনুসৰি, একান্থ’ফিপিয়াম চিলেটেন্স, এৰিড’ছ অড’ৰেটা, বিয়েৰমেনিয়া বাইমেকুলেটা, বালব’ফিলাম অৰ্নাটিচিমাম, ক্লিইছ’ষ্ট’মা এপেণ্ডিকুলাটাম, ডেণ্ড্ৰ’বিয়াম জেংকিনছ, ইউলফিয়া কামৰূপা, পেৰিষ্টাইলাছ কনষ্ট্ৰিক্টাছ, ফেলেন’পচিছ মাননি, জিউক্সিন মেমব্ৰেনেচিয়া আদি অৰ্কিডৰ তথ্য লিপিবদ্ধ কৰা হৈছে। 

লগতে উল্লেখ কৰা অনুসৰি,  ইউলফিয়া ডাবিয়া, জিউক্সিন লিণ্ডলেয়ানা, নাৰ্ভিলিয়া জুলিয়ানা আদি টেৰেছট্ৰিয়েল অৰ্কিড নদীৰ পাৰৰ ঘাঁহনিত ফুলি উঠে, আনহাতে একান্থেফিপিয়াম ষ্ট্ৰিয়াটাম আৰু হেটেৰিয়া এফিনিছৰ দৰে আন কিছুমানে ঘন অৰণ্যৰ তলত ফুলি উঠে। উল্লেখযোগ্য যে, কাজিৰঙাত এই সমীক্ষাত পোৱা  বিয়েৰমেনিয়া বাইমেকুলেটা, ইউলফিয়া কামৰূপা, জিউক্সিন লিণ্ডলেয়ানা আদি প্ৰজাতি ভাৰতৰ স্থানীয়, আনহাতে বালব’ফিলাম অৰ্নাটিচিমাম আৰু এৰিথ্ৰ’ডেছ ব্লুমেই অসমত বিৰল বুলি ধৰা হয়। প্ৰেছ নোটত উল্লেখ কৰা অনুসৰি, অৰ্কিড জৰীপৰ পূৰ্বে সংৰক্ষণ সম্পৰ্কীয় এক কাৰ্যসূচী অনুষ্ঠিত কৰা হৈছিল যাৰ দ্বাৰা স্থানীয় ছাত্ৰ-ছাত্ৰীসকলক ভূ-প্ৰকৃতিৰ অৰ্কিড আৰু পখিলাৰ বৈচিত্ৰ্যৰ বিষয়ে পৰিচিত কৰাত গুৰুত্ব আৰোপ কৰা হয়। চলিত বৰ্ষৰ যোৱা ১৮ আৰু ১৯ এপ্ৰিলত কাজিৰঙাৰ পানবাৰীত অনুষ্ঠিত এই ‘অৰ্কিড এণ্ড বাটাৰফ্লাই ৱাক’ শীৰ্ষক অনুষ্ঠানত অঞ্চলটোৰ বিভিন্ন বিদ্যালয়-মহাবিদ্যালয়ৰ ৫০ জনৰো অধিক উৎসাহী ছাত্ৰ-ছাত্ৰীয়ে অংশগ্ৰহণ কৰিছিল। এই অনুষ্ঠানতে পানবাৰীৰ চৰাই, কাজিৰঙাৰ পখিলা আৰু কাজিৰঙাৰ অৰ্কিড আদিৰ ওপৰত আলোকপাত কৰা তিনিখন ব্ৰ’চাৰ মুকলি কৰা হয়। এই তথ্যসমৃদ্ধ ব্ৰ’চাৰসমূহৰ লক্ষ্য হৈছে এই অঞ্চলত পোৱা চহকী জৈৱ বৈচিত্ৰ্যৰ প্ৰতি সজাগতা আৰু প্ৰশংসা বৃদ্ধি কৰা।