ৰাহুল গান্ধীৰ ভাইৰেল ফটোক লৈ ৰাজনৈতিক বিতৰ্ক

'আমাৰ অসম'ৰ ডিজিটেল সংবাদঃ কংগ্ৰেছ সাংসদ তথা লোকসভাৰ বিৰোধী দলপতি ৰাহুল গান্ধীৰ এখন ফটোক লৈ নতুনকৈ ৰাজনৈতিক বিতৰ্কৰ সৃষ্টি হৈছে। কেন্দ্ৰীয় মন্ত্ৰী গিৰিৰাজ সিঙে ‘এক্স’ত ৰাহুল গান্ধীৰ সৈতে এগৰাকী মহিলা আৰু এটি শিশুৰ সৈতে য়টত উঠি থকা এখন ফটো প্ৰকাশ কৰি ফটোখন ক’ত আৰু কেতিয়াৰ সেই কথা জানিবলৈ বিচাৰে। লগতে তেওঁৰ সৈতে থকা মহিলা আৰু শিশুটি কোন বুলিও প্ৰশ্ন কৰে। 

ফটোখনত ৰাহুল গান্ধীক অৱসৰ আৰু ছুটীৰ 'মেজাজ'ত দেখা গৈছে। তেওঁৰ কাষত মূৰত কাপোৰ মেৰিয়াই ছানগ্লাছ পিন্ধা এগৰাকী মহিলা আৰু মাজত এটি শিশু বহি থকা দেখা যায়। ফটোখন ছ’চিয়েল মিডিয়াত ভাইৰেল হোৱাৰ পাছতেই মহিলা আৰু শিশুটিৰ পৰিচয়ক লৈ বিভিন্ন চৰ্চা আৰম্ভ হয়। অৱশ্যে ফটোখন ৰাহুল গান্ধীৰ শেহতীয়া বিদেশ ভ্ৰমণৰ সময়ৰ হয় নে নহয়, সেয়া প্ৰথমে স্পষ্ট হোৱা নাছিল। 

বিতৰ্কৰ মাজতে কংগ্ৰেছে ফটোখনৰ বিষয়ে স্পষ্টীকৰণ দিয়ে। কংগ্ৰেছৰ মুখপাত্ৰ সুপ্ৰিয়া শ্ৰীনাটেই কয় যে ফটোত থকা মহিলা আৰু শিশুটি ৰাহুল গান্ধীৰ এগৰাকী বন্ধুৰ পত্নী আৰু পুত্ৰ। বন্ধুগৰাকী ফটোখনত নাছিল যদিও তেওঁলোক একেলগে পাৰিবাৰিক ছুটী কটাবলৈ গৈছিল বুলি কংগ্ৰেছে জনায়। ইণ্ডিয়ান অভাৰচিজ কংগ্ৰেছৰ ছ’চিয়েল মিডিয়াৰ দায়িত্বত থকা অভি দাণ্ডিয়াই আৰু  দাবী কৰে যে ফটোখন আমেৰিকাৰ টেক্সাছৰ লেক ৰে ৰবাৰ্টছত তোলা হৈছিল। গিৰিৰাজ সিঙে বিচৰা তথ্যৰ উত্তৰ হিচাপে তেওঁ ফটোখনৰ স্থানৰ কথাও প্ৰকাশ কৰে। 

গিৰিৰাজ সিঙে কি কৈছিল?

গিৰিৰাজ সিঙে ফটোখন শ্বেয়াৰ কৰি ৰাহুল গান্ধীক সোধে—ফটোখন ক’ত তোলা, কেতিয়া তোলা আৰু তেওঁৰ সৈতে থকা লোকসকল কোন। ৰাহুল গান্ধীৰ বিদেশ ভ্ৰমণক লৈ বিজেপিয়ে পূৰ্বৰে পৰাই প্ৰশ্ন উত্থাপন কৰি অহাৰ সময়তে এই ফটোখন প্ৰকাশ পোৱাটোৱে বিতৰ্ক অধিক বৃদ্ধি কৰে। কংগ্ৰেছে অৱশ্যে গিৰিৰাজ সিঙৰ মন্তব্যক তীব্ৰ ভাষাৰে সমালোচনা কৰিছে। সুপ্ৰিয়া শ্ৰীনাটেই তেওঁক ‘লেচাৰাছ’ বুলি অভিহিত কৰি এগৰাকী মহিলা আৰু পুৰুষক একেলগে দেখিলেই অশালীন চিন্তা কৰাৰ অভিযোগ উত্থাপন কৰে। 

বিদেশ ভ্ৰমণক লৈ পুৰণি ৰাজনৈতিক বাক-বিতণ্ডা

এই ঘটনাৰ আঁৰত ৰাহুল গান্ধীৰ বিদেশ ভ্ৰমণক লৈ বিজেপি-কংগ্ৰেছৰ পুৰণি সংঘাতো আছে। জুনৰ ২২ তাৰিখৰ পৰা জুলাইৰ ১৩ তাৰিখলৈ ৰাহুল গান্ধীৰ বিদেশ ভ্ৰমণক লৈ বিজেপিৰ আইটি চেলৰ মুৰব্বী অমিত মালৱ্যই ভ্ৰমণৰ উদ্দেশ্য, তেওঁ কাক লগ কৰিছিল আৰু ভ্ৰমণৰ খৰচ কোনে বহন কৰিছিল সেই লৈ প্ৰশ্ন তুলিছিল। বিজেপিয়ে আনকি ৰাহুল গান্ধীৰ বিদেশ ভ্ৰমণৰ সংখ্যা, ব্যয় আৰু সুৰক্ষা প্ৰট’কলক লৈও অভিযোগ উত্থাপন কৰিছে। এইদৰে, এটা ব্যক্তিগত ছুটীৰ ফটো প্ৰকাশ কৰাৰ পাছত মহিলা আৰু শিশুটিৰ পৰিচয়ক লৈ উঠা প্ৰশ্নই নতুন ৰাজনৈতিক বিতৰ্কৰ ৰূপ লৈছে।