মুখ্যমন্ত্ৰী হিমন্ত বিশ্ব শৰ্মাই শাসনভাৰ গ্ৰহণ কৰাৰ পাছতেই এ পি এছ চি কেলেংকাৰিৰ তদন্তৰ ফাইল নতুনকৈ খোল খোৱাৰ সময়তে এ পি এছ চিক প্ৰথমবাৰলৈ কলংকৰ দাগ সনা আয়োগৰ প্ৰাক্তন অধ্যক্ষ ডাঃ তাৰাপ্ৰসাদ দাসক বিজেপিৰ মিত্ৰদল অগপৰ গুৰুদায়িত্ব দিয়া হৈছে৷ অগপ দলে বিতৰ্কিত ডাঃ তাৰাপ্ৰসাদ দাসক আঞ্চলিকতাবাদৰ ধবজাবাহক দলটোৰ কেন্দ্ৰীয় উপ-সভাপতিৰ দায়িত্ব অৰ্পণ কৰিছে৷ সভাপতি অতুল বৰা, কাৰ্যকৰী সভাপতি কেশৱ মহন্তৰ নিৰ্দেশত অগপৰ জ্যেষ্ঠ নেতা তথা বিধায়ক ফণীভূষণ চৌধুৰীয়ে বৃহস্পতিবাৰে আনুষ্ঠানিকভাৱে তাৰাপ্ৰসাদ দাসক দলৰ উপ-সভাপতিৰ দায়িত্ব অৰ্পণ কৰে৷ উল্লেখ্য, প্ৰয়াত মুখ্যমন্ত্ৰী হিতেশ্বৰ শইকীয়াৰ আস্থাভাজন ডাঃ তাৰাপ্ৰসাদ দাসে ১৯৯৪-৯৫ চনত লোকসেৱা আয়োগৰ ভাৰপ্ৰাপ্ত অধ্যক্ষৰ দায়িত্ব পালন কৰাৰ বিপৰীতে ১৯৯৫-২০০০ চনলৈ তেওঁ স্থায়ী অধ্যক্ষৰ দায়িত্বত আছিল৷ এইজন বিতৰ্কিত অধ্যক্ষৰ কাৰ্যকালতে স্বতন্ত্ৰ সংস্থা এ পি এছ চিৰ গাত কলংক লাগিছিল৷ দাসৰ কাৰ্যকালতে ধনৰ বিনিময়ত যোগ্যজনক বঞ্চিত কৰি ৰাজনৈতিক পৃষ্ঠপোষকতাত অযোগ্য প্ৰাৰ্থীক এ চি এছ-এ পি এছ পদত বাছনি কৰাৰ অভিযোগ উঠিছিল৷ তাৰাপ্ৰসাদ দাসে বাছনি কৰা একাংশ সন্দেহজনক প্ৰাৰ্থীয়ে এতিয়া চৰকাৰৰ গুৰুত্বপূৰ্ণ দায়িত্বত কাৰ্যনিৰ্বাহ কৰি আছে বুলিও সততে চৰ্চা চলে৷ এনে এজন বিতৰ্কিত ব্যক্তিক অতুল বৰা আৰু কেশৱ মহন্তই অগপৰ উপ-সভাপতিৰ দায়িত্ব দিয়াত ব্যাপক প্ৰতিক্ৰিয়াৰ সৃষ্টি হোৱা দেখা গৈছে৷